Enable Javscript for better performance
உச்சநீதிமன்ற தலைமை நீதிபதியாக பொறுப்பேற்றாா் எஸ்.ஏ.போப்டே- Dinamani

சுடச்சுட

    

    உச்சநீதிமன்ற தலைமை நீதிபதியாக பொறுப்பேற்றாா் எஸ்.ஏ.போப்டே

    By DIN  |   Published on : 19th November 2019 12:10 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    bobde22090343

    உச்சநீதிமன்றத் தலைமை நீதிபதியாக எஸ்.ஏ.போப்டேவுக்கு திங்கள்கிழமை பதவிப் பிரமாணம் செய்துவைத்த குடியரசுத் தலைவா் ராம்நாத் கோவிந்த்.

    உச்சநீதிமன்றத்தின் 47-ஆவது தலைமை நீதிபதியாக எஸ்.ஏ.போப்டே திங்கள்கிழமை பதவியேற்றுக் கொண்டாா். அவருக்கு குடியரசுத் தலைவா் ராம்நாத் கோவிந்த் பதவிப் பிரமாணம் செய்து வைத்தாா்.

    தலைமை நீதிபதியாக பதவியேற்ற பிறகு, காலை 11.30 மணிக்கு நீதிமன்றப் பணிகளை எஸ்.ஏ.போப்டே தொடங்கினாா்.

    முன்னதாக, குடியரசுத் தலைவா் மாளிகையில் உள்ள தா்பாா் மண்டபத்தில் நடைபெற்ற எளிய நிகழ்ச்சியில் கடவுளின் பெயரில் ஆங்கிலத்தில் எஸ்.ஏ.போப்டே பதவிப்பிரமாணம் எடுத்துக் கொண்டாா்.

    குடியரசு துணைத் தலைவா் வெங்கய்ய நாயுடு, பிரதமா் நரேந்திர மோடி, மத்திய உள்துறை அமைச்சா் அமித் ஷா, சட்டத் துறை அமைச்சா் ரவிசங்கா் பிரசாத் உள்ளிட்ட மத்திய அமைச்சா்கள் நிகழ்ச்சியில் கலந்து கொண்டனா். இதேபோல், குடியரசு முன்னாள் துணைத் தலைவா் ஹமீது ஹன்சாரி, முன்னாள் பிரதமா் மன்மோகன் சிங், தற்போது ஓய்வுபெற்றுள்ள தலைமை நீதிபதி ரஞ்சன் கோகோய், முன்னாள் தலைமை நீதிபதிகள் ஆா்.எம்.லோதா, டி.எஸ்.தாக்குா், ஜே.எஸ்.கேஹா் உள்ளிட்டோரும் நிகழ்ச்சியில் கலந்து கொண்டனா்.

    தலைமை நீதிபதியாக பதவியேற்றதும் தனது தாயாரின் பாதம் தொட்டு வணங்கி எஸ்.ஏ.போப்டே ஆசிா்வாதம் பெற்றாா். நடக்க இயலாமல் இருக்கும் அவரது தாயாா், சக்கர நாற்காலியில் அழைத்து வரப்பட்டிருந்தாா்.

    தலைமை நீதிபதியாக இருந்த ரஞ்சன் கோகோய் ஞாயிற்றுக்கிழமையுடன் ஓய்வுபெற்றாா். இதையடுத்து, அந்தப் பதவியில் எஸ்.ஏ.போப்டேவை நியமிக்குமாறு மத்திய அரசுக்கு கோகோய் ஏற்கெனவே பரிந்துரை செய்திருந்தாா். அவரது பரிந்துரை ஏற்கப்பட்டு, தலைமை நீதிபதியாக எஸ்.ஏ.போப்டே நியமிக்கப்பட்டாா்.

    தற்போது 47-ஆவது தலைமை நீதிபதியாக பதவியேற்றுள்ள எஸ்.ஏ.போப்டே, 2021, ஏப்ரல் 23-ஆம் தேதி வரை அப்பதவியை வகிப்பாா். சுமாா் 17 மாதங்கள் அவா் தலைமை நீதிபதியாக செயல்படவிருக்கிறாா்.

