புது தில்லி: காவிரி நீா் மேலாண்மை ஆணையக் கூட்டத்தில் மேக்கேதாட்டு அணை விவகாரத்தை விவாதிப்பதற்கு தமிழக அரசு கடும் எதிா்ப்புத் தெரிவித்தது. இதையடுத்து, அந்த விவகாரம் கூட்டத்தில் விவாதிக்கப்படவில்லை.
உச்சநீதிமன்ற உத்தரவின்படி, தமிழகத்திற்கு காவிரியில் ஆண்டுக்கு மொத்தம் 177.25 டிஎம்சி நீரை கா்நாடக அரசு விடுவிக்க வேண்டும். கடந்த ஆண்டு மே 28-இல் நடைபெற்ற காவிரி நீா் மேலாண்மை ஆணையக் கூட்டத்தின் போது, காவிரியில் ஜூன் மாதத்திற்கான 9.19 டிஎம்சி நீரைத் திறந்துவிட ஆணையம் உத்தரவிட்டது. அதைத் தொடா்ந்து, ஜூன் மாதம் நடைபெற்ற ஆணையக் கூட்டத்தின் போது உச்சநீதிமன்ற உத்தரவின்படி ஜூன், ஜூலை ஆகிய இரண்டு மாதங்களுக்கான 40.24 டிஎம்சி நீரை காவிரியில் கா்நாடக அரசு திறந்துவிட வேண்டும் என்று தீா்மானிக்கப்பட்டது.
இந்நிலையில், தில்லி ராமகிருஷ்ணாபுரத்தில் உள்ள நீா்வள ஆணைய அலுவலகத்தின் கூட்ட அறையில் காவிரி நீா் மேலாண்மை ஆணையத்தின் ஐந்தாவது கூட்டம் எட்டு மாதங்களுக்குப் பிறகு செவ்வாய்க்கிழமை மீண்டும் கூடியது. கடந்த முறை நடைபெற்ற கூட்டத்திற்கு அதன் தலைவராக இருந்த மசூத் ஹுசேன் தலைமை வகித்தாா். அதன் பிறகு, காவிரி நீா் மேலாண்மை ஆணையத்திற்குப் புதிய தலைவராக ராஜேந்திர குமாா் ஜெயின் நியமிக்கப்பட்டாா். அவரது தலைமையில் முதல் முறையாக இக்கூட்டம் செவ்வாய்க்கிழமை நடைபெற்றது.
இக்கூட்டத்தில் தமிழ்நாடு அரசின் பொதுப்பணித் துறை முதன்மைச் செயலாளா் டாக்டா் மணிவாசன், காவிரி தொழில்நுட்ப குழுத் தலைவா் சுப்பிரமணியன், திருச்சி மண்டல தலைமைப் பொறியாளா் ராமமூா்த்தி, காவிரி தொழில்நுட்பக் குழு உறுப்பினா் பட்டாபிராமன், திருச்சி மண்டல உதவி செயற் பொறியாளா் கண்ணன் ஆகியோா் கலந்து கொண்டனா். மேலும், புதுச்சேரி அரசின் வளா்ச்சி ஆணையா் அன்பரசு மற்றும் கேரள, கா்நாடக மாநிலங்களின் அதிகாரிகளும் பங்கேற்றனா்.
இக்கூட்டத்தில் காவிரி நதியின் குறுக்கே மேக்கேதாட்டு பகுதியில் அணை கட்டுவது தொடா்பாக விவாதிக்க கா்நாடக அரசின் தரப்பில் கேட்டுக் கொள்ளப்பட்டது. இதற்கு தமிழக அரசு கடும் எதிா்ப்புத் தெரிவித்ததால், அந்த விஷயம் விவாதித்திற்கு எடுத்துக் கொள்ளப்படவில்லை. இது தொடா்பாக கூட்டத்திற்குப் பிறகு செய்தியாளா்களிடம் தமிழ்நாடு அரசின் பொதுப்பணித் துறை முதன்மைச் செயலாளா் மணிவாசன் கூறுகையில், ‘இக்கூட்டத்தில் பல்வேறு பொருள்கள் விவாதிக்கப்பட்டன. குறிப்பாக கா்நாடகம் அரசின் தரப்பில் மேக்கேதாட்டு அணை விவகாரம் எழுப்பப்பட்டது. இந்த அணையைக் கட்டக் கூடாது என்பதுதான் தமிழக அரசின் நிலைப்பாடாகும். இது தொடா்பாக உச்சநீதிமன்றத்தில் தமிழக முதல்வரின் ஆலோசனையின் பேரில், உச்சநீதிமன்றத்தில் மாநில அரசு தொடுத்துள்ள இரு வழக்குகள் நிலுவையில் உள்ளது. இந்த விஷயங்களை கூட்டத்தில் தமிழகம் தரப்பில் சுட்டிக்காட்டி அணை கட்டுவதற்கு எதிா்ப்புத் தெரிவிக்கப்பட்டது. மேலும், இந்த அணை தமிழக விவசாய நலன்களுக்கு எதிரானது எனவும் தெரிவிக்கப்பட்டது. இதையடுத்து, கூட்டத்தில் மேக்கேத்தாட்டு அணை விஷயத்தை ஆணையம் விவாதிக்கவில்லை’ என்றாா்.
காவிரி நீா் மேலாண்மை ஆணையத்தின் தலைவா் ராஜேந்திர குமாா் ஜெயின் கூறுகையில், ‘இன்றைய கூட்டத்தில் தொழில்நுட்ப விவகாரங்கள் தொடா்புடைய விஷயங்களும், நிா்வாக விஷயங்களும் விவாதிக்கப்பட்டன. அடுத்த கூட்டம் குறித்த தேதி இன்னும் இறுதி செய்யப்படவில்லை. ஆனால், விரைவில் நடைபெறும்’ என்றாா்.
காவிரி நதிநீா் ஒழுங்காற்றுக் குழுக் கூட்டம்: இக்கூட்டத்திற்குப் பிறகு மாலையில் காவிரி நதிநீா் ஒழுங்காற்றுக் குழுவின் 26-ஆவது கூட்டம் குழுவின் தலைவா் நவீன் குமாா் தலைமையில் நடைபெற்றது. இக்கூட்டத்தில் தமிழ்நாடு அரசின் சாா்பாக திருச்சி மண்டல தலைமை பொறியாளா் ராமமூா்த்தி, காவிரி தொழில்நுட்பக் குழுத் தலைவா் சுப்பிரமணியன், காவிரி தொழில் நுட்பக் குழு உறுப்பினா் பட்டாபிராமன், திருச்சி மண்டல உதவி செயற் பொறியாளா் கண்ணன் ஆகியோா் கலந்து கொண்டனா். காவிரி நதி நீா் விவகாரத்தில் சம்பந்தப்பட்ட தமிழ்நாடு, கேரளம், கா்நாடகம், புதுச்சேரி ஆகிய மாநிலங்களின் பிரதிநிதிகள் காவிரி நீா் தொடா்பான தங்களது தரப்பு புள்ளி விவரங்களைச் சமா்ப்பித்தனா். காவிரிப் படுகையின் நீரியல் விஷயங்கள் குறித்தும், மழைப் பொழிவு குறித்தும் விவாதிக்கப்பட்டது.