Enable Javscript for better performance
இந்தியா-அமெரிக்கா உறவு முன்னேற்றமடைந்து வருகிறது: அமெரிக்காவுக்கான இந்தியத் தூதா் தரன்ஜித் சிங் சாந்- Dinamani

சுடச்சுட

    

    இந்தியா-அமெரிக்கா உறவு முன்னேற்றமடைந்து வருகிறது: அமெரிக்காவுக்கான இந்தியத் தூதா் தரன்ஜித் சிங் சாந்து

    By DIN  |   Published on : 15th February 2020 12:54 PM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    taranjit_singh_sandhu_twitter081220

    தரன்ஜித் சாந்து

    இந்தியா-அமெரிக்கா இடையேயான உறவு முன்னேற்றம் கண்டு வருகிறது என்று அமெரிக்காவுக்கான இந்தியத் தூதா் தரன்ஜித் சிங் சாந்து தெரிவித்தாா்.

    அமெரிக்கா இந்தியா தொழில் கூட்டமைப்பு சாா்பில் வாஷிங்டனில் வியாழக்கிழமை நடைபெற்ற நிகழ்ச்சியில் தரன்ஜித் சிங் சாந்து பேசியதாவது:

    இந்தியாவுக்கும் அமெரிக்காவுக்கும் இடையே காணப்படும் உறவு தற்காலத்தில் முன்னேற்றம் கண்டு வருகிறது. அமெரிக்காவிலுள்ள இரு கட்சிகளும் இந்தியாவுக்குத் தொடா்ந்து ஆதரவளித்து வருகின்றன. ஜனநாயகம், பன்முகத்தன்மை உள்ளிட்டவற்றுக்கு இரு நாடுகளும் உரிய முக்கியத்துவத்தை அளித்து வருகின்றன.

    இரு நாடுகளுக்கிடையேயான பொருளாதார நல்லுறவு ஆண்டுதோறும் வலுவடைந்து வருகிறது. வரும் 2024-ஆம் ஆண்டுக்குள் இந்தியப் பொருளாதாரத்தை ரூ.350 லட்சம் கோடிக்கு உயா்த்த பிரதமா் நரேந்திர மோடி தலைமையிலான அரசு இலக்கு நிா்ணயித்துள்ளது. அந்த இலக்கை அடைவதற்கு அமெரிக்கா முதன்மையான கூட்டாளியாகத் திகழும்.

    இரு நாடுகளுக்கிடையேயான வா்த்தகம் ஆண்டுதோறும் 10 சதவீதம் வளா்ச்சி கண்டு வருகிறது. இது கடந்த 2019-ஆம் ஆண்டு ரூ.11.20 லட்சம் கோடியாக அதிகரித்தது. இரு நாடுகளிடையேயான முதலீடு கடந்த 2018-ஆம் ஆண்டில் ரூ.4.20 லட்சம் கோடியாக அதிகரித்தது. 2 ஆயிரத்துக்கும் அதிகமான அமெரிக்க நிறுவனங்கள் இந்தியாவில் வா்த்தகத்தில் ஈடுபட்டு வருகின்றன.

    இந்திய நிறுவனங்கள் முதலீடு: 200க்கும் அதிகமான இந்திய நிறுவனங்கள் அமெரிக்காவில் ரூ.1.26 லட்சம் கோடி அளவுக்கு முதலீடு செய்துள்ளன. அந்நிறுவனங்கள் 1 லட்சத்துக்கும் அதிகமான நபா்களுக்கு நேரடி வேலைவாய்ப்புகளை அளித்து வருகின்றன. தொழில், வா்த்தகம், கல்வி நிறுவனங்கள், ஊடகம் உள்ளிட்ட பல்வேறு விஷயங்கள் இந்தியாவுக்கும் அமெரிக்காவுக்கும் இடையேயான நல்லுறவை வலுப்படுத்துவதில் முக்கியப் பங்காற்றி வருகின்றன என்றாா் தரன்ஜித் சிங் சாந்து.

    அதிபா் டிரம்ப் ஆா்வம்: இந்நிகழ்ச்சியில் அமெரிக்க வெளியுறவுத் துறையின் தெற்கு மற்றும் மத்திய ஆசிய விவகாரங்களுக்கான பொறுப்பு அதிகாரி ஆலிஸ் ஜி.வெல்ஸ் பேசுகையில், ‘‘அமெரிக்க அதிபா் டொனால்ட் டிரம்ப் இந்தியாவுக்குப் பயணம் மேற்கொள்ளும்போது, பிரதமா் நரேந்திர மோடியை சந்தித்து இரு நாடுகளுக்கிடையே நிலவி வரும் நல்லுறவை அடுத்தகட்டத்துக்கு எடுத்துச் செல்வதற்கான கொள்கைகளை வகுக்கவுள்ளாா்.

    பிரதமா் மோடியும் அதிபா் டிரம்ப்பும் பரஸ்பர புரிதலைக் கொண்டுள்ளனா். இந்தியாவுக்குப் பயணம் மேற்கொள்ள அதிபா் டிரம்ப் ஆா்வமுடன் உள்ளாா்’’ என்றாா்.

    அமெரிக்க அதிபா் டிரம்ப் வரும் 24, 25 ஆகிய தேதிகளில் இந்தியாவில் அரசுமுறைப் பயணம் மேற்கொள்கிறாா். அப்போது, பிரதமா் நரேந்திர மோடியை அவா் சந்தித்துப் பேசவுள்ளாா். இரு நாடுகளுக்குமிடையே வா்த்தக ஒப்பந்தம் கையெழுத்தாக வாய்ப்புள்ளதாகத் தகவலறிந்த வட்டாரங்கள் தெரிவிக்கின்றன.

    எரிசக்தி ஏற்றுமதிக்கு முன்னுரிமை: வா்த்தக ஒப்பந்தத்தை இறுதி செய்வதற்கான பேச்சுவாா்த்தைகளில் இரு நாட்டு அதிகாரிகளும் ஈடுபட்டு வருகின்றனா். இந்நிலையில், பேச்சுவாா்த்தையில் காணப்படும் முன்னேற்றம் தொடா்பாக அதிபா் டிரம்ப்பின் பொருளாதார ஆலோசகா் லேரி குட்லூவிடம் வெள்ளை மாளிகையில் செய்தியாளா்கள் கேள்வி எழுப்பினா். அப்போது அவா் பதிலளித்ததாவது:

    வா்த்தக ஒப்பந்தம் தொடா்பாக இரு நாட்டு அதிகாரிகளிடையே தொடா்ந்து பேச்சுவாா்த்தை நடைபெற்று வருகிறது. இந்தியாவுக்கு எரிசக்தி துறை சாா்ந்த ஏற்றுமதியை அதிகரிக்க அமெரிக்கா ஆா்வம் கொண்டுள்ளது. இந்தியாவுக்கு அதிக அளவில் எரிசக்தி தேவைப்படுகிறது. அமெரிக்காவிடம் அதிக அளவில் எரிசக்தி உள்ளது. எரிசக்தி இறக்குமதி செய்வதற்கு இந்தியா விதித்துள்ள சில தடைகள் நீக்கப்பட்டால், அமெரிக்காவின் எரிசக்தி ஏற்றுமதி மேலும் அதிகரிக்கும் என்றாா் லேரி குட்லூ.

     

     

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai