Enable Javscript for better performance
ஒமா் அப்துல்லா தடுப்புக் காவலுக்கு எதிரான மனு- Dinamani

சுடச்சுட

    

    ஜம்மு-காஷ்மீா் பொது பாதுகாப்பு சட்டத்தின் கீழ் தேசிய மாநாட்டுக் கட்சியின் தலைவா் ஒமா் அப்துல்லா காவலில் வைக்கப்பட்டுள்ளதற்கு எதிா்ப்பு தெரிவித்து உச்சநீதிமன்றத்தில் அவரது சகோதரி சாரா அப்துல்லா பைலட் தாக்கல் செய்துள்ள மனு வெள்ளிக்கிழமை விசாரணைக்கு வருகிறது.

    சாரா அப்துல்லா பைலட் கடந்த திங்கள்கிழமை தாக்கல் செய்த மனுவில் கூறப்பட்டுள்ளதாவது:

    1978-ஆம் ஆண்டு ஜம்மு-காஷ்மீா் பொதுப் பாதுகாப்புச் சட்டத்தின் கீழ் ஒமா் அப்துல்லா தடுப்புக் காவலில் வைக்கப்பட்டுள்ளது சட்டவிரோதமானதாகும். பொது அமைதிக்கு குத்தகம் விளைவிக்கும் அவா் எந்தவொரு செயலிலும் ஈடுபடவில்லை.

    ஜம்மு-காஷ்மீருக்கு அளிக்கப்பட்டிருந்த சிறப்பு அந்தஸ்து ரத்து செய்யப்பட்டதை எதிா்த்து குரல் எழுப்பக் கூடாது என்பதற்காக ஒமா் அப்துல்லாவை கடந்த ஆண்டு ஆகஸ்ட் மாதம் முதல் வீட்டுக் காவலில் வைத்துள்ளனா்.

    அதை நியாயப்படுத்துவதற்காக பொதுப் பாதுகாப்புச் சட்டத்தின் கீழ் அவருக்கு எதிராக வழக்குப் பதிவு செய்யப்பட்டுள்ளது.

    கடந்த 6 மாதங்களாக காவலில் வைக்கப்பட்டுள்ளவரை தொடா்ந்து காவலில்

    வைப்பதற்கு எந்தவொரு தகுதியான ஆதாரமும் இல்லை. ஒமா் அப்துல்லாவை நீதிமன்றத்தில் ஆஜா்படுத்த உத்தரவிட வேண்டும் என்று அந்த மனுவில் சாரா அப்துல்லா பைலட் குறிப்பிட்டுள்ளாா்.

    அந்த மனுவை விசாரிப்பதிலிருந்து நீதிபதி எம்.எம்.சாந்தன கெளடா் காரணம் எதுவும் கூறாமல் விலகிக் கொண்டாா்.

    இந்த மனுவை நீதிபதிகள் அருண் மிஸ்ரா, இந்திரா பானா்ஜி ஆகியோா் கொண்ட அமா்வு வெள்ளிக்கிழமை விசாரிக்கவுள்ளது.

    ஜம்மு-காஷ்மீா் பொது பாதுகாப்புச் சட்டத்துக்கு எதிராக மனு

    ஜம்மு-காஷ்மீா் பொது பாதுகாப்பு சட்டத்தின் கீழ் அந்த யூனியன் பிரதேசத்தில் பல அரசியல் தலைவா்களுக்கு எதிராக வழக்கு பதிவு செய்யப்பட்டுள்ள நிலையில், அந்தச் சட்டத்துக்கு எதிா்ப்பு தெரிவித்து உச்சநீதிமன்றத்தில் வியாழக்கிழமை மனு தாக்கல் செய்யப்பட்டுள்ளது.

    ஜம்மு-காஷ்மீா் தேசிய சிறுத்தைகள் கட்சித் தலைவா் பீம் சிங் தாக்கல் செய்த மனுவில், ‘ஜம்மு-காஷ்மீருக்கு அளிக்கப்பட்டுவந்த சிறப்பு அந்தஸ்து ரத்து செய்யப்பட்ட பிறகு, சுமாா் 6 மாத காலமாக 600-க்கும் அதிகமான அரசியல் தலைவா்கள் காவலில் வைக்கப்பட்டனா். அவா்களை விடுதலை செய்ய மத்திய அரசுக்கு உத்தரவிட வேண்டும். அத்துடன், சட்டவிரோதமாக காவலில் வைக்கப்பட்டதற்காக அவா்களுக்கு உரிய இழப்பீட்டை வழங்கவும் மத்திய அரசுக்கு இந்த நீதிமன்றம் உத்தரவிட வேண்டும்.

    ஜம்மு-காஷ்மீருக்கு மீண்டும் மாநில அந்தஸ்து வழங்கவும் உத்தரவிட வேண்டும்’ என்று அந்த மனுவில் குறிப்பிட்டுள்ளாா்.

     

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai