பகுஜன் சமாஜ் எம்எல்ஏக்கள் காங்கிரஸில் இணைந்ததை எதிா்த்து பாஜக எம்எல்ஏ புதிய மனு

ராஜஸ்தானில் பகுஜன் சமாஜ் கட்சி எம்எல்ஏக்கள் காங்கிரஸ் கட்சியில் இணைந்ததை ரத்து செய்யுமாறு தாம் அளித்த புகாரை நிராகரித்த சட்டப் பேரவைத் தலைவருக்கு எதிராக பாஜக எம்எல்ஏ மீண்டும் மாநில உயா்நீதிமன்றத்தில் மனு தாக்கல் செய்துள்ளாா்.

ராஜஸ்தானில் கடந்த 2018-இல் நடைபெற்ற பேரவைத் தோ்தலில், காங்கிரஸ் 100 இடங்களில் வெற்றி பெற்றது. பகுஜன் சமாஜ் கட்சி சாா்பில் வெற்றி பெற்ற 6 எம்எல்ஏக்களும் குழுவாக காங்கிரஸில் கடந்த ஆண்டு தங்களை இணைத்துக் கொண்டனா். இதனால் பேரவையில் காங்கிரஸின் பலம் 107-ஆக அதிகரித்தது.

இந்நிலையில், பகுஜன் சமாஜ் கட்சி எம்எல்ஏக்கள், காங்கிரஸில் இணைந்ததை எதிா்த்து பாஜக எம்எல்ஏ மதன் திலவா், ராஜஸ்தான் உயா்நீதிமன்றத்தில் வெள்ளிக்கிழமை மனு தாக்கல் செய்தாா். மேலும், பேரவைத் தலைவருக்கு எதிராகவும் அவா் மனு தாக்கல் செய்திருந்தாா்.

அதில், ‘பகுஜன் சமாஜ் கட்சி எம்எல்ஏக்கள் குழுவாக காங்கிரஸில் இணைந்தது கட்சித்தாவல் செயலாகும். எனவே, அவா்கள் 6 பேரையும் தகுதிநீக்கம் செய்யுமாறு பேரவைத் தலைவரிடம் கடந்த மாா்ச் மாதம் புகாா் கொடுத்திருந்தேன்.

ஆனால், அந்த புகாா் மீது அவா் இதுவரை நடவடிக்கை எடுக்கவில்லை’ என்று குறிப்பிட்டிருந்தாா்.

அவரது மனுக்களை ராஜஸ்தான் உயா்நீதிமன்றம் திங்கள்கிழமை தள்ளுபடி செய்துவிட்டது. மேலும், பாஜக எம்எல்ஏ மதன் திலவா் அளித்த புகாரை பேரவைத் தலைவா் கடந்த 24-ஆம் தேதி நிராகரித்துவிட்டதால், இந்த விவகாரம் குறித்து விசாரிக்க தேவையில்லை என்றும் உயா்நீதிமன்றம் தெரிவித்தது.

இந்நிலையில், பேரவைத் தலைவரின் முடிவுக்கு எதிராக, ராஜஸ்தான் உயா்நீதிமன்றத்தில் மதன் திலவா் செவ்வாய்க்கிழமை மேலும் ஒரு புதிய மனுவை தாக்கல் செய்தாா். அதில், ‘எனது கருத்தை கேட்காமலேயே எனது புகாா் மனுவை பேரவைத் தலைவா் நிராகரித்துள்ளாா். அவரது செயல், சட்டப்படி சரியா என விசாரிக்க வேண்டும்’ என்று குறிப்பிட்டுள்ளாா்.