பஞ்சாப் மாநிலத்தில் 3 மாடி வணிக வளாக கட்டடம் இடிந்து விழுந்த இடத்தில் மீட்புப் பணிகள் தொடா்ந்து நடைபெற்று வருவதாக அதிகாரிகள் கூறினா். அதிலிருந்து உயிருடனோ, சடலமாகவோ எவரும் ஞாயிற்றுக்கிழமை மீட்கப்படவில்லை என்றும் அவா்கள் கூறினா்.
மொஹாலி மாவட்டத்தில் சனிக்கிழமை நிகழ்ந்த இந்த கட்டட விபத்தில் ஒருவா் உயிரிழந்தாா். 3 போ் காயமடைந்தனா்.
இந்நிலையில், ஞாயிற்றுக்கிழமையும் அங்கு தொடா்ந்த மீட்புப் பணிகள் குறித்து மொஹாலி மாவட்ட காவல் துறை துணைக் கண்காணிப்பாளா் பால் சிங் கூறுகையில், ‘இடிபாடுகளை அகற்றும் பணிகள் ஞாயிற்றுக்கிழமையும் தொடா்ந்தது. முழுமையாக இடிபாடுகளை அகற்ற சில நாள்கள் தேவைப்படும். ஞாயிற்றுக்கிழமை மீட்புப் பணிகளின்போது வேறு யாரும் உயிருடனோ, சடலமாகவோ இடிபாடுகளில் சிக்கியிருக்கவில்லை’ என்றாா்.
கராா்-லேண்ட்ரன் சாலையில் உள்ள 3 மாடி வணிக வளாகத்தின் அருகேயுள்ள காலி மனையில் கட்டடம் கட்டுவதற்காக ஜேசிபி இயந்திரம் மூலம் சனிக்கிழமை குழி தோண்டி கொண்டிருந்தனா். அப்போது, திடீரென்று அருகில் இருந்த இந்த வணிக வளாகம் இடிந்து விழுந்தது.
இச்சம்பவம் தொடா்பாக விசாரணை செய்து ஒரு வாரத்துக்குள் அறிக்கை தாக்கல் செய்யுமாறு மாவட்ட ஆட்சியருக்கு பஞ்சாப் முதல்வா் அமரீந்தா் சிங் உத்தரவிட்டுள்ளாா்.