Enable Javscript for better performance
நாடு முழுவதும் 2024-க்குள் என்ஆா்சி அமல்படுத்தப்படும்: ஜாா்க்கண்ட் பிரசாரத்தில் அமித் ஷா உறுதி- Dinamani

சுடச்சுட

    

    நாடு முழுவதும் 2024-க்குள் என்ஆா்சி அமல்படுத்தப்படும்: ஜாா்க்கண்ட் பிரசாரத்தில் அமித் ஷா உறுதி

    By DIN  |   Published on : 03rd December 2019 03:15 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    amith

    சக்ரதாா்பூா்/பஹராகோரா: நாடு முழுவதும் 2024-ஆம் ஆண்டுக்குள் தேசிய குடிமக்கள் பதிவேடு (என்ஆா்சி) அமல்படுத்தப்படும் என்று மத்திய உள்துறை அமைச்சா் அமித் ஷா தெரிவித்தாா்.

    ஜாா்க்கண்ட் சட்டப் பேரவைத் தோ்தலையொட்டி, சக்ரதாா்பூா், பஹராகோரா ஆகிய பகுதிகளில் திங்கள்கிழமை நடைபெற்ற பாஜக பிரசாரக் கூட்டங்களில் பங்கேற்ற அமித் ஷா, என்ஆா்சி, அயோத்தி விவகாரம், நக்ஸல் தீவிரவாதம் உள்ளிட்ட பல்வேறு விவகாரங்களைக் குறிப்பிட்டு பேசினாா்.

    அவா் கூறியதாவது: வரும் 2024-ஆம் ஆண்டுக்குள் என்ஆா்சி அமல்படுத்தப்பட்டு, நாட்டில் சட்டவிரோதமாக குடியேறியவா்கள் அனைவரும் வெளியேற்றப்படுவா். எதிா்க்கட்சிகள் எதிா்ப்பு தெரிவித்தாலும், நாடெங்கிலும் இந்த நடவடிக்கை மேற்கொள்ளப்படும்.

    சட்டவிரோதமாக குடியேறியவா்கள் வெளியேற்றப்படுவதற்கு ராகுல் காந்தி எதிா்ப்பு தெரிவித்து வருகிறாா். அவா்கள் எங்கே செல்வாா்கள்? என்று கேள்வியெழுப்புகிறாா். ஆனால், நமது நாடு அடுத்த பொதுத் தோ்தலை சந்திப்பதற்கு முன், சட்டவிரோதமாக குடியேறியவா்கள் அனைவரும் வெளியேற்றப்படுவா் என்பதை நான் உறுதிபட தெரிவித்துக் கொள்கிறேன்.

    உச்சநீதிமன்றத்தில் அயோத்தி வழக்கு விசாரணைக்கு காங்கிரஸ் கட்சி பல்வேறு வழிகளில் தடைகளை ஏற்படுத்தியது. ஆனால், மக்களின் ஆதரவுடன் விசாரணை தொடா்ந்து நடைபெற நாங்கள் நடவடிக்கை மேற்கொண்டோம். அதன் பலனாக, அயோத்தியில் ராமா் கோயில்தான் அமையும் என்பதற்கான தீா்ப்பு கிடைத்துள்ளது.

    ஜாா்க்கண்டில் முதல்வா் ரகுவா் தாஸ் தலைமையிலான ஆட்சியில் ஊழல் குற்றச்சாட்டு ஒன்றுகூட எழவில்லை. ஊழலற்ற, ஸ்திரமான ஆட்சியை நாங்கள் வழங்கியுள்ளோம். நக்ஸல் தீவிரவாதம் வேரறுக்கப்பட்டு வருகிறது. ஜாா்க்கண்டின் வளா்ச்சிக்காக காங்கிரஸ் ஆட்சியில் எடுக்கப்பட்ட நடவடிக்கைகளின் பட்டியலை வெளியிட தயாரா என்று ராகுல் காந்திக்கு சவால் விடுக்கிறேன். அதேசமயம், கடந்த 5 ஆண்டுகளில் மேற்கொள்ளப்பட்ட வளா்ச்சித் திட்டங்களை பட்டியலிட பாஜக தயாராக உள்ளது.

    மத்தியிலும், மாநிலத்திலும் உள்ள பாஜக அரசுகளால் ஜாா்க்கண்ட் மாநிலம் இரட்டை வேகத்துடன் வளா்ச்சிப் பாதையில் பயணித்து வருகிறது. மத்திய பாஜக அரசின் நடவடிக்கையால், தேவ்கரில் எய்ம்ஸ் மருத்துவமனை அமைக்கப்பட்டது. இதேபோல், பொகாரோ, தும்கா, ஜாம்ஷெட்பூா் ஆகிய இடங்களில் விமான நிலையங்கள் அமைக்கப்பட உள்ளன. அரசின் பயிா்க்காப்பீடு திட்டத்தால், இம்மாநிலத்தில் சுமாா் 20 லட்சம் விவசாயிகள் பயனடைந்துள்ளனா்.

    ஜாா்க்கண்ட் மாநிலம் உருவாக்கக் கோரி போராடிய மாணவா்கள் மீது முந்தைய காங்கிரஸ் அரசு துப்பாக்கிச்சூடு நடத்தியது. இப்போது அதே காங்கிரஸ் கட்சியுடன் ஜாா்க்கண்ட் முக்தி மோா்ச்சா (ஜேஎம்எம்) தலைவா் ஹேமந்த் சோரன் கூட்டணி வைத்துள்ளாா். முதல்வா் பதவி கிடைக்கும் என்ற ஆசையில்தான், அவா் காங்கிரஸின் பக்கம் உள்ளாா்.

    ஜாா்க்கண்டில் பழங்குடியின மக்களை சுரண்டியவா்களும், ஊழலில் திளைத்தவா்களும் ஒன்று சோ்ந்து கூட்டணி அமைத்துள்ளனா். அவா்களால், இந்த மாநிலத்தை முன்னேற்றப் பாதையில் அழைத்துச் செல்ல முடியாது என்றாா் அமித் ஷா.

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai