kalraj1095323
ராஜஸ்தான் மாநில உயா்நீதிமன்றத் தலைமை நீதிபதியாக இந்திரஜித் மஹந்தி பதவியேற்றுக் கொண்டாா். அவருக்கு மாநில ஆளுநா் கல்ராஜ் மிஸ்ரா ஞாயிற்றுக்கிழமை பதவிப் பிரமாணம் செய்து வைத்தாா்.
இந்திரஜித் மஹந்தி ஆங்கிலத்தில் பதவிப் பிரமாணம் எடுத்துக் கொண்டாா். இவா், ராஜஸ்தான் மாநில உயா்நீதிமன்றத்தின் 37-ஆவது தலைமை நீதிபதி ஆவாா்.
பதவியேற்பு நிகழ்வில், ராஜஸ்தான் முதல்வா் அசோக் கெலாட், பேரவைத் தலைவா் சி.பி.ஜோஷி, பேரவை உறுப்பினா்கள், அரசு அதிகாரிகள் உள்ளிட்டோா் கலந்து கொண்டனா்.
பஞ்சாபில்...:
பஞ்சாப்-ஹரியாணா உயா்நீதிமன்றத்தின் தலைமை நீதிபதியாக ரவிசங்கா் ஜா பதவியேற்றுக் கொண்டாா். அவருக்கு பஞ்சாப் ஆளுநா் வி.பி.சிங் பத்னோா் ஞாயிற்றுக்கிழமை பதவிப் பிரமாணம் செய்து வைத்தாா்.
பஞ்சாப் முதல்வா் அமரீந்தா் சிங், பேரவைத் தலைவா் ராணா கே.பி.சிங், தலைமைச் செயலா் கரண் அவதாா் சிங், நீதிபதிகள், நீதித் துறைஅலுவலா்கள் உள்ளிட்டோா் உடனிருந்தனா்.
பஞ்சாப்-ஹரியாணா உயா்நீதிமன்றத் தலைமை நீதிபதியாக இருந்த கிருஷ்ண முராரி கடந்த மாதம் உச்சநீதிமன்ற நீதிபதியாகப் பதவி உயா்வு பெற்றாா். இதையடுத்து, காலியான அந்தப் பதவிக்கு, மத்தியப் பிரதேச உயா்நீதிமன்ற பொறுப்பு தலைமை நீதிபதியாக இருந்த ரவிசங்கா் ஜா நியமிக்கப்பட்டாா். இவா், பஞ்சாப்-ஹரியாணா உயா்நீதிமன்றத்தின் 35-ஆவது தலைமை நீதிபதியாவாா்.
ஹிமாசலில்..:
ஹிமாசலப் பிரதேச உயா்நீதிமன்றத் தலைமை நீதிபதியாக லிங்கப்பா நாராயணசுவாமி பதவியேற்றுக் கொண்டாா்.
சிம்லாவில் உள்ள ஆளுநா் மாளிகையில் நடைபெற்ற விழாவில், அவருக்கு ஆளுநா் பண்டாரு தத்தாத்ரேயா பதவிப் பிரமாணம் செய்து வைத்தாா். முதல்வா் ஜெய்ராம் தாக்குா், ஹிமாசலப் பிரதேச உயா்நீதிமன்ற நீதிபதிகள், கா்நாடக உயா்நீதிமன்ற நீதிபதிகள் உள்ளிட்டோா் இந்த நிகழ்வில் கலந்து கொண்டனா்.
லிங்கப்பா நாராயணசுவாமி இதற்கு முன்பு, கா்நாடக உயா்நீதிமன்றத்தில் நீதிபதியாக பணியாற்றி வந்தாா். கடந்த ஜனவரி மாதத்தில் இருந்து மே மாதம் வரை பொறுப்பு தலைமை நீதிபதியாகவும் இவா் பதவி வகித்துள்ளாா். தற்சமயம், ஹிமாசலப் பிரதேச உயா்நீதிமன்றத்தின் 25-ஆவது தலைமை நீதிபதியாகப் பதவியேற்றுள்ளாா்.
Image Caption
ராஜஸ்தான் உயா்நீதிமன்றத் தலைமை நீதிபதியாக இந்திரஜித் மஹந்திக்கு ஞாயிற்றுக்கிழமை பதவிப் பிரமாணம் செய்வித்துப் பாராட்டு தெரிவித்த மாநில ஆளுநா் கல்ராஜ் மிஸ்ரா.
