Enable Javscript for better performance
வங்கி மோசடி: சந்தேகத்துக்குரிய 120 நிறுவனங்கள் கண்காணிப்பு; மத்திய அரசு தகவல்- Dinamani

சுடச்சுட

    

    வங்கி மோசடி: சந்தேகத்துக்குரிய 120 நிறுவனங்கள் கண்காணிப்பு; மத்திய அரசு தகவல்

    By  புது தில்லி,  |   Published on : 24th March 2018 01:56 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    பஞ்சாப் நேஷனல் வங்கி (பிஎன்பி) முறைகேடு தொடர்பாக சந்தேகத்துக்குரிய 120 நிறுவனங்களின் செயல்பாடுகளை அமலாக்கத் துறையினர் ஆய்வு செய்து வருவதாக மத்திய அரசு தெரிவித்துள்ளது. கடன் ஏய்ப்பு புகாரில் சிக்கியுள்ள தொழிலதிபர்கள் நீரவ் மோடி, மெஹுல் சோக்ஸி ஆகியோருக்குச் சொந்தமான ரூ.7,638 கோடி மதிப்புடைய சொத்துகள் பறிமுதல் செய்யப்பட்டுள்ளதாகவும் அரசு கூறியுள்ளது.
     பஞ்சாப் நேஷனல் வங்கியிடம் இருந்தும், அதன் பெயரைப் பயன்படுத்தி வேறு சில வங்கிகளிடம் இருந்தும் தொழிலதிபர் நீரவ் மோடி ரூ.12,717 கோடி கடன் பெற்று, அதைத் திருப்பிச் செலுத்தவில்லை. தற்போது விசாரணை நடவடிக்கைகளைத் தவிர்ப்பதற்காக அவர் வெளிநாட்டில் தஞ்சமடைந்துள்ளார். இந்த விவகாரத்தில் தொடர்புடைய நீரவ் மோடியின் உறவினர் மெஹுல் சோக்ஸியும் இந்தியாவில் இருந்து தப்பிச்சென்றுவிட்டார். கடந்த சில நாள்களுக்கு முன்பாக அவர்கள் இருவருக்கும் சொந்தமான வீடுகள், அலுவலகங்களில் அமலாக்கத் துறையினர் சோதனை நடத்தினர். அப்போது பல்வேறு முக்கிய ஆவணங்கள் கைப்பற்றப்பட்டன.
     இதையடுத்து அவர்கள் கடன் வாங்கிய அலாகாபாத் வங்கி, பாரத ஸ்டேட் வங்கி, யூனியன் வங்கி, யூகோ வங்கி, ஆக்ஸிஸ் வங்கி ஆகியவற்றின் உயரதிகாரிகளிடம் விசாரணை நடத்தப்பட்டது. பல்வேறு போலி நிறுவனங்கள் வாயிலாகவும், போலியான கடன் உத்தரவாதப் பத்திரங்கள் மூலமாகவும் இத்தகைய முறைகேடு நடத்தப்பட்டது தெரியவந்தது.
     இந்நிலையில், இதுதொடர்பாக மக்களவையில் வெள்ளிக்கிழமை கேள்வி எழுப்பப்பட்டது. அதற்கு மத்திய நிதித் துறை இணையமைச்சர் சிவபிரதாப் சுக்லா எழுத்துப்பூர்வமாக அளித்த பதில்:
     பிஎன்பி வங்கி கடன் ஏய்ப்பு மோசடி வழக்கில் இதுவரை 247 இடங்களில் சோதனை நடத்தப்பட்டுள்ளன. சுமார், 7,638 கோடி மதிப்பிலான சொத்துகள் முடக்கப்பட்டுள்ளன. மேலும், இந்த முறைகேட்டில் தொடர்புடைய 120 சந்தேகத்துக்குரிய நிறுவனங்களின் செயல்பாடுகள் ஆய்வுக்குட்படுத்தப்பட்டு வருகின்றன.
     விசாரணை நடவடிக்கைகள் பாதிக்கப்படக் கூடாது என்பதற்காக அந்நிறுவனங்களின் பெயர்கள் வெளியிடப்படவில்லை என்று அந்த பதிலில் சுக்லா தெரிவித்துள்ளார்.
     

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai