Enable Javscript for better performance
3 ஆண்டுகளில் 4,100 அரசு ஊழியர்கள் மீது சிபிஐ ஊழல் வழக்கு பதிவு: மத்திய அரசு- Dinamani

உடனுக்கு உடன் செய்திகள்

    3 ஆண்டுகளில் 4,100 அரசு ஊழியர்கள் மீது சிபிஐ ஊழல் வழக்கு பதிவு: மத்திய அரசு

    By DIN  |   Published On : 14th February 2019 02:49 AM  |   Last Updated : 14th February 2019 02:49 AM  |  அ+அ அ-  |  


    கடந்த 3 ஆண்டுகளில் சுமார் 4,123 அரசு ஊழியர்கள் மீது சிபிஐ ஊழல் வழக்குப் பதிவு செய்துள்ளது என்று பணியாளர் நலத் துறை இணை அமைச்சர் ஜிதேந்திர சிங் மக்களவையில் புதன்கிழமை தெரிவித்தார். 
    இதுதொடர்பாக மக்களவையில் எழுத்துப்பூர்வமாக அளித்த பதிலில் அவர் கூறியுள்ளதாவது: 
    சிபிஐ அளித்துள்ள தகவலின்படி, கடந்த 2016, 2017 மற்றும் 2018 ஆகிய 3 ஆண்டுகளில் 4,123 அரசு ஊழியர்கள் மீது 1,767 ஊழல் வழக்குகள் பதிவு செய்யப்பட்டன. அவற்றில் 900 வழக்குகளில் குற்றப்பத்திரிகை தாக்கல் செய்யப்பட்டுள்ளன. 59 வழக்குகளில் துறை ரீதியான நடவடிக்கைகள் பரிந்துரைக்கப்பட்டுள்ள நிலையில், 89 வழக்குகள் முடிக்கப்பட்டுவிட்டன அல்லது தள்ளுபடி செய்யப்பட்டுவிட்டன. 
    குற்றப்பத்திரிகை தாக்கல் செய்யப்பட்ட 900 வழக்குகளில், 19 வழக்குகளில் குற்றம் நிரூபிக்கப்பட்டன. 9 வழக்குகளில், குற்றம்சாட்டப்பட்டவர்கள் விடுவிக்கப்பட்டுவிட்டனர். 4 வழக்குகள் தள்ளுபடி செய்யப்பட்டன. ஊழலை தடுக்க அரசு பல்வேறு நடவடிக்கைகளை மேற்கொண்டு வருகிறது. அதன் ஒரு பகுதியாக, ஊழல் தடுப்புச் சட்டத்தை கடுமையாக்கும் வகையில், கடந்த 2018 ஜூலை 26-ஆம் தேதி அதில் திருத்தங்களும் கொண்டு வரப்பட்டன என்று ஜிதேந்திர சிங் கூறினார். 
    அதேபோல், இந்த ஆண்டில் ஜனவரியில் மட்டும் மொத்தமாக 67 வழக்குகளை சிபிஐ பதிவு செய்துள்ளதாக ஜிதேந்திர சிங் தெரிவித்தார். 
    கடந்த 2018-ஆம் ஆண்டில் 765 வழக்குகளையும், 2017-ஆம் ஆண்டில் 940 வழக்குகளையும், 2016-ஆம் ஆண்டில் 925 வழக்குகளையும் அந்த அமைப்பு பதிவு செய்துள்ளதாக தெரிவித்த அவர், ஊழல் தடுப்புச் சட்டத்தின் கீழான வழக்கு விசாரணைகளின் நிலை குறித்து சிபிஐ இயக்குநருடன் மத்திய ஊழல் கண்காணிப்பு ஆணையர் (சிவிசி) ஒவ்வொரு மாதமும் கலந்தாலோசிப்பதாகக் கூறினார். 
    4.12 லட்சம் காலிப் பணியிடங்கள்: மத்திய அரசு துறைகளில் கடந்த 2016-ஆம் ஆண்டில் சுமார் 4.12 லட்சம் காலிப் பணியிடங்கள் இருந்ததாக மக்களவையில் புதன்கிழமை தெரிவிக்கப்பட்டது.
    இதுதொடர்பாக நிதியமைச்சகத்தின் செலவினத் துறை தரப்பு தெரிவித்த தகவலின்படி, மொத்தம் 4,12,752 காலிப் பணியிடங்கள் இருந்துள்ளன. அதில் 15,284 இடங்கள் குரூப் ஏ பிரிவிலும், 76,050 பணியிடங்கள் குரூப் பி பிரிவிலும், 3,21,418 இடங்கள் குரூப் சி பிரிவிலும் காலியாக இருந்துள்ளன.
    வங்கி மோசடியில் 900 வழக்குகள்: கடந்த ஆண்டு ஏப்ரல் முதல் செப்டம்பர் வரையிலான காலகட்டத்தில் வங்கி கிரெடிட்/டெபிட் அட்டைகள் மற்றும் இணையவழி வங்கிச் சேவை ஆகியவற்றின் மூலமாக ரூ.1 லட்சம் மற்றும் அதற்கும் அதிகமான மதிப்பில் மோசடி செய்யப்பட்டதாக ரிசர்வ் வங்கி மொத்தம் 921 வழக்குகள் பதிவு செய்துள்ளது.


    உங்கள் கருத்துகள்

    Disclaimer : We respect your thoughts and views! But we need to be judicious while moderating your comments. All the comments will be moderated by the dinamani.com editorial. Abstain from posting comments that are obscene, defamatory or inflammatory, and do not indulge in personal attacks. Try to avoid outside hyperlinks inside the comment. Help us delete comments that do not follow these guidelines.

    The views expressed in comments published on dinamani.com are those of the comment writers alone. They do not represent the views or opinions of dinamani.com or its staff, nor do they represent the views or opinions of The New Indian Express Group, or any entity of, or affiliated with, The New Indian Express Group. dinamani.com reserves the right to take any or all comments down at any time.

    • அதிகம்
      படிக்கப்பட்டவை
    • அதிகம் பகிரப்பட்டவை
    kattana sevai
    flipboard facebook twitter whatsapp