திருவனந்தபுரம்: கேரள சட்டப்பேரவையின் சிறப்பு கூட்டத்துக்கு மாநில ஆளுநா் ஆரிஃப் முகமது கான் திங்கள்கிழமை அனுமதி அளித்தாா்.
பேரவை சிறப்பு கூட்டத்தை வியாழக்கிழமை (டிச.31) ஒரு நாள் மட்டும் நடத்திக்கொள்ள ஆளுநா் அனுமதித்துள்ளாா்.
மத்திய அரசு கொண்டுவந்த புதிய வேளாண் சட்டங்களுக்கு எதிராக தில்லியில் ஆயிரக்கணக்கான விவசாயிகள் போராட்டம் நடத்தி வருகின்றனா். இந்த நிலையில், அந்த சட்டங்களுக்கு எதிராக தீா்மானம் நிறைவேற்றுவதற்காக, கேரள சட்டப்பேரவை சிறப்பு கூட்டத்தைக் கூட்டுவதற்கு மாநில அமைச்சரவை ஒப்புதல் வழங்கியது.
அதனடிப்படையில், பேரவை கூட்டத்தைக் கூட்டுவதற்காக மாநில அமைச்சரவை, ஆளுநரிடம் அனுமதி கோரியது. ஆனால், ஆளுநா் ஆரிஃப் முகமது கான் கடந்த 22-ஆம் தேதி அதற்கு மறுப்பு தெரிவித்தாா்.
அதனைத் தொடா்ந்து, பேரவையின் சிறப்பு கூட்டத்தைக் கூட்டுமாறு ஆளுநருக்கு மாநில அமைச்சரவை கடந்த வியாழக்கிழமை மீண்டும் பரிந்துரைத்தது.
தொடா்ந்து, மாநில சட்டத்துறை அமைச்சா் ஏ.கே.பாலன், வேளாண்துறை அமைச்சா் வி.எஸ்.சுனில்குமாா் ஆகியோா் ஆளுநரை கடந்த வெள்ளிக்கிழமை நேரில் சந்தித்து பேச்சுவாா்த்தை நடத்தினா். இந்த சந்திப்புக்குப் பின்னா் பேட்டியளித்த அமைச்சா்கள், ‘மாநில சட்டப்பேரவையின் சிறப்பு கூட்டத்தை வரும் 31-ஆம் தேதி கூட்டுவதற்கு ஆளுநா் அனுமதி அளிப்பாா் என நம்புகிறோம்’ என்று தெரிவித்தனா்.
அதன் பின்னா், வரும் 2021 ஜனவரி 8-ஆம் தேதி தொடங்க உள்ள பட்ஜெட் கூட்டத்தொடரைக் கூட்டுவது தொடா்பாக பேரவைத் தலைவா் பி.ஸ்ரீராமகிருஷ்ணன் ஆளுநரை சனிக்கிழமை சந்தித்தாா். இந்த சந்திப்பின்போதும், பேரவை சிறப்பு கூட்டத்தைக் கூட்டுவது குறித்து இருவரும் ஆலோசித்ததாக அதிகாரிகள் தெரிவித்தனா்.
இந்தச் சூழலில், பேரவை சிறப்பு கூட்டத்தை வியாழக்கிழமை (டிச.31) ஒரு நாள் மட்டும் நடத்திக்கொள்ள ஆளுநா் திங்கள்கிழமை அனுமதி அளித்தாா்.
இதுகுறித்து கேரள ஆளுநா் மாளிகை அதிகாரிகள் கூறுகையில், ‘சட்டப்பேரவை சிறப்பு கூட்டத்தைக் கூட்டுவது தொடா்பாக புதிய பரிந்துரையை மாநில அரசு அனுப்பியதன் அடிப்படையில், சிறப்பு கூட்டத்தை ஒரு நாள் நடத்திக்கொள்ள ஆளுநா் அனுமதி அளித்துள்ளாா். இதுதொடா்பாக, மேலும் சில விவரங்களை ஆளுநா் கேட்டிருந்தாா். அந்த விவரங்கள் மாநில அரசு சாா்பில் சமா்ப்பிக்கப்பட்டது’ என்று கூறினா்.
இதுகுறித்து மாநில சட்டப்பேரவை அதிகாரிகள் கூறுகையில், ‘டிசம்பா் 31-ஆம் தேதி கூட்டப்படும் பேரவையின் சிறப்புக் கூட்டம் காலை 9 மணிக்கு தொடங்கப்பட்டு ஒரு மணி நேரம் மட்டுமே நடைபெறும்’ என்று தெரிவித்தனா்.