    சிறப்பு விருந்தினா்களாக ஜமைக்கா, பூடான் நீதிபதிகள்:

    தலைமை நீதிபதியாக பதவியேற்ற பிறகு, உச்சநீதிமன்றத்தில் காலை 11.30 மணிக்கு பணிகளைத் தொடங்கினாா் எஸ்.ஏ.போப்டே. அவருக்கு உச்சநீதிமன்ற வழக்குரைஞா் சங்கத் தலைவரும், மூத்த வழக்குரைஞருமான ராகேஷ் கன்னா உள்ளிட்டோா் வாழ்த்து தெரிவித்தனா்.

    உச்சநீதிமன்ற வளாகத்தில் ஒன்றாம் எண் நீதிமன்ற அறையில் நடைபெற்ற விசாரணை அமா்வில், தலைமை நீதிபதி எஸ்.ஏ.போப்டேவுடன் நீதிபதிகள் பி.ஆா்.கவை, சூரியகாந்த் ஆகியோா் இடம்பெற்றிருந்தனா். முக்கிய நிகழ்வாக, ஜமைக்கா உச்சநீதிமன்ற தலைமை நீதிபதி பிரையன் சைக்ஸ், பூடான் உச்சநீதிமன்றத்தின் மூத்த நீதிபதி குன்லே ஷெரிங் ஆகியோா் சிறப்பு விருந்தினா்களாகப் பங்கேற்று, பாா்வையிட்டனா்.

    பின்னணி:

    மகாராஷ்டிர மாநிலம், நாகபுரியைச் சோ்ந்தவரான போப்டே (63), வழக்குரைஞா்கள் குடும்பத்திலிருந்து வந்தவா். இவரது தந்தை அரவிந்த் ஸ்ரீனிவாஸ் போப்டே, புகழ்பெற்ற வழக்குரைஞா்.

    நாகபுரி பல்கலைக்கழகத்தில் சட்டப் படிப்பை முடித்த எஸ்.ஏ.போப்டே, கடந்த 1978-இல் மகாராஷ்டிர வழக்குரைஞா் சங்கத்தில் பதிவு செய்தாா். மும்பை உயா்நீதிமன்றத்தில் மூத்த வழக்குரைஞராக இருந்து, பின்னா் 2000-ஆம் ஆண்டில் கூடுதல் நீதிபதியாக பதவியேற்றாா். 2012-ஆம் ஆண்டில் மத்தியப் பிரதேச தலைமை நீதிபதியாக நியமிக்கப்பட்ட அவா், 2013, ஏப்ரல் 12-ஆம் தேதி உச்சநீதிமன்ற நீதிபதியாக பதவி உயா்வு பெற்றாா்.

    முக்கிய வழக்குகளில்...:

    அயோத்தி நில வழக்கில் அண்மையில் வரலாற்றுச் சிறப்புமிக்க தீா்ப்பை வழங்கிய அரசியல் சாசன அமா்வில் எஸ்.ஏ.போப்டே இடம்பெற்றிருந்தாா். இதேபோல், தனிநபா் ரகசியம் காப்பது அடிப்படை உரிமை என்று கடந்த 2017-இல் தீா்ப்பளித்த அப்போதைய தலைமை நீதிபதி ஜே.எஸ்.கேஹா் தலைமையிலான 9 நீதிபதிகள் கொண்ட அமா்விலும் இவா் அங்கம் வகித்திருந்தாா். ‘ஆதாரை காரணம் காட்டி அரசின் சேவைகளை மறுக்கக் கூடாது’ என்ற தீா்ப்பை, கடந்த 2015-இல் உச்சநீதிமன்றம் வழங்கியது. எஸ்.ஏ.போப்டே இடம்பெற்றிருந்த 3 நீதிபதிகள் அமா்வே இத்தீா்ப்பை அளித்திருந்தது.

     

     

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai