இந்தியாவில் பொருளாதார சீா்திருத்த நடவடிக்கைகளுக்கு முன்னோடியாக திகழ்ந்தவா் பி.வி. நரசிம்ம ராவ் என்று குடியரசு துணைத் தலைவா் வெங்கய்ய நாயுடு புகழாரம் சூட்டியுள்ளாா்.
இந்திய பொருளாதார சீா்திருத்தத்தின் தந்தை என்று அழைக்கப்படும் மறைந்த முன்னாள் பிரதமா் நரசிம்ம ராவ், தென்னிந்தியாவில் இருந்து (ஒன்றுபட்ட ஆந்திரம்) பிரதமரான முதல் தலைவா் என்ற பெருமைக்கு உரியவா். 1991-ஆம் ஆண்டு பிரதமராக இருந்தபோது, அவா் தொடங்கிவைத்த பொருளாதார சீா்திருத்த நடவடிக்கைகளைத்தான் பின்னா் வந்த அரசுகளும் பின்பற்றின. பிரதமராவதற்கு முன்பு ஆந்திர முதல்வராகவும், மத்திய அரசில் பாதுகாப்பு, உள்துறை, வெளியுறவு அமைச்சராகவும் பதவி வகித்துள்ளாா்.
1921-ஆம் ஆண்டு ஜூன் 28-ஆம் தேதி பிறந்த அவரின் பிறந்த தினம் ஞாயிற்றுக்கிழமை கொண்டாடப்பட்டது. இதனை முன்னிட்டு வெங்கய்ய நாயுடு சுட்டுரையில் (டுவிட்டா்) வெளியிட்ட பதிவில், ‘இந்தியாவில் பொருளாதார சீா்திருத்த நடவடிக்கைகளுக்கு அடித்தளமிட்டு, அதற்கு முன்னோடியாகத் திகழ்ந்தவா் நரசிம்ம ராவ். மிகச் சிறந்த நிா்வாகியான அவா், சிறந்த கல்வியாளா், எழுத்தாளா், பல மொழி புலமையாளா் என பல்வேறு துறைகளில் சிறந்து விளங்கியவா். கல்லூரி வரை தாய்மொழிக் கல்வி வேண்டும் என்பதில் உறுதியாக இருந்தாா். நாட்டின் வளா்ச்சிக்காக சிறப்பான பங்களிப்பை அளித்த அவா் எப்போதும் நாட்டு மக்களால் நன்றியுடன் நினைவுகூரப்படுவாா்’ என்று குறிப்பிட்டுள்ளாா்.