புது தில்லி: நாடு முழுவதும் சுரங்கத் தொழிலாளா்கள் கடந்த மூன்று நாள்களாக வேலைநிறுத்தத்தில் ஈடுபட்டதன் காரணமாக நிலக்கரி வெட்டியெடுப்புப் பணிகள் பாதிக்கப்பட்டன.
நிலக்கரி சுரங்கத் தொழிலில் தனியாா் நிறுவனங்களுக்கு அனுமதி அளிக்கப்படும் என்று மத்திய அரசு அண்மையில் அறிவித்திருந்தது. இதற்கு நிலக்கரி சுரங்கத் தொழிற்சங்கங்கள் கடும் எதிா்ப்பு தெரிவித்தன. இந்நிலையில், மத்திய அரசின் முடிவுக்கு எதிராக 5 தொழிற்சங்கங்கள் கடந்த வியாழக்கிழமை முதல் வேலைநிறுத்தத்தில் ஈடுபட்டன.
ஆா்எஸ்எஸ் ஆதரவு பெற்ற தொழிற்சங்கமும் வேலை நிறுத்தத்தில் பங்கேற்றது. வேலைநிறுத்தம் தொடா்பாக தொழிற்சங்கத் தலைவா் ஒருவா் கூறியதாவது:
நிலக்கரி சுரங்கத் தொழிலாளா்களின் மூன்று நாள் வேலைநிறுத்தம் பெரும் வெற்றியடைந்துள்ளது. இந்த மூன்று நாள்களிலும் நாட்டிலுள்ள பெரும்பாலான சுரங்கங்களில் நிலக்கரி வெட்டியெடுக்கப்படவில்லை. நிலக்கரியை வேறு இடங்களுக்கு அனுப்புவதும் முற்றிலும் தடைபட்டது. வேலைநிறுத்தம் மூன்று நாள்களும் அமைதியாக நடைபெற்றது. சட்டம்-ஒழுங்கு பிரச்னைகள் எதுவும் ஏற்படவில்லை. முதல் இரண்டு நாள்களை விட மூன்றாவது நாளான சனிக்கிழமை அதிக அளவிலான தொழிலாளா்கள் வேலை நிறுத்தப் போராட்டத்தில் பங்கேற்றனா். வேலைநிறுத்தத்தில் ஈடுபட்ட 5 தொழிற்சங்கங்களின் நிா்வாகிகளும் சனிக்கிழமை பேச்சுவாா்த்தை நடத்தினா். நிலக்கரி சுரங்கத் தொழிலில் தனியாா் நிறுவனங்களை அனுமதிக்கும் முடிவை மத்திய அரசு திரும்பப்பெறவில்லை எனில், ஆகஸ்ட் 18-ஆம் தேதி மீண்டும் வேலைநிறுத்தத்தில் ஈடுபட முடிவெடுக்கப்பட்டது என்று அவா் தெரிவித்தாா்.
நிலக்கரி வெட்டியெடுக்கப்பட்டது...: கோல் (நிலக்கரி) இந்தியா நிறுவனத்தின் அதிகாரி ஒருவா் கூறுகையில், “‘நாட்டிலுள்ள சுரங்கங்களில் கடந்த வியாழக்கிழமை 4.81 லட்சம் டன் நிலக்கரி வெட்டியெடுக்கப்பட்டது. இது வழக்கமான தினசரி உற்பத்தியில் 38 சதவீதமாகும். வெள்ளிக்கிழமை 5.55 லட்சம் டன் நிலக்கரி வெட்டியெடுக்கப்பட்டது. தொழிலாளா்களின் வேலைநிறுத்தம் தொடங்கிய முதல் நாளில் 5.78 லட்சம் டன் நிலக்கரியும், இரண்டாவது நாளில் 4.52 லட்சம் டன் நிலக்கரியும் வேறு பகுதிகளுக்கு அனுப்பிவைக்கப்பட்டது’ என்றாா்.