வரி வசூல் சுணக்க நிலையை எடுத்துக் காட்டும் வகையில், கடந்த ஜூன் மாதத்தில் சரக்கு மற்றும் சேவை வரி (ஜிஎஸ்டி) வசூல் ரூ.1 லட்சம் கோடிக்கும் கீழ் சரிந்துள்ளது.
இதுகுறித்து மத்திய நிதி அமைச்சகம் திங்கள்கிழமை தெரிவித்துள்ளதாவது: சரக்கு மற்றும் சேவை வரி வசூல் சென்ற ஜூன் மாதத்தில் ரூ.99,939 கோடியாக இருந்தது. இது, முந்தைய மே மாதத்தில் ரூ.1,00,289 கோடியாகவும், கடந்தாண்டு ஜூனில் ரூ.95,610 கோடியாகவும் காணப்பட்டது.
ஜூனில் வசூலான ஒட்டுமொத்த ஜிஎஸ்டி வருவாயில், மத்திய-ஜிஎஸ்டி ரூ.18,366 கோடியாகவும், மாநில-ஜிஎஸ்டி ரூ.25,343 கோடியாகவும், ஒருங்கிணைக்கப்பட்ட ஜிஎஸ்டி ரூ.47,772 கோடியாகவும் (இறக்குமதி மூலம் வசூலான ரூ.21,980 கோடியும் அடங்கும்), தீர்வை ரூ.8,457 கோடியாகவும் (இறக்குமதி மூலம் வசூலான ரூ.876 கோடியும் அடங்கும்) இருந்தது என நிதி அமைச்சகம் தெரிவித்துள்ளது.