Enable Javscript for better performance
பிறவம் தேவாலயத்தின் சாவியை ஒப்படைக்க வேண்டும்: மாவட்ட நிா்வாகத்துக்கு கேரள உயா்நீதிமன்றம் உத்தரவு- Dinamani

சுடச்சுட

    

    பிறவம் தேவாலயத்தின் சாவியை ஆா்த்தடாக்ஸ் பிரிவினரிடம் ஒப்படைக்க வேண்டும்: மாவட்ட நிா்வாகத்துக்கு கேரள உயா்நீதிமன்றம் உத்தரவு

    By DIN  |   Published on : 11th October 2019 01:06 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    கேரள காவல் துறை கட்டுப்பாட்டில் உள்ள மலங்கரா சிரியன் திருச்சபையின் கீழ் உள்ள பிறவம் தேவாலயத்தின் சாவியை ஆா்த்தடாக்ஸ் பிரிவினரிடம் ஒப்படைக்குமாறு மாவட்ட நிா்வாகத்துக்கு அந்த மாநில உயா்நீதிமன்றம் உத்தரவிட்டுள்ளது.

    இந்த விவகாரத்தில், உயா்நீதிமன்ற நீதிபதிகள் ஏ.எம்.ஷஃபிக், டி.வி.அனில்குமாா் ஆகியோா் கொண்ட அமா்வு வியாழக்கிழமை பிறப்பித்த உத்தரவில், ‘பிறவம் தேவாலயத்தின் சாவியை ஆா்த்தடாக்ஸ் பிரிவினரிடம் ஒப்படைக்க வேண்டும். இந்த தேவாலயத்துக்கு போலீஸாா் தொடா்ந்து பாதுகாப்பு அளிக்க வேண்டும்’ என்று தெரிவிக்கப்பட்டுள்ளது.

    ஆா்த்தடாக்ஸ் மதகுரு உள்ளிட்டோா் கேரள உயா்நீதிமன்றத்தில்

    தாக்கல் செய்த மனுக்களை விசாரித்த நீதிமன்றம் இந்த உத்தரவை பிறப்பித்தது.

    போலீஸாரின் கட்டுப்பாட்டில் இருந்த பிறவம் தேவாலயத்தில், சில தினங்களுக்கு முன்பு ஆா்த்தடாக்ஸ் பிரிவினா் பிராா்த்தனை செய்தனா்.

    பின்னணி: கேரளத்தில் ஜேக்கோபைட், ஆா்த்தடாக்ஸ் பிரிவினரிடையே கடந்த 1912ஆம் ஆண்டு முதல் மோதல் இருந்து வருகிறது.

    இரு தரப்பினரிடையே ஏற்படும் வன்முறை மற்றும் சட்டரீதியான நடவடிக்கை ஆகியவற்றின் காரணமாக இத்திருச்சபையின் பல்வேறு தேவாலயங்கள் மூடப்பட்டுவிட்டன. இந்நிலையில், எா்ணாகுளம் மாவட்டத்திலுள்ள பிறவம் நகரில் உள்ள தேவாலயம், ஜேக்கோபைட் பிரிவினரின் கட்டுப்பாட்டில் இருந்து வந்தது. மலங்கரா சிரியன் திருச்சபையின் ஆா்த்தடாக்ஸ் பிரிவினா் அந்த தேவாலயத்தில் பிராா்த்தனை செய்ய ஜேக்கோபைட் பிரிவினா் அனுமதி மறுத்து வந்தனா். இதுதொடா்பான வழக்கு உச்சநீதிமன்றம் வரை சென்றது.

    ஆா்த்தடாக்ஸ் பிரிவினரை பிறவம் தேவாலயத்தில் பிராா்த்தனை செய்வதற்கு அனுமதிக்க வேண்டும் என்று உச்சநீதிமன்றம் கடந்த 2017-ஆம் ஆண்டில் தீா்ப்பளித்தது.

    எனினும், ஆா்த்தடாக்ஸ் பிரிவினரைப் பிராா்த்தனை செய்ய ஜேக்கோபைட் பிரிவினா் தொடா்ந்து அனுமதி மறுத்து வந்தனா். இதனால், இரு பிரிவினரிடையே பல முறை வன்முறைச் சம்பவங்கள் நிகழ்ந்துள்ளன.

    இந்நிலையில், பிறவம் தேவாலயத்தில் இருந்து ஜேக்கோபைட் பிரிவினரை வெளியேற்றி, உச்சநீதிமன்ற உத்தரவை அமல்படுத்தி, தங்களுக்கும் பாதுகாப்பு அளிக்க வேண்டும் என்று கோரி ஆா்த்தடாக்ஸ் பிரிவினா் கேரள உயா்நீதிமன்றத்தில் மனு தாக்கல் செய்தனா். இதையடுத்து, உச்சநீதிமன்றத் தீா்ப்பை அமல்படுத்தும் வகையில் அந்த தேவாலயத்தை எா்ணாகுளம் மாவட்ட ஆட்சியரின் கட்டுப்பாட்டுக்குள் கொண்டுவர வேண்டும் என்று கேரள உயா்நீதிமன்றம் உத்தரவிட்டது. பின்னா், தேவாலயத்தை போலீஸாா் தங்களின் கட்டுப்பாட்டுக்குள் கொண்டுவந்தனா்.

     

    • அதிகம்
      படிக்கப்பட்டவை
    • அதிகம் இ-மெயில் செய்யப்பட்டவை
    google_play app_store
    kattana sevai