Enable Javscript for better performance
உ.பி. பேருந்து- லாரி மோதி விபத்து: 14 போ் பலி- Dinamani

சுடச்சுட

    
    upacci030357

    உத்தரப் பிரதேச மாநிலம், ஃபிரோசாபாத் மாவட்டத்தில் 13 பேரை பலி கொண்ட சாலை விபத்தில் சேதமடைந்த தனியாா் சொகுசு பேருந்து.

    உத்தரப் பிரதேச மாநிலம், ஃபிரோசாபாத் மாவட்டத்தில் சாலையோரம் நின்று கொண்டிருந்த லாரி மீது தனியாா் சொகுசு பேருந்து மோதி விபத்துக்குள்ளானதில் பேருந்தில் பயணம் செய்தவா்களில் 14 போ் உயிரிழந்தனா். 31 போ் பலத்த காயமடைந்தனா்.

    இதுகுறித்து காவல் துறை கண்காணிப்பாளா் சசிந்திரா படேல் வியாழக்கிழமை கூறியதாவது:

    அந்த தனியாா் பேருந்து தில்லியில் இருந்து பிகாரில் உள்ள மோதிஹாரிக்கு சென்று கொண்டிருந்தது. அதில் சுமாா் 50 போ் பயணம் செய்தனா்.

    புதன்கிழமை இரவு 10 மணியளவில், ஆக்ரா-லக்னௌ விரைவு வழிச் சாலையில் சென்று கொண்டிருந்தபோது, சாலையோரம் நின்று கொண்டிருந்த கண்டெய்னா் லாரி மீது மோதி விபத்துக்குள்ளானது. இதில், 14 போ் உயிரிழந்தனா். காயமடைந்த 25 போ் வெவ்வேறு மருத்துவமனைகளில் அனுமதிக்கப்பட்டுள்ளனா். அவா்களில் சிலரது நிலைமை கவலைக்கிடமாக இருப்பதாகக் கூறப்படுகிறது.

    கண்டெய்னா் லாரியில் டயா் பழுதானதால், மாற்று டயா் பொருத்தும் பணியில் அதன் ஓட்டுநரும், அவரது உதவியாளரும் ஈடுபட்டிருந்தனா். பேருந்து மோதியதில் அவா்களும் காயமடைந்தனா் என்று அவா் கூறினாா்.

    விபத்து குறித்து தகவல் அறிந்ததும் உடனடியாக சம்பவ இடத்துக்கு விரைந்து மீட்பு பணிகளை கண்காணிக்குமாறு மாவட்ட ஆட்சியா் உள்ளிட்ட அதிகாரிகளுக்கு முதல்வா் யோகி ஆதித்யநாத் உத்தரவிட்டாா்.

    பிரதமா் இரங்கல்: விபத்தில் பலா் உயிரிழந்ததற்கு பிரதமா் நரேந்திர மோடி இரங்கல் தெரிவித்துள்ளாா். இதுகுறித்து அவா் தனது சுட்டுரைப் பக்கத்தில் வெளியிட்ட பதிவில், ‘ஆக்ரா-லக்னௌ விரைவு வழிச் சாலையில் நிகழ்ந்த சாலை விபத்து மிகுந்த துயரத்தை ஏற்படுத்தியுள்ளது. விபத்தில் உயிரிழந்தவா்களின் குடும்பத்தினருக்கு ஆறுதலை தெரிவித்துக் கொள்கிறேன். காயமடைந்தவா்கள் விரைவில் குணமடைய வேண்டும் என்று பிராா்த்திக்கிறேன்’ என்று குறிப்பிட்டுள்ளாா்.

     

     

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai