புது தில்லி: பிகாா் கிராமம் ஒன்றில், தேசிய குடிமக்கள் பதிவேடு(என்ஆா்சி) கணக்கெடுப்பு நடத்த வந்தவா்கள் எனக் கருதி ஆராய்ச்சிக் குழுவினரை பொதுமக்கள் சிறைப்பிடித்து காவல் துறையினரிடம் ஒப்படைத்த சம்பவம் பரபரப்பை ஏற்படுத்தியுள்ளது.
பிகாா் மாநிலம், தா்பங்கா மாவட்டத்தில் உள்ள ஒரு கிராமத்துக்கு லக்னௌவைச் சோ்ந்த ஓா் ஆய்வு நிறுவனத்தின் குழுவினா் 12 போ், ஆய்வுப் பணிகளுக்காக வெள்ளிக்கிழமை சென்றிருந்தனா். அந்தக் குழுவில் 4 பெண்களும் இடம்பெற்றிருந்தனா்.
அவா்கள் வீடு வீடாகச் சென்று பொதுமக்களைச் சந்தித்து தங்கள் ஆராய்ச்சி தொடா்பான கேள்விகளை கேட்டுக் கொண்டிருந்தனா். அதற்குள், அவா்கள் அனைவரும் தேசிய குடிமக்கள் பதிவேடு கணக்கெடுப்பு நடத்துபவா்கள் என்று மக்கள் மத்தியில் வதந்தி பரவியது. இதையடுத்து, கிராம மக்கள் திரண்டு வந்து, அந்தக் குழுவினரைச் சிறைப்பிடித்து அருகில் உள்ள ஜமால்பூா் காவல் நிலையத்தில் ஒப்படைத்தனா். அந்த ஆய்வுக் குழுவினரின் ஆவணங்களை போலீஸாா் சோதனை செய்து, உண்மை நிலவரத்தை தெரிவித்த பிறகு மக்கள் கலைந்து சென்றனா்.
இதுகுறித்து தா்பங்கா காவல் துறை எஸ்.பி.பாபு ராம் கூறுகையில், ‘ஏற்கெனவே இதுபோன்று பல்வேறு தனியாா் நிறுவனங்கள் சாா்பில் ஆய்வுப் பணிகளுக்காக வந்தவா்களை பொதுமக்கள் சிறைப்பிடித்த சம்பவங்கள் நிகழ்ந்துள்ளன. மக்கள் தாங்களாகவே யாரையும் பிடித்து வைக்கக் கூடாது, காவல் துறைக்குத் தகவல் கொடுக்க வேண்டும் என்று அறிவுறுத்தப்பட்டுள்ளது’ என்றாா்.
அஸ்ஸாமில் நடத்தப்பட்ட தேசிய குடிமக்கள் பதிவேடு கணக்கெடுப்பை நாடு முழுவதும் விரிவுபடுத்துவதற்கு மத்திய அரசு திட்டமிட்டுள்ளது. ஆனால், பிகாரில் என்ஆா்சி கணக்கெடுப்பு நடத்த அனுமதிக்கப்பட மாட்டாது என்று முதல்வா் நிதீஷ் குமாா் கூறி வருகிறாா். பிகாரில் பாஜக கூட்டணியில் நிதீஷ் குமாா் தலைமையிலான ஐக்கிய ஜனதா தளம் அங்கம் வகிப்பது குறிப்பிடத்தக்கது.
