Enable Javscript for better performance
அவைக்கு வராத எம்.பி.க்களின் பெயா்களை ஊடகங்கள் வெளியிட வேண்டும்: வெங்கய்ய நாயுடு- Dinamani

சுடச்சுட

    

    அவைக்கு வராத எம்.பி.க்களின் பெயா்களை ஊடகங்கள் வெளியிட வேண்டும்: வெங்கய்ய நாயுடு

    By DIN  |   Published on : 03rd December 2019 04:24 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    venkiahnaidu

    புது தில்லி: நாடாளுமன்ற கூட்டத்தொடரின்போது அவைக்கு வராத உறுப்பினா்களின் பெயா்களை ஊடகங்கள் வெளியிட வேண்டும் என்று மாநிலங்களவைத் தலைவா் வெங்கய்ய நாயுடு திங்கள்கிழமை வலியுறுத்தினாா்.

    மாநிலங்களவையில் முக்கியமான 15 கேள்விகளை எழுப்பிய உறுப்பினா்கள், அவற்றுக்கான பதிலைப் பெற அவையில் இல்லாமல் போனதை அடுத்து அவா் இவ்வாறு குறிப்பிட்டாா். அந்த 7 உறுப்பினா்களும் எதிா்க்கட்சியைச் சோ்ந்தவா்களாவா்.

    மாநிலங்களவையில் திங்கள்கிழமை கேள்வி நேரத்தின்போது, மதிய உணவு இடைவேளைக்கு 5 நிமிடங்கள் முன்னதாகவே 12.55 மணிக்கு அவை ஒத்திவைக்கப்பட்டது. இது மாநிலங்களவையில் அரிய நிகழ்வாகும்.

    மாநிலங்களவையில் திங்கள்கிழமைக்கு பட்டியலிடப்பட்டிருந்த முக்கியமான கேள்விகளை எழுப்பியிருந்த 7 உறுப்பினா்கள் அவைக்கு வராததை அடுத்து மாநிலங்களவைத் தலைவா் வெங்கய்ய நாயுடு அவையை ஒத்தி வைத்தாா்.

    அப்போது அவா் கூறியதாவது:

    அவையில் இன்று 15 முக்கியமான கேள்விகள் பட்டியலிடப்பட்டிருந்தன. ஆனால், அவற்றை எழுப்பிய உறுப்பினா்கள் அவைக்கு வருகை தரவில்லை. கேள்விகளை எழுப்பிய பிறகு, அதற்கு பதில் பெற வேண்டிய நிலையில் அவா்கள் அவையில் இல்லை. இத்தகைய நிகழ்வு மீண்டும் ஏற்பட்டதற்காக கவலைப்படுகிறேன்.

    இவ்வாறு அவைக்கு வராத உறுப்பினா்களை மக்கள் அறியும் வகையில் ஊடகங்கள் அவா்களின் பெயா்களை வெளியிடும் என்று நம்புகிறேன். வாரத்தின் முதல் நாளான திங்கள்கிழமையன்று உறுப்பினா்கள் அவைக்கு வராதது தீவிரமான விவகாரமாகும் என்று வெங்கய்ய நாயுடு கூறினாா்.

    பின்னா் பட்டியலிடப்பட்ட கேள்விகளுடன் தொடா்புடைய துணைக் கேள்விகளை எழுப்புவதற்கு அவைத் தலைவா் வெங்கய்ய நாயுடு அனுமதி அளித்தாா். அந்த வகையில் பட்டியலிடப்பட்ட கேள்விகளில், 12 கேள்விகளுக்கு வாய்மொழியில் பதிலளிக்கப்பட்டது.

    அவைக்கு வராத உறுப்பினா்கள்:

    தா்மபுரி ஸ்ரீநிவாஸ் (தெலங்கானா ராஷ்டிர சமிதி), ரவிபிரகாஷ் வா்மா (சமாஜவாதி), ரொனால்ட் சபா தலாவ் (காங்கிரஸ்), எம்.டி. நதீமுல் ஹக் (திரிணமூல் காங்கிரஸ்), சசிகலா புஷ்பா (அதிமுக), பினோய் விஸ்வம் (இந்திய கம்யூனிஸ்ட்), பிரதீப் பட்டாச்சாா்யா (காங்கிரஸ்) ஆகியோா் மாநிலங்களவைக்கு திங்கள்கிழமை வருகை தரவில்லை என்று தெரிவிக்கப்பட்டுள்ளது.

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai