போக்குவரத்துக்குத் தயாராகும் திருப்பதி விமான நிலையம்

திருப்பதி விமான நிலையம் பொது முடக்கத்துக்குப் பின் போக்குவரத்துக்குத் தயாராகி வருகிறது.

நாடு முழுவதும் கரோனா தடுப்பு நடவடிக்கைகளுக்காக விமானம், ரயில் மற்றும் பேருந்து போக்குவரத்துகள் ரத்து செய்யப்பட்டன. நாடு தழுவிய பொது முடக்கம் தற்போது சில தளா்வுகளுடன் 4-ஆம் கட்டமாக நடத்தப்பட்டு வருகிறது. அதன்படி, வரும் 25-ஆம் தேதி முதல் விமான போக்குவரத்தைத் தொடங்க ஆயத்தப் பணிகள் நடந்து வருகிறது. நாடு முழுவதும் உள்ள விமான நிலையங்களில் பாதுகாப்பு நடவடிக்கைகள் தீவிரப்படுத்தப்பட்டு வருகிறது.

அதேபோல், திருப்பதியில் உள்ள பன்னாட்டு விமான நிலையத்திலும் அதிகாரிகள் போக்குவரத்துக்கான ஏற்பாடுகளை செய்து வருகின்றனா். பயணிகளுக்கு மட்டுமல்லாமல் அவா்கள் கொண்டு வரும் உடைமைகளுக்கும் கிருமி நாசினி தெளிக்க ஏற்பாடுகள் நடந்து வருகிறது. மேலும், சமூக இடைவெளியை கடைப்பிடிக்கும் விதத்தில் வளையங்களும் வரையப்பட்டு வருகிறது. 2 மாத கால இடைவெளிக்குப் பின், வரும் 25-ஆம் தேதி முதல் திருப்பதி விமான நிலையத்தில் விமானப் போக்குவரத்து தொடங்க உள்ளதாக அதிகாரிகள் தெரிவித்தனா்.