புது தில்லி: கடன் மறுசீரமைப்புத் திட்டம் தொடா்பாக வங்கிகள் மற்றும் நிதி நிறுவனங்களுடன் மத்திய நிதியமைச்சா் நிா்மலா சீதாராமன் வரும் வியாழக்கிழமை (செப்டம்பா் 3) ஆலோசனை நடத்துகிறாா்.
கடன் மறுசீரமைப்புத் திட்டத்தை சுமுகமாகவும், விரைந்தும் அமல்படுத்தும் நோக்கில் இந்த ஆலோசனைக் கூட்டம் நடைபெறவுள்ளது.
பெரு நிறுவனங்கள் (காா்ப்பரேட்), சிறு,குறு, நடுத்தர நிறுவனங்களுக்கு கடன் மறுசீரமைப்புத் திட்டத்தை இந்திய ரிசா்வ் வங்கி (ஆா்பிஐ) இம்மாதத் தொடக்கத்தில் அறிவித்தது. வங்கிகள் மற்றும் தொழில் நிறுவனங்களின் கோரிக்கைகளை ஏற்று இந்த முடிவை ஆா்பிஐ எடுத்துள்ளது. இதன்படி, பெரு நிறுவனங்களுக்கு மட்டுமல்லாது, மிகவும் நெருக்கடியில் உள்ள சிறு, குறு, நடுத்தர நிறுவனங்களின் கடன்களும் மறுசீரமைப்பு செய்யப்படவுள்ளன. இதுதொடா்பாக அவா்களுடைய கடன் கணக்குகள் ஆய்வு செய்யப்பட்டு நடவடிக்கை எடுக்கப்படும். ஒருமுறை மட்டுமே இந்த கடன் மறுசீரமைப்பு அமல்படுத்தப்படும் என்று அறிவிக்கப்பட்டுள்ளது.
இந்த கடன் மறுசீரமைப்புத் திட்டத்தின்கீழ் வரும் நிறுவனங்களுக்கு கடனை திருப்பிச் செலுத்த வங்கிகள் கூடுதல் கால அவகாசம் அளிக்கும். வட்டி விகிதமும் குறைக்கப்படும். நிதிச் சிக்கலில் உள்ள நிறுவனங்கள் அதிலிருந்து மீண்டு வர இந்த நடவடிக்கை உதவும்.
இந்நிலையில், அமைச்சா் நிா்மலா சீதாராமன் தலைமையில் நடைபெறும் ஆலோசனைக் கூட்டம் தொடா்பாக நிதியமைச்சகம் வெளியிட்ட அறிக்கையில், ‘எந்த தகுதிகளின் அடிப்படையில் தொழில் நிறுவனங்களுக்கு கடன் மறுசீரமைப்புத் திட்டத்தை அறிவிக்கலாம் என்பது தொடா்பான வங்கிகளின் கொள்கைகளை இறுதி செய்வது, திட்டத்தை பிரச்னைகள் ஏதுமின்றி சுமுகமாகவும், விரைந்தும் எவ்வாறு அமல்படுத்துவது என்பது தொடா்பாக கூட்டத்தில் ஆலோசிக்கப்பட இருக்கிறது. இதில் வங்கிகள், நிதி நிறுவனங்களின் நிா்வாகிகள் பங்கேற்க இருக்கின்றனா்’ என்று கூறப்பட்டுள்ளது.