திருவனந்தபுரம்: கேரள மாநிலம், பாலக்காடு மாவட்டத்தில் பாலியல் வன்கொடுமைக்குள்ளான 2 தலித் சிறுமிகள் தற்கொலை செய்து கொண்ட சம்பவம் தொடா்பாக, சிபிஐ விசாரணை கோரி மாநில முதல்வா் பினராயி விஜயனை அந்த சிறுமிகளின் பெற்றோா் வியாழக்கிழமை சந்தித்துப் பேசினா்.
கேரளத் தலைநகா் திருவனந்தபுரத்தில் உள்ள சட்டப் பேரவை வளாகத்தில் இருக்கும் முதல்வா் அறையில் பினராயி விஜயனை அந்த சிறுமிகளின் பெற்றோா் வியாழக்கிழமை சந்தித்தனா். இவா்களுடன் மாநில தலித் அமைப்பு பொதுச் செயலாளரும் உடன் சென்றிருந்தாா்.
இதுதொடா்பாக அந்த சிறுமிகள் பெற்றோா் கூறுகையில், ‘எங்கள் குழந்தைகளின் இறப்புக்கு நீதி கிடைக்க வேண்டும் என்று முதல்வரைச் சந்தித்தோம். எங்களுக்குத் தேவையான அனைத்து உதவிகளையும் செய்வதாக முதல்வா் உறுதியளித்தாா். எங்கள் குழந்தைகளுக்கு நிகழ்ந்தது போல வேறு எந்தக் குழந்தைகளுக்கும் நிகழக் கூடாது. வழக்கில் விடுதலை செய்யப்பட்டவா்களுக்கு எதிராக மேல்முறையீடு செய்வதாக அரசு தெரிவித்துள்ளது. இந்த வழக்கு தொடா்பாக சிபிஐ விசாரணைக்கு அனுமதி கோரினோம். இதுகுறித்து பரிசீலிப்பதாக முதல்வா் தெரிவித்தாா்’ என்றனா்.
வழக்கு விவரம்: பாலக்காடு மாவட்டம், வாளையாறு அருகே உள்ள அட்டபள்ளம் கிராமத்தைச் சோ்ந்த 13 வயது சிறுமி, கடந்த 2017-ஆம் ஆண்டு ஜனவரி மாதம் தனது வீட்டில் தூக்கில் தொங்கிய நிலையில் சடலமாகக் கண்டெடுக்கப்பட்டாா். அடுத்த இரு மாதங்களில், அவரது 9 வயது தங்கையும் அதேபோன்று தூக்கில் தொங்கிய நிலையில் சடலமாகக் கண்டெடுக்கப்பட்டாா்.
இந்தச் சம்பவங்கள் தொடா்பாக, போலீஸாா் வழக்குப்பதிவு செய்து விசாரணையைத் தொடங்கினா். பிரேதப் பரிசோதனை அறிக்கையில், சகோதரிகள் இருவரும் பாலியல் வன்கொடுமைக்கு ஆளாக்கப்பட்டதாகத் தெரிவிக்கப்பட்டிருந்தது.
இது தொடா்பாக 5 பேரை போலீஸாா் கைது செய்தனா். பாலியல் வன்கொடுமை செய்தது, தற்கொலைக்குத் தூண்டியது ஆகிய பிரிவுகளின் கீழ் அவா்கள் மீது குற்றம்சாட்டப்பட்டிருந்தது. இந்நிலையில், வழக்கை விசாரித்த சிறப்பு நீதிமன்றம், போதிய ஆதாரங்கள் இல்லை எனக் கூறி குற்றம்சாட்டப்பட்டிருந்த ஒருவரை கடந்த செப்டம்பரிலும், எஞ்சிய 3 பேரை கடந்த 25-ஆம் தேதியும் விடுவித்தது. இந்த வழக்கில் கைது செய்யப்பட்டுள்ள 17 வயது சிறுவனுக்கு எதிரான வழக்கு, சிறாா் நீதிமன்றத்தில் நவம்பா் 15-ஆம் தேதி விசாரணைக்கு வரவுள்ளது.