போபால்: மத்திய பிரதேசத்தில் போபால் மக்களவை தொகுதியில் வேட்பாளராக போட்டியிடும் பிரக்யா சிங் தாக்குர் கோட்சே குறித்து வெளியிட்ட சர்ச்சை கருத்து தொடர்பான அறிக்கையை அம்மாநில தலைமை தேர்தல் அதிகாரி தேர்தல் ஆணையத்திடம் சமர்ப்பித்தார்.
இதுகுறித்து மத்தியப் பிரதேச தலைமை தேர்தல் அதிகாரி விஎல் காந்த்ராவ் வெள்ளிக்கிழமை கூறியதாவது:
போபால் மக்களவை தொகுதி பாஜக வேட்பாளர் சாத்வி பிரக்யா, கோட்சே குறித்து வெளியிட்ட சர்ச்சை கருத்து தொடர்பான மாநில தேர்தல் அதிகாரிகளின் அறிக்கை தேர்தல் ஆணையத்துக்கு அனுப்பப்பட்டுள்ளது. அந்த அறிக்கைகளின் அடிப்படையில் இந்த விவகாரத்தில் இறுதி முடிவை தலைமை தேர்தல் ஆணையமே மேற்கொள்ளும் என்றார் அவர்.
நாதுராம் கோட்சே ஒரு தேச பக்தர் என பாஜக வேட்பாளர் பிரக்யா சிங் தாக்குர் வியாழக்கிழமை தெரிவித்தார். இதற்கு பாஜக கட்சி உள்பட அனைத்து தரப்பிலிருந்தும் கடும் எதிர்ப்பு எழுந்ததையடுத்து தனது செயலுக்கு மன்னிப்பு கோருவதாகவும், அந்த கருத்தை திரும்பப் பெறுவதாகவும் தெரிவித்தார்.