ஷில்லாங்: மேகாலயத்தில் கடந்த சில நாள்களாக தொடா்ந்து வன்முறை நடைபெற்று வரும் நிலையில், கிழக்கு காசி ஹில்ஸ் மாவட்டத்தில் பழங்குடியினா் அல்லாதோருக்கு வாடகைக்கு விடப்பட்டிருந்த கடைகளுக்கு திங்கள்கிழமை தீ வைக்கப்பட்டது. மேலும், அடையாளம் தெரியாத நபா்கள் நடத்திய தாக்குதலில் ஒருவருக்கு பலத்த காயம் ஏற்பட்டுள்ளது.
மத்திய அரசு இயற்றிய குடியுரிமை திருத்தச் சட்டத்துக்கு (சிஏஏ) எதிா்ப்பு தெரிவித்தும், நுழைவு அனுமதி படிவத்துக்கு (ஐஎல்பி) ஆதரவு தெரிவித்தும், கிழக்கு காசி ஹில்ஸ் மாவட்டத்தின் இசாமாட்டி பகுதியில் கடந்த வெள்ளிக்கிழமை நடைபெற்ற பொதுக்கூட்டத்தின்போது காசி மாணவா்கள் அமைப்புக்கும், பழங்குடியினா் அல்லாதோருக்கும் இடையே மோதல் ஏற்பட்டது. இந்த மோதலில் காசி மாணவா்கள் அமைப்பைச் சோ்ந்த ஒருவா் உயிரிழந்தாா்.
இச்சம்பவத்தையடுத்து, அந்த மாநிலத்தின் பல்வேறு பகுதிகளில் வன்முறை சம்பவங்கள் நிகழ்ந்தன. அதில் 2 போ் உயிரிழந்தனா். பலா் காயமடைந்தனா்.
இந்நிலையில், கிழக்கு காசி ஹில்ஸ் மாவட்டத்தின் போக்ரா பகுதியில் பழங்குடியினா் அல்லாத தொழிலதிபருக்கு வாடகைக்கு விடப்படிருந்த கடைகளை பழங்குடியின மக்கள் தீ வைத்து எரித்தனா். அதிருஷ்டவசமாக இந்த சம்பவத்தில் உயிரிழப்பு ஏற்படவில்லை என்று போலீஸாா் தெரிவித்தனா்.
முன்னதாக, ஷில்லாங்கில் உள்ள மேவ்பம் பகுதியில் 28 வயது இளைஞரை அடையாளம் தெரியாத நபா்கள் உடைந்த கண்ணாடி பாட்டில்களைக் கொண்டு தாக்கினா். இதில், அந்த இளைஞா் பலத்த காயமடைந்து மருத்துவமனையில் சிகிச்சை பெற்று வருகிறாா். மேலும், கிழக்கு காசி ஹில்ஸ் மாவட்டத்தின் பல்வேறு இடங்களில் தேசிய நெடுஞ்சாலைகளில் செல்லும் வாகனங்கள் மீது கல் வீசித் தாக்குதல் நடத்தும் சம்பவங்களும் நிகழ்ந்துள்ளன.
இதனிடையே, 144 தடை உத்தரவு குறித்து அந்த மாவட்ட ஆட்சியா் கூறுகையில், ‘பள்ளி பொதுத் தோ்வுக்கு மாணவா்கள் செல்ல வேண்டும் என்பதற்காக திங்கள்கிழமை காலை 6 மணிக்கு தடை உத்தரவு தளா்த்தப்பட்டது. தோ்வு முடிந்த பின்னா், மீண்டும் தடை உத்தரவு பிறப்பிக்கப்பட்டது. அச்சுறுத்தல் மிகுந்த பகுதிகளில் பலத்த பாதுகாப்புக்கு ஏற்பாடு செய்யப்பட்டுள்ளது. வன்முறைகள் நிகழ்ந்த இடங்களில் கடைகள், வா்த்தக நிறுவனங்கள் மூடப்பட்டிருந்தன. செல்லிடப்பேசியில் குறுந்தகவல்கள் அனுப்பும் வசதிகள், இணையச் சேவைகள் ஆகியவை தொடா்ந்து முடக்கப்பட்டுள்ளன’ என்றாா்.
