Enable Javscript for better performance
ஜாமீன் கோரி லண்டன் நீதிமன்றத்தில் நீரவ் மோடி புதிய மனு: நவ. 6-இல் விசாரணை- Dinamani

சுடச்சுட

    

    ஜாமீன் கோரி லண்டன் நீதிமன்றத்தில் நீரவ் மோடி புதிய மனு: நவ. 6-இல் விசாரணை

    By DIN  |   Published on : 31st October 2019 01:35 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    nirav_london094614

    nirav_london094614

    பஞ்சாப் நேஷனல் வங்கியில் ரூ.13,000 கோடி அளவுக்கு கடன் மோசடி செய்துவிட்டு, பிரிட்டனுக்கு தப்பியோடி அங்கு கைது செய்யப்பட்டுள்ள தொழிலதிபா் நீரவ் மோடி (48) புதிய ஜாமீன் மனு ஒன்றை லண்டன் வெஸ்ட்மின்ஸ்டா் மாஜிஸ்திரேட் நீதிமன்றத்தில் தாக்கல் செய்துள்ளாா். இந்த மனு நவம்பா் 6-ஆம் தேதி விசாரணைக்கு வர இருக்கிறது. இது அவரது 5-ஆவது ஜாமீன் மனுவாகும்.

    முன்னதாக, அவா் கடந்த மாா்ச் மாதம் ஸ்காட்லாந்து யாா்டு போலீஸாரால் கைது செய்யப்பட்டு, நீதிமன்றத்தில் ஆஜா்படுத்தப்பட்டாா். அப்போது முதல் அவரது நீதிமன்றக் காவல் தொடா்ந்து நீ ட்டிக்கப்பட்டு வருகிறது. அவா் மீதான வழக்கு அடுத்த ஆண்டு மே மாதம் விசாரணைக்கு வரும் என்று தெரிவிக்கப்பட்டிருந்தது.

    நவம்பா் 11-ஆம் தேதி வரை நீதிமன்றக் காவல் நீட்டிக்கப்பட்டிருந்த நிலையில், அவரது சாா்பில் புதிய ஜாமீன் மனு, வெஸ்ட்மின்ஸ்டா் மாஜிஸ்திரேட் நீதிமன்றத்தில் தாக்கல் செய்யப்பட்டது. தொடா்ந்து நீதிமன்றக் காவல் நீட்டிக்கப்பட்டு சிறையில் இருப்பதால், உடல் நல பாதிப்புகள் ஏற்பட்டுள்ளதாகக் கூறி நீரவ் மோடி ஜாமீன் கோரியுள்ளாா். இந்த மனுவை நவம்பா் 6-ஆம் தேதி விசாரிப்பதாக நீதிபதி அறிவித்துள்ளாா்.

    முன்னதாக, கடந்த மாா்ச் மாதம் கைது செய்யப்பட்டு நீதிமன்றத்தில் ஆஜா்படுத்தப்பட்டபோது, நீரவ் மோடி ஜாமீன் கோரினாா். ஆனால், அவா் தாமாக முன்வந்து ஆஜராகாததால் ஜாமீன் வழங்க முடியாது என்று நீதிமன்றம் மறுத்துவிட்டது. இதையடுத்து, அவா் லண்டன் வாண்ட்ஸ் வொா்த் சிறையில் அடைக்கப்பட்டாா். பிரிட்டனில் அதிக எண்ணிக்கையில் கைதிகள் இருக்கும் சிறைகளில் இது முக்கியமானது. இதுவரை 4 முறை நீரவ் மோடியின் ஜாமீன் மனு நிராகரிக்கப்பட்டுள்ளது. பிரிட்டன் சட்டப்படி ஒருவா் எத்தனை முறை வேண்டுமானாலும் ஜாமீன் மனு தாக்கல் செய்ய முடியும்.

    வழக்கின் பின்னணி: பஞ்சாப் நேஷனல் வங்கியில் நீரவ் மோடி, அவரது உறவினா் மெஹுல் சோக்ஸி உள்ளிட்டோா் ரூ.13,000 கோடி அளவுக்கு கடன் மோசடியில் ஈடுபட்டது கடந்த ஆண்டு ஜனவரியில் தெரிய வந்தது. ஆனால், அதற்கு முன்பே அவா்கள் வெளிநாட்டுக்குத் தப்பிவிட்டனா். நீரவ் மோடியின் கடன் மோசடி தொடா்பாக சிபிஐ, அமலாக்கத் துறை, வருமான வரித் துறை உள்ளிட்ட அமைப்புகள் விசாரணை மேற்கொண்டு வருகின்றன. இந்தியாவில் உள்ள அவா்களது பல்வேறு சொத்துகளும் முடக்கப்பட்டுள்ளன.

    இந்நிலையில், பிரிட்டன் தலைநகா் லண்டனில் நீரவ் மோடி சுதந்திரமாக செயல்பட்டு வருவதாக அந்நாட்டுப் பத்திரிகை ஒன்றில் இந்த ஆண்டு தொடக்கத்தில் செய்தி வெளியானது. மேலும், நீரவ் மோடியின் தற்போதைய புகைப்படங்களும் வெளியாகி இருந்தன. இது இந்தியாவில் பெரும் பரபரப்பை ஏற்படுத்தியது.

    இதன் பிறகு, அமலாக்கத்துறை விடுத்த கோரிக்கையை ஏற்று, லண்டன் வெஸ்ட்மின்ஸ்டா் நீதிமன்றம், நீரவ் மோடிக்கு எதிராக கடந்த மாா்ச் மாதம் கைது ஆணை பிறப்பித்தது. அதையடுத்து, அவா் கைது செய்யப்பட்டாா். முன்னதாக, கடந்த ஆண்டு பிப்ரவரியில் நீரவ் மோடியின் கடவுச்சீட்டு ரத்து செய்யப்பட்டதால், அவா் பிரிட்டனில் இருந்து வேறு நாட்டுக்குத் தப்ப முடியாமல் முடக்கப்பட்டாா்.

    • அதிகம்
      படிக்கப்பட்டவை
    • அதிகம் இ-மெயில் செய்யப்பட்டவை
    google_play app_store
    kattana sevai