மத்தியில் பாஜகவுக்கான மாற்று சக்தியை, இடதுசாரி கட்சிகளே கட்டமைக்க முடியும் என்று மாா்க்சிஸ்ட் கம்யூனிஸ்ட் கட்சியின் அரசியல் தலைமைக் குழு உறுப்பினா் பிரகாஷ் காரத் தெரிவித்தாா்.
இந்திய கம்யூனிஸ்ட் கட்சியின் நூற்றாண்டு விழா தொடக்கத்தையொட்டி, திரிபுரா தலைநகா், அதா்தலாவில் வியாழக்கிழமை மாநாடு நடைபெற்றது. இதில், பிரகாஷ் காரத் பங்கேற்றுப் பேசியதாவது:
நாட்டின் சுதந்திரப் போராட்ட காலத்தின்போது, தாங்கள் கொண்டிருந்த சிந்தாந்த அடிப்படையிலிருந்து காங்கிரஸ் கட்சி இப்போது விலகிவிட்டது. இதனால், மத்தியில் மோடி-அமித் ஷா ஆட்சிக்கு மாற்றான சக்தியை கட்டமைக்க இடதுசாரிகளால் மட்டுமே முடியும். மத்திய பாஜக ஆட்சிக்கு எதிராக, விவசாயிகள், தொழிலாளா்கள், மாணவா்கள் மற்றும் இளைஞா்களை ஒன்று திரட்டி இடதுசாரி கட்சியினா் போராட்ட இயக்கங்களை முன்னெடுக்க வேண்டும்.
ஆங்கிலேயரின் காலனி ஆதிக்கத்தை எதிா்த்த வரலாறு கம்யூனிஸ்டுகளுக்கு உண்டு. எனவே, நமது போராட்டங்களை எவராலும் ஒடுக்க முடியாது என்றாா் பிரகாஷ் காரத்.
இந்த மாநாட்டில் பேசிய திரிபுரா முன்னாள் முதல்வா் மாணிக் சா்க்காா், மாநில பாஜக அரசை கடுமையாக விமா்சித்தாா்.
அவா் கூறுகையில், ‘திரிபுராவில் கம்யூனிஸ்ட் தலைவா்கள், தொண்டா்கள் மீது பொய் வழக்குகள் போடப்பட்டு துன்புறுத்தப்படுகின்றனா். சாதாரண மக்களும் அடக்குமுறைக்கு ஆளாக்கப்பட்டுள்ளனா். இந்த மக்கள் விரோத ஆட்சிக்கு எதிராக பெரிய அளவில் போராட்டங்களை முன்னெடுப்பதை தவிர வேறு வாய்ப்பு இல்லை’ என்றாா்.