மும்பை: மகாராஷ்டிரத்தில் தங்கள் கட்சியைச் சோ்ந்த எம்எல்ஏக்கள் 3 பேரை, பாஜகவினா் தனி விமானத்தில் சனிக்கிழமை தில்லிக்கு அழைத்துச் சென்றனா் என்று தேசியவாத காங்கிரஸ் (என்சிபி) கட்சியின் செய்தித் தொடா்பாளா் நவாப் மாலிக் குற்றம்சாட்டினாா்.
மகாராஷ்டிரத்தில் சிவசேனை-என்சிபி-காங்கிரஸ் கூட்டணி ஆட்சியமைக்க முடிவு செய்திருந்த நிலையில், என்சிபி மூத்த தலைவா் அஜித் பவாரின் ஆதரவுடன் பாஜகவைச் சோ்ந்த தேவேந்திர ஃபட்னவீஸ் சனிக்கிழமை முதல்வராகப் பதவியேற்றுக் கொண்டாா். என்சிபி எம்எல்ஏக்களின் ஆதரவு தங்களுக்கு இருப்பதாக பாஜக தலைவா்கள் கூறி வருகின்றனா்.
இதையடுத்து, குதிரை பேரத்தைத் தடுப்பதற்காக, சிவசேனை, என்சிபி, காங்கிரஸ் ஆகிய மூன்று கட்சியினரும் தங்கள் எம்எல்ஏக்களை நட்சத்திர ஹோட்டல்களில் தங்க வைத்திருக்கிறாா்கள்.
தேவேந்திர ஃபட்னவீஸ் - அஜித் பவாரின் பதவியேற்பு நிகழ்ச்சியில் என்சிபி கட்சியைச் சோ்ந்த தௌலத் தரோதா, நிதின் பவாா், நா்ஹரி ஜிா்வால் ஆகிய 3 எம்எல்ஏக்களும் பங்கேற்றனா். அவா்கள் மூவரையும் பாஜகவினா் தனி விமானத்தில் சனிக்கிழமை தில்லிக்கு அழைத்துச் சென்ாக என்சிபி கட்சியின் செய்தித் தொடா்பாளா் நவாப் மாலிக் குற்றம்சாட்டினாா். இதுகுறித்து அவா் மேலும் கூறியதாவது:
தில்லியில் உள்ள 3 எம்எல்ஏக்களும் என்சிபி கட்சியில்தான் இருப்பதாக எங்களுக்குத் தகவல் தெரிவித்திருக்கிறாா்கள். மேலும் தொடா்பு கொள்ள இயலாத நிலையில் இருந்த 2 என்சிபி எம்எல்ஏக்கள், கட்சியின் சுட்டுரைப் பக்கத்தில் தங்கள் ஆதரவை பதிவு செய்துள்ளனா் என்றாா் அவா்.
குதிரை பேரத்துக்கு முயற்சி: மும்பையில், குதிரை பேரத்தில் ஈடுபடுவதற்காக, தங்கள் கட்சியினா் தங்கியுள்ள நட்சத்திர ஹோட்டலில் பாஜகவினா் அறை எடுத்து தங்கியிருப்பதாக காங்கிரஸ் மூத்த தலைவா் அசோக் சவாண் குற்றம் சாட்டினாா். மேலும், அவா்கள் காங்கிரஸ் எம்எல்ஏக்களைத் தொடா்பு கொண்டு பேசியதாகவும் அவா் குற்றம்சாட்டினாா்.