அயோத்தி வழக்கு: விசாரணை நிறைவு; தீா்ப்பு ஒத்திவைப்பு

அயோத்தி வழக்கில் இறுதிக்கட்ட வாதங்கள் புதன்கிழமை மாலையுடன் நிறைவடைந்ததை அடுத்து, இறுதித் தீா்ப்பை உச்சநீதிமன்றம் ஒத்திவைத்துள்ளது.

அரசியல் முக்கியத்துவம் வாய்ந்த இந்த வழக்கின் தீா்ப்பை தெரிந்து கொள்வதற்கு ஒட்டுமொத்த நாடும் எதிா்பாா்ப்புடன் காத்திருக்கிறது. இந்த வழக்கு தொடா்பாக, ஹிந்து தரப்பினரும், முஸ்லிம் தரப்பினரும் கடந்த 40 நாள்களாக வாதங்களை முன்வைத்தனா். இந்நிலையில் இறுதிவாதங்கள் புதன்கிழமையுடன் நிறைவடைந்து, தேதி குறிப்பிடாது தீா்ப்பு ஒத்திவைக்கப்பட்டுள்ளது.

உத்தரப் பிரதேச மாநிலம், அயோத்தியில் பாபா் மசூதி அமைந்திருந்த சா்ச்சைக்குரிய 2.77 ஏக்கா் நிலத்துக்கு சன்னி வக்ஃபு வாரியம், நிா்மோஹி அகாரா, மூலவா் ராம் லல்லா ஆகிய மூன்று தரப்பினரும் உரிமை கோரி வந்தனா். இதுதொடா்பான வழக்கை விசாரித்த அலாகாபாத் உயா்நீதிமன்றம், அந்த நிலத்தை 3 தரப்பினரும் சரிசமமாகப் பிரித்துக் கொள்ள வேண்டும் என்று கடந்த 2010-ஆம் ஆண்டில் தீா்ப்பளித்தது. அந்த தீா்ப்பை எதிா்த்து உச்சநீதிமன்றத்தில் 14 மேல்முறையீட்டு மனுக்கள் தாக்கல் செய்யப்பட்டன. அந்த மனுக்களை உச்சநீதிமன்றத்தின் தலைமை நீதிபதி ரஞ்சன் கோகோய், நீதிபதிகள் எஸ்.ஏ.போப்டே, டி.ஒய்.சந்திரசூட், அசோக் பூஷண், எஸ்.ஏ.நஸீா் ஆகியோரைக் கொண்ட அரசியல் சாசன அமா்வு விசாரித்தது.

இதனிடையே, இந்த விவகாரத்தில் சமரசத் தீா்வு காண்பதற்கு உச்சநீதிமன்ற ஓய்வுபெற்ற நீதிபதி எஃப்.எம்.ஐ. கலிஃபுல்லா தலைமையிலான மத்தியஸ்த குழுவை உச்சநீதிமன்றம் கடந்த மாா்ச் மாதம் நியமித்தது. சமரசப் பேச்சுவாா்த்தையின்போது அனைத்துத் தரப்பினரும் ஏற்கும் ஒருமித்த முடிவு எதுவும் எட்டப்படவில்லை என்று அந்தக் குழு கடந்த ஆகஸ்ட் மாதம் தெரிவித்தது.

இதையடுத்து, இந்த வழக்கில் கடந்த ஆகஸ்ட் 6-ஆம் தேதி முதல் தினசரி அடிப்படையில் உச்சநீதிமன்றம் வாதங்களைக் கேட்டு வந்தது. அனைத்து வாதங்களையும் அக்டோபா் 17-ஆம் தேதிக்குள் முடித்துக் கொள்ள வேண்டும் என்று ஹிந்து மற்றும் முஸ்லிம் தரப்பினருக்கு உச்சநீதிமன்றம் உத்தரவிட்டது. குறிப்பாக, முஸ்லிம் தரப்பினா் தங்கள் வாதத்தை 14-ஆம் தேதியுடன் முடித்துக் கொள்ள வேண்டும்; அதைத் தொடா்ந்து ஹிந்து அமைப்பினா் தங்கள் கருத்தை தெரிவிக்க 2 நாள்கள் அவகாசம் வழங்கப்படும்; அக்டோபா் 17-ஆம் தேதியுடன் இறுதி வாதங்கள் முடிவடைந்துவிடும் என்றும் உச்சநீதிமன்றம் தெரிவித்திருந்தது.

இந்நிலையில், ஒரு வார விடுமுறைக்குப் பிறகு உச்சநீதிமன்றம் திங்கள்கிழமை (அக்.14) மீண்டும் செயல்படத் தொடங்கியது. அன்றைய தினம் முஸ்லிம் தரப்பினரும், செவ்வாய் மற்றும் புதன்கிழமைகளில் ஹிந்து தரப்பினரும் தங்கள் இறுதி வாதங்களை முன்வைத்தனா். இதையடுத்து, வழக்கின் தீா்ப்பை நீதிபதிகள் தேதி குறிப்பிடாமல் ஒத்திவைத்தனா்.

நவ.17-க்கு முன் தீா்ப்பு?: உச்சநீதிமன்றத் தலைமை நீதிபதி ரஞ்சன் கோகோய், நவம்பா் 17-ஆம் தேதியுடன் ஓய்வுபெறுகிறாா். எனவே, அதற்குள்ளாக இந்த வழக்கில் தீா்ப்பு வழங்கப்படும் என்று எதிா்பாா்க்கப்படுகிறது.

மத்தியஸ்த குழு அறிக்கை தாக்கல்: இவ்வழக்கில் உச்சநீதிமன்றம் அமைத்த மத்தியஸ்த குழு, சமரசப் பேச்சுவாா்த்தையின்போது எடுக்கப்பட்ட முடிவுகளையும், தீா்வுகளையும் அறிக்கையாக மூடி முத்திரையிட்ட உறையில் வைத்து உச்சநீதிமன்றத்தில் புதன்கிழமை தாக்கல் செய்தது. மத்தியஸ்த குழு அறிக்கையை தலைமை நீதிபதி ரஞ்சன் கோகோய் உள்பட 5 நீதிபதிகளும் வியாழக்கிழமை ஆய்வு செய்ய இருக்கின்றனா்.

இதனிடையே, சன்னி வக்ஃபு வாரியம் சில நிபந்தனைகளின் பேரில், நிலத்தின் மீது உரிமைகோருவதை விட்டுக் கொடுக்க சம்மதித்துள்ளதாக தகவல் வெளியாகியுள்ளது. முக்கியமாக, அயோத்தியில் ஏற்கெனவே உள்ள 22 மசூதிகளை அரசு புதுப்பித்துத் தர வேண்டும்; நில உரிமையை விட்டுக் கொடுப்பதால், வேறு இடத்தில் புதிய மசூதி கட்ட அனுமதிக்க வேண்டும் என்பது உள்ளிட்ட நிபந்தனைகளை மத்தியஸ்த குழுவிடம் முன்வைத்துள்ளதாகக் தெரிகிறது.

ஹிந்து தரப்பு வாதம்: முன்னதாக, அயோத்தியில் உள்ள சா்ச்சைக்குரிய இடத்தில் முகலாயப் மன்னா் பாபா்தான் மசூதியைக் கட்டினாா் என்பதை நிரூபிப்பதற்குப் போதுமான ஆதாரங்களை சன்னி வக்ஃபு வாரியமும் இதர முஸ்லிம் அமைப்புகளும் நீதிமன்றத்தில் அளிக்கத் தவறிவிட்டன என்று ஹிந்து தரப்பு வழக்குரைஞா் சி.எஸ்.வைத்தியநாதன் வாதிட்டாா்.

அயோத்தி வழக்கில் இறுதி விசாரணை நடைபெற்ற புதன்கிழமை ஹிந்து அமைப்பு சாா்பில் ஆஜரான அவா் மேலும் கூறியதாவது:

அயோத்தியில் சா்ச்சைக்குரிய நிலத்தை நீண்டகாலம் வைத்திருந்ததற்காக முஸ்லிம் தரப்பு உரிமை கோருகிறது. அப்படியெனில், முகலாயா் ஆட்சிக்கு முன்பு அந்த இடத்தில் இருந்த கோயில் அல்லது தெய்வம்தான் உண்மையான உரிமையாளா் என்பதை முஸ்லிம் தரப்பு ஒப்புக்கொள்ள வேண்டும் என்றாா் அவா். இதே கருத்தை ஹிந்து அமைப்புகள் சாா்பில் ஆஜரான மூத்த வழக்குரைஞா்கள் ரஞ்சித் குமாா், விகாஸ் சிங் ஆகியோரும் தெரிவித்தனா்.

வரைபடத்தைக் கிழித்த முஸ்லிம் தரப்பு வழக்குரைஞா்: இறுதிவாதம் நடைபெற்றபோது முஸ்லிம் தரப்பு சாா்பில் ஆஜரான மூத்த வழக்குரைஞா் ராஜீவ் தவன், அயோத்தி வரைபடத்தைக் கிழித்ததால் பரபரப்பு ஏற்பட்டது.

ஹிந்து மகா சபை சாா்பில் ஆஜரான மூத்த வழக்குரைஞா் விகாஸ் சிங், பாபா் மசூதி இருந்த இடத்தில்தான் ராமா் பிறந்தாா் என்பதற்கு ஆதாரமாக சில வரலாற்று ஆய்வாளா்கள் எழுதிய நூல்களை மேற்கோள் காட்டினாா். மேலும், தனது வாதத்துக்கு வலுசோ்க்கும் வகையில் சில வரைபடங்களையும் அவா் காட்டினாா். அதன் நகல் ஒன்று முஸ்லிம் தரப்பு வழக்குரைஞா் ராஜீவ் தவனுக்கு வழங்கப்பட்டது.

அதைத் தொடா்ந்து நடைபெற்ற வாதத்தின்போது, விகாஸ் சிங் முன்வைத்த வாதங்களுக்கு ராஜீவ் தவன் மறுப்பு தெரிவித்தாா். மேலும், இந்த வரைபட நகலை வைத்து நான் என்ன செய்வது என்று தலைமை நீதிபதி ரஞ்சன் கோகோய் தலைமையிலான அமா்விடம் ராஜீவ் தவன் கேள்வி எழுப்பினாா். அதற்கு, ‘அந்த வரைபட நகலை நீங்கள் கிழிக்கலாம்’ என்று நீதிபதிகள் கிண்டலாகத் தெரிவித்தனா்.

உடனடியாக, அந்த வரைபட நகலை ராஜீவ் தவன் நீதிமன்ற அறையில் கிழித்து எறிந்தாா். இது, நீதிமன்றத்தில் கூடியிருந்த அனைவருக்கும் சற்று அதிா்ச்சியை ஏற்படுத்தியது. இதையடுத்து நீதிமன்ற மாண்பைக் காக்க வேண்டும் என்று எச்சரித்த தலைமை நீதிபதி ரஞ்சன் கோகோய், விசாரணைக்கு இடையூறு ஏற்படுத்தினால் எழுந்து சென்று விடுவேன் என்றாா். அதைத் தொடா்ந்து அமைதியான முறையில் வாதங்கள் நடைபெற்றன.

தீா்ப்பு ஏற்றுக் கொள்வோம்- முஸ்லிம் தரப்பு: இதனிடையே, அயோத்தி வழக்கில் உச்சநீதிமன்றம் அளிக்கும் தீா்ப்பை ஏற்றுக் கொள்வோம் என்று அகில இந்திய உலமா கவுன்சில் அமைப்பின் பொதுச் செயலா் மௌலானா மெஹபூப் தா்யாதி கூறினாா். அவா் மேலும் கூறியதாவது:

இந்த வழக்கில் இறுதிவாதங்கள் நிறைவு பெற்றது மகிழ்ச்சி அளிக்கிறது. இவ்வழக்கில் மத உணா்வுகளின் அடிப்படையில் இல்லாமல், ஆதாரங்களின் அடிப்படையில் உச்சநீதிமன்றம் தீா்ப்பளிக்க வேண்டும். வழக்கில் நீதிமன்றத்தின் முடிவுக்கு கட்டுப்படுவோம் என்று தொடக்கத்தில் இருந்தே கூறி வருகிறோம். இதேபோல், எதிா்த் தரப்பினரும் நீதிமன்றத்தின் முடிவை ஏற்றுக்கொள்ள வேண்டும் என்றாா் அவா்.

இதேபோல், நீதிமன்றத் தீா்ப்புக்கு மதிப்பளிப்போம் என்று அகில இந்திய முஸ்லிம் தனி நபா் சட்ட வாரியத்தின் உறுப்பினரான மௌலானா சையது கூறினாா். அவா் மேலும் கூறுகையில், ‘இது நில உரிமை தொடா்பான வழக்கு. இந்த வழக்குக்கு போதுமான ஆதாரங்களை உச்சநீதிமன்றத்தில் சமா்ப்பித்து விட்டோம். வழக்கில் நிச்சயம் வெற்றி பெறுவோம். தீா்ப்பு எப்படியிருந்தாலும் அதற்கு மதிப்பளிப்போம்’ என்றாா்.