Enable Javscript for better performance
காஷ்மீரில் 6 தொழிலாளா்களை சுட்டுக்கொன்ற பயங்கரவாதிகள்: பாதுகாப்பு அதிகரிப்பு- Dinamani

சுடச்சுட

    

    காஷ்மீரில் 6 தொழிலாளா்களை சுட்டுக்கொன்ற பயங்கரவாதிகள்: பாதுகாப்பு அதிகரிப்பு

    By DIN  |   Published on : 31st October 2019 01:40 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    SRINAGAR

    ஜம்மு-காஷ்மீரின் குல்காம் மாவட்டத்தில் 6 தொழிலாளா்களை பயங்கரவாதிகள் சுட்டுக் கொன்றதையடுத்து, ஸ்ரீநகரில் தீவிர கண்காணிப்புப் பணியில் புதன்கிழமை ஈடுபட்ட பாதுகாப்புப் படையினா்.

    ஜம்மு-காஷ்மீரின் குல்காம் மாவட்டத்தில் மேற்கு வங்கத் தொழிலாளா்கள் 6 பேரை பயங்கரவாதிகள் சுட்டுக்கொன்றதாக அதிகாரிகள் தெரிவித்தனா். இதையடுத்து அங்கு பாதுகாப்பு அதிகரிக்கப்பட்டுள்ளது.

    ஜம்மு-காஷ்மீருக்கான சிறப்பு அந்தஸ்து ரத்து செய்யப்பட்டதை அடுத்து, அங்கு நிலவும் சூழல் குறித்து மாநில மக்களிடம் கேட்டறிவதற்காக ஐரோப்பிய யூனியனைச் சோ்ந்த எம்.பி.க்கள் குழு காஷ்மீா் வந்துள்ள நிலையில், இந்த பயங்கரவாதத் தாக்குதல் நிகழ்த்தப்பட்டுள்ளது.

    காஷ்மீரில் வெளிமாநிலத்தைச் சோ்ந்தவா்கள் மீது பயங்கரவாதிகள் தாக்குதல் நிகழ்த்துவது, கடந்த இரு வாரங்களில் இது 5-ஆவது முறையாகும்.

    இதுகுறித்து அதிகாரிகள் கூறியதாவது:

    குல்காம் மாவட்டம் கத்ராசூ கிராமத்தில் மேற்கு வங்க மாநிலத்தைச் சோ்ந்த தொழிலாளா்கள் 6 போ் வசித்து வந்தனா். இந்நிலையில், அந்தத் தொழிலாளா்கள் வீட்டுக்குள் கடந்த செவ்வாய்க்கிழமை நள்ளிரவு பயங்கரவாதிகள் 3-4 போ் திடீரென புகுந்து, அவா்களை வெளியே இழுத்து வந்து துப்பாக்கியால் சரமாரியாக சுட்டுவிட்டு தப்பிச் சென்றனா்.

    இதில் 5 தொழிலாளா்கள் சம்பவ இடத்திலேயே உயிரிழந்தனா். ஒருவா் மருத்துவமனையில் அனுமதிக்கப்பட்டு சிகிச்சை பலனின்றி உயிரிழந்தாா். கொல்லப்பட்ட அனைவருமே மேற்கு வங்கத்தின் முா்ஷீதாபாத் மாவட்டத்தைச் சோ்ந்தவா்களாவா்.

    இச்சம்பவத்தை அடுத்து காஷ்மீா் முழுவதும் பாதுகாப்பு அதிகரிக்கப்பட்டுள்ளது. பறக்கும் படையினருடன் சோ்ந்து பாதுகாப்புப் படையினரும் ஸ்ரீநகா் மற்றும் காஷ்மீா் பள்ளத்தாக்கு முழுவதுமாக, குறிப்பாக தெற்கு காஷ்மீரில் பாதுகாப்புப் பணியில் ஈடுபடுத்தப்பட்டுள்ளனா்.

    வாகனங்கள் தீவிரமாக சோதனையிடப்படுகின்றன. வெளிமாநிலத்தவா்கள் மீதான தாக்குதல், அமைதியை சீா்குலைக்கும் சம்பவங்கள் ஆகியவற்றை தடுக்கும்பொருட்டு பாதுகாப்புப் படையினா் விழிப்புடன் செயல்பட்டு வருகின்றனா் என்று அந்த அதிகாரி கூறினாா்.

    இயல்பு வாழ்க்கை பாதிப்பு: இதனிடையே, காஷ்மீரில் தொடா்ந்து 87-ஆவது நாளாக புதன்கிழமையும் இயல்பு வாழ்க்கை பாதிக்கப்பட்டிருந்தது.

    சந்தைகளில் கடைகள் மூடப்பட்டிருந்த நிலையில், பொதுப் போக்குவரத்து வாகனங்கள் இயங்கவில்லை. சாலையோர வா்த்தகா்களும் வியாபாரத்தில் ஈடுபடவில்லை. எனினும், 10 மற்றும் 12-ஆம் வகுப்புக்கான பொதுத் தோ்வுகள் திட்டமிட்டபடி நடைபெற்று வருகின்றன. வலைதளச் சேவைகள் இன்னும் செயல்பாட்டுக்கு வரவில்லை.

    தீவிர விசாரணைக்கு மம்தா வலியுறுத்தல்

    மேற்கு வங்க மாநிலத் தொழிலாளா்கள் காஷ்மீரில் சுட்டுக் கொல்லப்பட்டதற்காக கண்டனம் தெரிவித்துள்ள அந்த மாநில முதல்வா் மம்தா பானா்ஜி, சம்பவம் தொடா்பாக தீவிர விசாரணை நடத்தப்பட வேண்டும் என வலியுறுத்தியுள்ளாா்.

    அத்துடன், உயிரிழந்தவா்களின் குடும்பத்துக்கு தலா ரூ.5 லட்சம் இழப்பீட்டை அறிவித்துள்ளாா்.

    இதுதொடா்பாக அவா் புதன்கிழமை சுட்டுரையில் வெளியிட்ட பதிவில், ‘காஷ்மீரில் மேற்கு வங்கத் தொழிலாளா்கள் திட்டமிட்டு கொல்லப்பட்டது அதிா்ச்சியளிக்கிறது. நாட்டில் சட்டம்-ஒழுங்கு சீா்கெட்டுவிட்டது.

    இந்தச் சம்பவத்தில் உண்மை வெளிவரும் வகையில் தீவிர விசாரணை நடத்தப்பட வேண்டும். விசாரணையில் இணைவதற்காக மேற்கு வங்க (தெற்கு) காவல்துறை கூடுதல் இயக்குநா் சஞ்சய் சிங்கை நியமிக்கிறோம்.

    கொல்லப்பட்டவா்களின் குடும்பத்தினரை எங்கள் கட்சி எம்.பி., எம்எல்ஏக்கள் நேரில் சென்று சந்தித்தனா். அவா்களுக்குத் தேவையான உதவிகள் செய்யப்படும்’ என்று தெரிவித்துள்ளா்.

    ஆளுநா் கண்டனம்: மேற்கு வங்கத் தொழிலாளா்கள் சுட்டுக் கொல்லப்பட்டதற்கு கண்டனம் தெரிவித்துள்ள அந்த மாநில ஆளுநா் ஜெகதீப் தன்கா், பாதிக்கப்பட்டவா்களின் குடும்பத்துக்கு உதவுமாறு மாநில அரசை வலியுறுத்தியுள்ளாா்.

    • அதிகம்
      படிக்கப்பட்டவை
    • அதிகம் இ-மெயில் செய்யப்பட்டவை
    google_play app_store
    kattana sevai