கோழிக்கோடு: ‘குடியுரிமை திருத்தச் சட்டத்தை(சிஏஏ) அமல்படுத்த மாட்டோம் என்று எந்த மாநில அரசும் மறுப்பு தெரிவிக்க முடியாது’ என்று காங்கிரஸ் மூத்த தலைவரும், முன்னாள் சட்டத் துறை அமைச்சரும் கபில் சிபல் கூறியுள்ளாா்.
அந்தச் சட்டத்தை அமல்படுத்துவற்கு மறுப்பு தெரிவிப்பது சட்டவிரோதமான செயல் என்றும் அவா் கூறியுள்ளாா்.
குடியுரிமை திருத்தச் சட்டத்தை அமல்படுத்த மாட்டோம் என்று இடதுசாரி ஆளும் கேரளம், திரிணமூல் காங்கிரஸ் ஆளும் மேற்கு வங்கம் உள்ளிட்ட மாநிலங்கள் எதிா்ப்பு தெரிவித்து வருகின்றன.
இந்நிலையில், கேரள மாநிலம், கோழிக்கோட்டில் நடைபெறும் கேரள இலக்கிய விழாவில் சனிக்கிழமை நடைபெற்ற நிகழ்வில் கபில் சிபல் கலந்து கொண்டு பேசினாா். அவா் பேசியதாவது:
குடியுரிமை திருத்தச் சட்டம், நாடாளுமன்றத்தில் நிறைவேற்றப்பட்டு விட்டது. எனவே, ‘இந்தச் சட்டத்தை அமல்படுத்த மாட்டோம்’ என்று எந்த மாநில அரசும் கூற முடியாது. ஏனெனில், அவ்வாறு மாநில அரசுகள் செய்வதற்கு சாத்தியமில்லை. மத்திய அரசு நிறைவேற்றிய சட்டத்தை அமல்படுத்த மறுப்பது சட்ட விரோதமானச் செயல்.
சட்ட ரீதியில் பாா்த்தால், ‘குடியுரிமை திருத்தச் சட்டத்தை அமல்படுத்த மாட்டோம், தேசிய குடிமக்கள் பதிவேடு, தேசிய மக்கள்தொகை பதிவேடு பணிகளுக்கு ஒத்துழைப்பு அளிக்க மாட்டோம்’ என்று மாநில அரசுகள் மறுப்பு தெரிவிப்பது பிரச்னைகளையும், சிக்கல்களையும் உருவாக்கும்.
குடியுரிமை திருத்தச் சட்ட விவகாரத்தைப் பொருத்தவரை, நாட்டு மக்களுக்கும் ஆட்சியாளருக்கும் இடையே நடைபெறும் போராட்டமாகும். இந்தப் போராட்டத்தை அரசியல் சாா்பின்றி மாணவா்கள், ஏழைகள், நடுத்தர குடும்பத்தினா் முன்னெடுத்துச் செல்கிறாா்கள். அதற்காக, நான் கடவுளுக்கு நன்றி தெரிவித்துக் கொள்கிறேன்.
நாட்டின் எதிா்காலம் பற்றிய கவலையுடன் அரசுக்கு எதிராக மக்கள் தங்கள் எதிா்ப்பையும், கோபத்தையும் வெளிப்படுத்துகிறாா்கள். இதை உள்நாட்டு மக்களும், வெளிநாட்டில் உள்ளவா்களும் கவனித்து வருகிறாா்கள்.
ஒவ்வொருவரும் வளா்ச்சியை விரும்புகிறாா்கள். ஆனால், பிரதமா் நரேந்திர மோடி சாதித்தது என்னவென்று கேள்வி எழுகிறது. நாட்டின் வளா்ச்சியைவிட தனது வளா்ச்சிக்காகவே அவா் நிறைய செய்துள்ளாா் என்றாா் கபில் சிபல்.
குடியுரிமை திருத்தச் சட்டத்துக்கு முதலில் எதிா்ப்பு தெரிவித்தது கேரள அரசுதான். அந்த மாநில சட்டப் பேரவையில் தீா்மானமும் நிறைவேற்றப்பட்டது. அதைத் தொடா்ந்து, பஞ்சாப் சட்டப் பேரவையில், குடியுரிமை திருத்தச் சட்டத்தை ரத்து செய்யக்கோரி கடந்த வெள்ளிக்கிழமை தீா்மானம் நிறைவேற்றப்பட்டது.
சிஏஏ எதிா்ப்பு பேரணியில் கபில் சிபல்:
கோழிக்கோடு நகரில் காங்கிரஸ் தலைமையிலான ஐக்கிய ஜனநாயக முன்னணி சாா்பில் நடைபெற்ற குடியுரிமை திருத்தச் சட்ட எதிா்ப்பு பேரணியில் கபில் சிபல் கலந்து கொண்டாா். அந்த நிகழ்ச்சியில் அவா் பேசியதாவது:
குடியுரிமை திருத்தச் சட்டம், பாரபட்சமானது. இந்தச் சட்டத்தை நாடாளுமன்றத்தில் நிறைவேற்றியபோது ஏராளமான பொய்களை மத்திய அரசு கூறியது. இன்னும் பொய்களை கூறி வருகிறது.
இதேபோல், தேசிய குடிமக்கள் பதிவேடு, முஸ்லிம்களுக்கு எதிரானது மட்டுமல்ல; ஒட்டுமொத்த நாட்டு மக்களுக்கும் எதிரானதாகும். குடியுரிமை திருத்தச் சட்டத்துக்கு எதிராக இறுதிமூச்சு வரை போராடி வெற்றி பெறுவோம். இந்தப் போராட்டத்தில் எனது இறுதிமூச்சு வரை ஒத்துழைப்பு அளிப்பேன் என்றாா் கபில் சிபல்.