Enable Javscript for better performance
சிபிஎஸ்இ வினாத்தாள் கசிவு: தேர்வு கட்டுப்பாட்டு அதிகாரியிடம் போலீஸ் விசாரணை- Dinamani

சுடச்சுட

    

    சிபிஎஸ்இ வினாத்தாள் கசிவு: தேர்வு கட்டுப்பாட்டு அதிகாரியிடம் போலீஸ் விசாரணை

    By DIN  |   Published on : 31st March 2018 01:13 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    மத்திய இடைநிலைக் கல்வி வாரியம் (சிபிஎஸ்இ) வினாத்தாள் கசிந்த விவகாரம் தொடர்பாக வாரியத்தின் தேர்வுக் கட்டுப்பாட்டு அதிகாரி மற்றும் 10 பேரிடம் தில்லி குற்றப் பிரிவு போலீஸார் விசாரணை மேற்கொண்டனர்.
    முன்னதாக, 18 மாணவர்கள், பயிற்சி வகுப்பு மையத்தின் ஆசிரியர்கள் உள்ளிட்ட 25 பேரிடம் வியாழக்கிழமை விசாரணை நடத்தினர். இதன் மூலம் இந்த விவகாரம் தொடர்பாக இதுவரை 35 பேரிடம் போலீஸார் விசாரித்துள்ளனர்.
    தேர்வுக் கட்டுப்பாட்டு அதிகாரியிடம் சுமார் 2 மணி நேரம் போலீஸார் விசாரித்தனர். அப்போது, தேர்வுத்தாள் தயாரிக்கும் வழிமுறை, அவை எத்தனை தேர்வு மையங்களுக்கு, எவ்வாறு அனுப்பி வைக்கப்படுகிறது என்பது உள்ளிட்ட விவரங்களைக் கேட்டுத் தெரிந்து கொண்டனர். இதன் மூலம் எந்த இடத்தில் வினாத்தாள் கசிந்திருக்கும் என்பதை உறுதி செய்ய முடியும் என்று போலீஸ் தரப்பில் தெரிவிக்கப்பட்டுள்ளது. இந்த விவகாரம் தொடர்பாக போலீஸார் இரு வழக்குகளைப் பதிவு செய்துள்ளனர். சிபிஎஸ்இ அளித்த புகாரின் பெரில் இந்த நடவடிக்கை எடுக்கப்பட்டது.
    சிபிஎஸ்இ பத்தாம் வகுப்பு கணிதப் பாட வினாத்தாளும், 12-ம் வகுப்பு பொருளியல் பாட வினாத்தாளும் சில நாள்களுக்கு முன்பு கசிந்தது. இது மாணவர்கள் மற்றும் பெற்றோர் மத்தியில் கடும் அதிருப்தியை ஏற்படுத்தியது. 
    இதையடுத்து, அந்த இரு பாடங்களுக்கும் மறுதேர்வு நடத்தப்படும் என்று சிபிஎஸ்இ அறிவித்தது. வினாத்தாள்கள் கசிவது தங்கள் எதிர்காலத்தையே கேள்விக்குறியாக்குவதாகக் குற்றம்சாட்டி மாணவ, மாணவியர் தில்லி ஜந்தர் மந்தர் பகுதியில் கூடி போராட்டம் நடத்தினர். 
    முன்னதாக, 10-ஆம் வகுப்பு கணிதத் தேர்வு முந்தைய தினம் சிபிஎஸ்இ தலைவரின் அதிகாரப்பூர்வ இ-மெயில் முகவரிக்கு ஒரு இ-மெயில் வந்தது. அதில், அடுத்த நாள் நடக்க இருந்த கணித வினாத்தாள் 12 பக்கங்களுக்கு கையால் எழுதப்பட்ட புகைப்படம் இணைக்கப்பட்டிருந்தது. வினாத்தாள் ஏற்கெனவே வாட்ஸ்ஆப் மூலம் கசிந்துவிட்டதாகவும், தேர்வை ரத்து செய்ய வேண்டும் என்றும் கூறப்பட்டிருந்தது. இதையடுத்து, போலீஸில் புகார் தெரிவிக்கப்பட்டது. 
    காவல் துறை இணை ஆணையர் தலைமையில், இரு துணை ஆணையர்கள், 4 உதவி ஆணையர்கள், 5 ஆய்வாளர்கள் அடங்கிய சிறப்புப் படை தற்போது இந்த விவகாரம் தொடர்பாக விசாரணை மேற்கொண்டுள்ளது.
    கூகுள் உதவியுடன்...:
    சிபிஎஸ்இ தலைவருக்கு வந்த இ-மெயிலை அனுப்பியது யார்? என்பது குறித்து தெரிந்துகொள்ள கூகுள் நிறுவனத்தின் உதவியை தில்லி போலீஸார் நாடியுள்ளனர். கூகுள் நிறுவனத்தின் ஜி-மெயிலில் இருந்துதான் அந்த இ-மெயில் வந்துள்ளது. 
    எனவே, அந்த இ-மெயில் எங்கிருந்து அனுப்பப்பட்டது என்ற விவரத்தை அளிக்கும்படி கூகுள் நிறுவனத்துக்கு தில்லி போலீஸார் கடிதம் எழுதியுள்ளனர்.
     

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai