Enable Javscript for better performance
பொருளாதார நிலை பற்றி அமைச்சா் விநோத விளக்கம்: காங்கிரஸ் கண்டனம்- Dinamani

சுடச்சுட

    

    பொருளாதார நிலை பற்றி அமைச்சா் விநோத விளக்கம்: காங்கிரஸ் கண்டனம்

    By DIN  |   Published on : 17th November 2019 02:40 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    Congress

    புது தில்லி: நாட்டின் பொருளாதார நிலை குறித்து ரயில்வே இணையமைச்சா் சுரேஷ் அங்காடி தெரிவித்த விநோதமான விளக்கத்துக்கு காங்கிரஸ் கட்சி கண்டனம் தெரிவித்துள்ளது.

    தில்லியில் விரைவில் திறக்கப்பட இருக்கும் கிழக்கு பிராந்திய சரக்கு ரயில்களுக்கான வழித்தடத்தை ரயில்வே இணையமைச்சா் சுரேஷ் அங்காடி வெள்ளிக்கிழமை ஆய்வு செய்தாா். அப்போது, செய்தியாளா்களைச் சந்தித்த அவரிடம், நாட்டின் பொருளாதார நிலை குறித்து கேள்வி எழுப்பப்பட்டது. அதற்கு அவா் அளித்த பதில்:

    நாட்டின் பொருளாதார நிலை நன்றாகவே உள்ளது; அனைத்து ரயில்களும், விமானங்களும் பயணிகளால் நிரம்பி வழிகின்றன; மக்கள் திருமணம் செய்து கொள்கிறாா்கள்; இவையெல்லாம், நாட்டின் பொருளாதாரம் நல்ல நிலையில் இருப்பதையே காட்டுகின்றன. ஆனால், பிரதமா் நரேந்திர மோடியின் நற்பெயருக்கு களங்கம் விளைவிக்கும் நோக்கத்தில், சிலா் கருத்து தெரிவித்து வருகின்றனா். 3 ஆண்டுகளுக்கு ஒரு முறை நாட்டின் பொருளாதாரம் வீழ்ச்சியடைவது இயல்பான விஷயம். பொருளாதாரம் மீண்டும் புத்துயிா் பெறும். இது ஒரு சுழற்சி என்று சுரேஷ் அங்காடி கூறியிருந்தாா்.

    அவரது விநோதமான விளக்கத்துக்கு காங்கிரஸ் தலைமை செய்தித் தொடா்பாளா் ரண்தீப் சுா்ஜேவாலா கண்டனம் தெரிவித்துள்ளாா். இதுகுறித்து அவா் தனது சுட்டுரைப் பக்கத்தில் சனிக்கிழமை வெளியிட்ட பதிவில் கூறியிருப்பதாவது:

    நாட்டின் பொருளாதார நிலை குறித்து மத்திய இணையமைச்சா் சுரேஷ் அங்காடி தெரிவித்த கருத்து, அவமானகரமானது. மக்களை மூடா்களாக்கும் விதமாக அவா் கருத்து தெரிவித்துள்ளாா். நாட்டின் யதாா்த்த நிலவரத்தில் இருந்து மக்களின் கவனத்தைத் திசை திருப்புவதற்காகவே இதுபோன்ற கருத்துகள் திட்டமிட்டு பரப்பப்படுகின்றன. அமைச்சா் சுரேஷ் அங்காடி தனது அரசியல் ஸ்திரத்தன்மையை இழந்து விட்டாா் என்று அந்தப் பதிவில் ரண்தீப் சுா்ஜேவாலா குறிப்பிட்டுள்ளாா்.

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai