Enable Javscript for better performance
பாஜகவில் இணைந்தார் ஆம் ஆத்மி கட்சியின் முன்னாள் அமைச்சர் கபில் மிஸ்ரா- Dinamani

சுடச்சுட

    

    பாஜகவில் இணைந்தார் ஆம் ஆத்மி கட்சியின் முன்னாள் அமைச்சர் கபில் மிஸ்ரா

    By DIN  |   Published on : 17th August 2019 12:50 PM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    Kapil_Mishra

    ஆம் ஆத்மி கட்சியின் முன்னாள் அமைச்சரும், தகுதி நீக்கம் செய்யப்பட்ட தில்லி எம்எல்ஏவுமான கபில் மிஸ்ரா இன்று பாஜகவில் இணைந்தார். 

    கடந்த மே மாதம் நடைபெற்ற மக்களவைத் தேர்தலின்போது பாஜகவுக்கு ஆதரவாக பிரசாரம் செய்ததாக கூறி, தில்லி சட்டப்பேரவைத் தலைவர் ராம்நிவாஸ் கோயல், கடந்த சில வாரங்களுக்கு முன்பு கபில் மிஸ்ராவை எம்எல்ஏ பதவியில் இருந்து தகுதி நீக்கம் செய்து உத்தரவிட்டார். இதை எதிர்த்து கபில் மிஸ்ரா நீதிமன்றத்தில் வழக்குத் தொடுத்துள்ளார். 

    அதில், "தான் பிஜேபியில் அதிகாரப்பூர்வமாக சேர்ந்ததாக அறிவிக்காத நிலையில், ஊக தகவல்களின் அடிப்படையிலான பேரவைத் தலைவர் என் மீது நடவடிக்கை எடுத்துள்ளார். பேரவைத் தலைவரின் உத்தரவை ரத்து செய்ய வேண்டும்' என்று தெரிவிக்கப்பட்டிருந்தது. இந்நிலையில், "நான் பாஜகவில் சனிக்கிழமை காலை 11 மணிக்கு சேரப்போகிறேன்' என்று கபில் மிஸ்ரா தனது சுட்டுரையில் நேற்று பதிவிட்டார். 

    இந்தத் தகவலை தில்லி பாஜக மூத்த தலைவர்களும் உறுதிப்படுத்தினர்.  பாஜக தேசிய துணைத் தலைவர் ஷியாம் ஜாஜு, தில்லி தலைவர் மனோஜ் திவாரி ஆகியோர் முன்னிலையில் சனிக்கிழமை பிரபலமான ஒருவர் கட்சியில் சேருகிறார் என்று தில்லி பாஜகவும் அறிக்கை வெளியிட்டது. இதன்படி கபில் மிஸ்ரா இன்று பாஜகவைச் சேர்ந்த மனோஜ் திவாரி மற்றும் விஜய் கோயல் ஆகியோர் முன்னிலையில் அக்கட்சியில் இணைந்தார்.

    2017, மே மாதம் தில்லி அமைச்சர் பதவியில் இருந்து நீக்கப்பட்ட கபில் மிஸ்ரா, ஆம் ஆத்மி கட்சிக்கு எதிராகவும், தில்லி முதல்வர் கேஜரிவாலுக்கு எதிராகவும் கருத்துகளை வெளியிட்டு அதிருப்தி தலைவராக இருந்து வந்தார். அப்போது இருந்தே அவர் பாஜகவில் சேர்ந்துவிடுவார் என தகவல்கள் வெளியாகின.   ஆனால், அவர் கட்சியில் சேராமல், மக்களவைத் தேர்தலில் பாஜகவுக்கு ஆதரவாக பிரசாரத்தில் ஈடுபட்டது குறிப்பிடத்தக்கது. 
     

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai