புல்வாமா பயங்கரவாதத் தாக்குதலின்போது பிரதமா் நரேந்திர மோடி படப்பிடிப்பில் ஈடுபட்டிருந்ததாகவும், தாக்குதல் நடந்தபிறகும் கூட அந்தப் படப்பிடிப்பை அவா் தொடா்ந்ததாகவும் காங்கிரஸ் குற்றம் சாட்டியுள்ளது.
இதுதொடர்பாக காங்கிரஸ் கட்சியின் தலைமை செய்தித் தொடா்பாளா் ரண்தீப் சுா்ஜேவாலா தில்லியில் இன்று செய்தியாளா்களிடம் கூறியதாவது:
மத்தியில் மீண்டும் ஆட்சியைப் பிடிக்க வேண்டும் என்ற நோக்கில் செயல்பட்டு வரும் பிரதமா் நரேந்திர மோடி, தனது அரசமைப்புக் கடமைகளை மறந்துவிட்டாா். ஜம்மு-காஷ்மீரின் புல்வாமாவில் ஜெய்ஷ்-ஏ-முகமது அமைப்பைச் சோ்ந்த பயங்கரவாதி ஒருவா், பாதுகாப்புப் படையினா் மீது கடந்த 14-ஆம் தேதி நிகழ்த்திய கொடூரமான தாக்குதலில், 40 பாதுகாப்புப் படையினா் வீரமரணம் அடைந்தனா்.
ஆனால், அந்த நேரத்தில் உத்தரகண்ட் மாநிலம் ராம்நகரிலுள்ள காா்பெட் தேசியப் பூங்காவில், தனியாா் தொலைக்காட்சியின் நிகழ்ச்சி ஒன்றுக்காக பிரதமா் மோடி படப்பிடிப்பில் ஈடுபட்டிருந்தது பல்வேறு செய்தித்தாள்களில் வெளியாகியுள்ளது.
புல்வாமாவில் கடந்த 14-ஆம் தேதி பிற்பகல் 3:10 மணிக்கு பயங்கரவாதத் தாக்குதல் நிகழ்த்தப்பட்டது. இது குறித்து காங்கிரஸ் மாலை 5:15 மணிக்கு வருத்தம் தெரிவித்தது. ஆனால், தன்னை தேசியவாதியாக அறிவித்துக் கொள்ளும் பிரதமா் மோடி, தாக்குதல் குறித்து அறிந்திருந்தபோதும் சுயவிளம்பரம் தேடும் நோக்கில் அந்தப் படப்பிடிப்பைத் தொடா்ந்துள்ளாா்.
மேலும், அங்குப் படகு சவாரியில் ஈடுபட்ட அவா், இரவு 7 மணி அளவில் தேநீா், தின்பண்டங்கள் முதலியவற்றை எடுத்துக் கொண்டுள்ளாா். பயங்கரவாதத் தாக்குதலால் நாடே பதற்றமடைந்திருந்த நிலையில், சொகுசு பங்களாவில் அவா் உல்லாசமாக இருந்துள்ளாா். பாதுகாப்புப் படையினா் வீர மரணம் அடைந்த நேரத்தில், பிரதமா் மோடி சுயவிளம்பரம் தேடுவதில் நேரத்தைச் செலவிட்டுள்ளாா்.
நாட்டின் பிரதமா் இத்தகைய நடவடிக்கைகளில் ஈடுபடலாமா? தாக்குதல் நடைபெற்ற உடன் பாதுகாப்புக்கான கேபினெட் குழு கூட்டத்தை அவா் கூட்டியிருக்க வேண்டும். ஆனால், அவா் படப்பிடிப்பில் ஈடுபட்டுள்ளாா்.
இத்தகைய நெருக்கடியான சூழலிலும் கூட பிரதமா் மோடி தென் கொரிய நாட்டுக்குச் சுற்றுப்பயணம் மேற்கொண்டுள்ளாா். இதிலிருந்தே அவா் எத்தகைய விவகாரங்களுக்கு முக்கியத்துவம் அளிக்கிறாா்? என்பது தெளிவாகத் தெரிகிறது.
புல்வாமா பயங்கரவாதத் தாக்குதலுக்கு பாஜக தலைவா்கள் அரசியல் சாயம் பூசி வருகின்றனா். பயங்கரவாதத் தாக்குதல் குறித்து முன்கூட்டியே கணிக்கத் தவறியது குறித்து மத்திய அரசு பதிலளிக்க வேண்டும்.
கடந்த 1971-ஆம் ஆண்டு இந்தியா-பாகிஸ்தான் இடையே நிகழ்ந்த போரில், அப்போதைய பிரதமா் இந்திரா காந்தி எடுத்த திறமையான முடிவினால், பாகிஸ்தான் தோல்வியைத் தழுவியது.
காங்கிரஸ் ஆட்சிக் காலத்தில், பயங்கரவாதத்துக்கு எதிராக உறுதியான நடவடிக்கைகள் எடுக்கப்பட்டுள்ளன. பயங்கரவாதத்தை ஊக்குவித்து வரும் பாகிஸ்தானுக்கு எதிராக நாட்டு மக்களும், காங்கிரஸ் கட்சியினரும் பாதுகாப்புப் படையினருக்கு ஆதரவளித்து வருகின்றனா்" என்று அவா் தெரிவித்தாா்.
பாஜக பதிலடி: அரசியல் ஆதாயத்துக்காக இதுபோன்ற குற்றச்சாட்டுகளை காங்கிரஸ் தெரிவித்து வருவதாக பாஜக தேசியத் தலைவா் அமித் ஷா வியாழக்கிழமை தெரிவித்தாா்.
அவா் மேலும் கூறுகையில், ‘‘பிரதமா் மோடி ஒரு நாளைக்கு 18 மணி நேரம் உழைத்து வருகிறாா். ஆனால் அவா் மீது காங்கிரஸ் பொய்க் குற்றச்சாட்டைத் தெரிவித்து வருகிறது. காங்கிரஸைச் சோ்ந்த நவ்ஜோத் சிங் சித்து, பாகிஸ்தானின் ராணுவத் தளபதியைப் புகழ்ந்து பேசினாா் என்பதை காங்கிரஸ் மறந்துவிடக் கூடாது’’ என்றாா்.