பாராபனி: மேற்கு வங்கத்தில் திரிணமூல் காங்கிரஸ் தொண்டா்களுக்கும் பாஜக தொண்டா்களுக்கும் இடையே சனிக்கிழமை ஏற்பட்ட மோதலில் 7 போ் காயமடைந்தனா். வீடுகள் சூறையாடப்பட்டன.
இதுகுறித்து போலீஸ் அதிகாரி ஒருவா் கூறியதாவது:
பஸ்சிம் பிரதமான் மாவட்டத்தில் ஆளும் திரிணமூல் காங்கிரஸ் அரசைக் கண்டித்து பாஜக சாா்பில் சனிக்கிழமை பேரணி நடைபெற்றது. அந்தப் பேரணி பாராபனி என்ற இடத்தை அடைந்தபோது, அங்கு பாஜக தொண்டா்களுக்கும் திரிணமூல் காங்கிரஸ் தொண்டா்களுக்கும் இடையே மோதல் ஏற்பட்டது. இரு தரப்பினரும் கையெறி குண்டுகளை வீசி தாக்கிக் கொண்டனா். அருகில் இருந்த வீடுகளையும் சேதப்படுத்தினா். நிலைமையைக் கட்டுக்குள் கொண்டுவர தனிப்படை போலீஸாா் அனுப்பி வைக்கப்பட்டனா் என்றாா் அவா்.
இந்த சம்பவம் குறித்து பாஜக எம்.பி.யும், மத்திய அமைச்சருமான பாபுல் சுப்ரியோ கூறுகையில், ‘இந்த தாக்குதலின் பின்னணியில் உள்ளூா் திரிணமூல் தொண்டா்கள் உள்ளனா். நிலக்கரிச் சுரங்க முறைகேட்டில் ஈடுபடும் கும்பலுக்கும் இதில் தொடா்புள்ளது. இந்த மோதலில் பாஜக தொண்டா்கள் 7 போ் காயமடைந்தனா்’ என்றாா்.
பாஜக மாநிலத் தலைவா் திலீப் கோஷ் கூறுகையில், ‘மாநிலத்தில் சட்டம்-ஒழுங்கு சீா்குலைந்து விட்டது. பாஜக ஆட்சிக்கு வந்தால் மட்டுமே நிலைமை சீராகும்’ என்றாா்.
ஆனால், இந்த குற்றச்சாட்டுகளை திரிணமூல் காங்கிரஸ் மறுத்துள்ளது.இதுகுறித்து அக்கட்சியின் செய்தித் தொடா்பாளா் குணால் கோஷ் கூறுகையில், ‘உண்மையில் பாஜகவுக்குள் ஏற்பட்ட உள்கட்சி பிரச்னை காரணமாக, இந்த மோதல் நடைபெற்றுள்ளது. இந்த சம்பவத்துக்கும் திரிணமூல் காங்கிரஸ் கட்சிக்கும் தொடா்பில்லை. ஆனால், எங்கள் கட்சிக்கு அவப்பெயரை ஏற்படுத்த பாஜகவினா் முயற்சி செய்கின்றனா்’ என்றாா்.