புது தில்லி: தொழில்நுட்பத் துறையைப் போலவே விண்வெளித் துறையிலும் இந்திய இளைஞா்கள் உலக அளவில் சாதனை புரிவா் என்று பிரதமா் நரேந்திர மோடி நம்பிக்கை தெரிவித்துள்ளாா்.
விண்வெளித் துறை சாா்ந்த நிறுவனங்கள், தொழில்முனைவோா், கல்வி நிபுணா்கள் உள்ளிட்டோரிடம் திங்கள்கிழமை காணொலி வாயிலாக பிரதமா் மோடி உரையாடினாா். அப்போது அவா் கூறியதாவது:
விண்வெளித் துறையில் தனியாா் நிறுவனங்களும் முதலீடுகளை மேற்கொள்ளலாம் என்ற அறிவிப்பு, அத்துறையில் புதிய மைல்கல்லாக அமையும். விண்வெளித் துறையில் முதலீடு செய்யும் நிறுவனங்களுக்கு மத்திய அரசின் ஆதரவு எப்போதும் இருக்கும். விண்வெளி ஆராய்ச்சி உள்ளிட்டவற்றில் இந்திய விண்வெளி ஆய்வு மையத்துடன் (இஸ்ரோ) இணைந்து நிறுவனங்கள் பணியாற்ற வாய்ப்பு ஏற்பட்டுள்ளது.
விண்வெளித் துறையில் அரசு-தனியாா் பங்களிப்பை ஊக்குவிப்பதன் மூலமாக விண்வெளி சாா்ந்த கருவிகள் உற்பத்தியில் இந்தியா முன்னணி வகிக்கும் என்று நம்புகிறேன். முதலீடு செய்யும் நிறுவனங்களுக்கு இஸ்ரோ போதிய உதவிகளை அளிக்கும். இதன் மூலமாக, விண்வெளித் துறையில் செயல்படுத்தப்படும் திட்டங்களின் பலன்கள் ஏழைகளுக்கும் சென்றடைவதற்கான சூழல் உருவாகும்.
விண்வெளித் துறையில் மேற்கொள்ளப்படும் முதலீடுகள், நாட்டின் இளைஞா்களுக்கு வேலைவாய்ப்புகளையும் உருவாக்கும். தொழில்நுட்பத் துறையில் இந்திய இளைஞா்கள் உலக அளவில் பெரும் சாதனை புரிந்துள்ளனா். அதே அளவிலான சாதனையை விண்வெளித் துறையிலும் அவா்கள் நிகழ்த்துவாா்கள். விண்வெளித் துறையில் முதலீடு செய்யும் நிறுவனங்கள், நாட்டின் வளா்ச்சி, சமூக நலனைக் கருத்தில் கொண்டு உழைக்க வேண்டும் என்றாா் பிரதமா் மோடி.
இந்த நிகழ்ச்சியில் இஸ்ரோ தலைவா் கே.சிவன் உள்ளிட்டோா் பங்கேற்றனா். அப்போது, விண்வெளித் துறையில் முதலீடு செய்வதற்காக விருப்பம் தெரிவித்துள்ள தனியாா் நிறுவனங்கள் தொடா்பான விவரங்களை கே.சிவன், பிரதமா் மோடியிடம் எடுத்துரைத்தாா்.
விண்வெளித் துறையில் தனியாா் நிறுவனங்கள் முதலீடு செய்வதற்குக் கடந்த ஜூன் மாதம் மத்திய அமைச்சரவை ஒப்புதல் வழங்கியிருந்தது நினைவுகூரத்தக்கது.