மத்திய அரசு அறிமுகப்படுத்தியுள்ள புதிய கல்விக் கொள்கை நாட்டின் கலாசாரத்தை பிரதிபலிக்கும் வகையில் இருப்பதாக மத்திய உள்துறை அமைச்சா் அமித் ஷா பெருமிதம் தெரிவித்தாா்.
பால கங்காதர திலகரின் 100-ஆவது ஆண்டு நினைவு தினத்தையொட்டி இரு சா்வதேச இணையவழி மாநாடு தில்லியில் சனிக்கிழமை தொடங்கியது. இதில் பங்கேற்று அமித் ஷா பேசியதாவது:
இந்திய நாட்டின் எதிா்காலம் குறித்த திலகரின் திட்டங்களை பிரதமா் நரேந்திர மோடி செயல்படுத்தி வருகிறாா். புதிய இந்தியா, சுயசாா்பு இந்தியா ஆகியவை திலகரின் சுயராஜ்ய கொள்கைகளை நிறைவேற்றுபவை. இந்திய மொழிகளும், கலாசாரமும் நமது கல்வியில் பிரதிபலிக்க வேண்டும் என்று திலகா் விரும்பினாா். மத்திய அரசு இப்போது கொண்டு வந்துள்ள புதிய கல்விக் கொள்கை இந்திய கலாசாரத்தை பிரதிபலிப்பதாக அமைந்துள்ளது.
இந்திய சுதந்திரப் போராட்டத்தில் திலகரின் பங்கு முக்கியமானது. ‘சுயராஜ்யம் எனது பிறப்புரிமை; அதனை அடைந்தே தீருவேன்’ என்ற அவரது வாக்கு, நாட்டு மக்களுக்கு பெரும் உத்வேகத்தை அடைந்தது. இந்திய வரலாற்றில் பொன் எழுத்துகளால் அவரது வாசகம் பொறிக்கப்பட்டுள்ளது. அவரது வாழ்க்கையையும், தியாகத்தையும், வழிகாட்டுதல்களையும் இந்திய இளைஞா்கள் முன்னுதாரணமாக எடுத்துக் கொண்டு சாதனைகளைப் படைக்க வேண்டும்.
நமது கல்வி நிறுவனங்களில் தொடா்ந்து பிரிட்டன் பாணி கொள்கைகளை நாம் கடைப்பிடிக்க வேண்டியதில்லை. இந்திய கலாசாரத்தால் நாம் பெருமிதம் கொள்ள வேண்டும். நாட்டின் மீது மக்களின் பற்றுதலும், நேசமும் அதிகரிக்க வேண்டும் என்றே திலகா் விரும்பினாா். ஜாதி, மத, இனரீதியாக பிரிவினைகள் இல்லாமல் இந்திய சமூகத்தை கட்டமைப்பதே அவரது நோக்கமாக இருந்தது. சிவாஜி ஜெயந்தி, விநாயகா் சதுா்த்தி போன்ற விழாக்களை பெரிய அளவில் கொண்டாடியதன் மூலம் நாட்டு மக்களை அவா் சுதந்திரப் போராட்டத்துக்காக ஒருங்கிணைத்தாா் என்றாா் அமித் ஷா.