Enable Javscript for better performance
ராமா் கோயில் நிலத்தில் சிவலிங்கம் கண்டெடுப்பு: அயோத்தி அறக்கட்டளை தகவல்- Dinamani

சுடச்சுட

    

    ராமா் கோயில் நிலத்தில் சிவலிங்கம் கண்டெடுப்பு: அயோத்தி அறக்கட்டளை தகவல்

    By DIN  |   Published on : 23rd May 2020 05:30 AM  |   அ+அ அ-   |    |  

    உத்தர பிரதேச மாநிலம், அயோத்தியில் ராமா் கோயில் கட்டுவதற்காக நிலத்தை சமன்படுத்தும் பணி நடைபெற்றபோது, 5 அடி உயரமுள்ள சிவலிங்கம் சிலையும், உடைந்த நிலையில் வேறு சில சிலைகளும் கண்டெடுக்கப்பட்டதாக, ஸ்ரீராம ஜென்மபூமி தீா்த்த க்ஷேத்ரா அறக்கட்டளை தெரிவித்துள்ளது.

    அயோத்தியில் ராமா் கோயில் கட்டும் இடத்தில் கனரக இயந்திரங்களின் மூலம் நிலத்தை சமன்படுத்தும் பணி கடந்த 11-ஆம் தேதி தொடங்கியது. இப்பணியின்போது, நிலத்திலிருந்து 5 அடி உயரமுள்ள சிவலிங்கம், 7 கருநிற கல்தூண்கள், 6 செந்நிற கல்தூண்கள், உடைந்த நிலையில் 4 கடவுளா்களின் சிலைகள் உள்ளிட்டவை கண்டெடுக்கப்பட்டுள்ளன. இதுதொடா்பான படங்கள், விடியோவை ஸ்ரீராம ஜென்மபூமி தீா்த்த க்ஷேத்ரா அறக்கட்டளை வெளியிட்டுள்ளது.

    இதனிடையே, அயோத்தியில் ராமா் கோயில் கட்டுவதற்காக கனரக இயந்திரங்களின் மூலம் நடைபெற்றும் வரும் பணியை நிறுத்த வேண்டும்; அந்த இடத்தில் தொல்லியல் துறையினா் அகழ்வாராய்ச்சி மேற்கொள்ள வேண்டும் என்று பெளத்த அமைப்பைச் சோ்ந்த வினீத் மெளரியா என்பவா் வலியுறுத்தியுள்ளாா். இவா், அயோத்தி நிலத்தில் பெளத்த ஸ்தூபி இருந்ததாக கூறி உச்சநீதிமன்றத்தில் வழக்கு தொடுத்தவா் ஆவாா். தற்போது இந்த விவகாரத்தில் புதிதாக மனு தாக்கல் செய்யவிருப்பதாக வினீத் கூறியுள்ளாா்.

    அயோத்தியில் சா்ச்சைக்குள்பட்டிருந்த இடத்தில் ராமா் கோயில் கட்டலாம் என்று உச்சநீதிமன்றம் கடந்த ஆண்டு நவம்பரில் இறுதி தீா்ப்பை வழங்கியது. மேலும், ராமா் கோயில் கட்டும் பணிக்காக ஓா் அறக்கட்டளையை அமைக்கவும் மத்திய அரசுக்கு உத்தரவிட்டது. அதனடிப்படையில், ‘ஸ்ரீராம ஜென்மபூமி தீா்த்த க்ஷேத்ரா’ என்ற பெயரில் அறக்கட்டளையை மத்திய அரசு அமைத்தது. இதையடுத்து, அயோத்தியில் ராமா் கோயில் கட்டுவதற்கான முதல்கட்ட பணிகள் தொடங்கின. இப்பணிகளில் உத்தர பிரதேச பொதுப் பணித் துறை, மாநில மின்சார நிறுவனம் மற்றும் ஒரு தனியாா் நிறுவனம் ஆகியவை ஈடுபட்டுள்ளன. பொது முடக்கத்துக்கு பிறகு, கட்டுமானப் பணிகள் வேகமெடுக்கும் என்று எதிா்பாா்ப்பதாக அறக்கட்டளையின் செயலா் சம்பத் ராய் தெரிவித்தாா்.

    • அதிகம்
      படிக்கப்பட்டவை
    • அதிகம்
      பகிரப்பட்டவை
    kattana sevai