திருப்பதி ஏழுமலையானுக்கு நிவேதனம் செய்த பின் விற்கப்படும் பெரிய லட்டு விலையை தேவஸ்தானம் பாதியாகக் குறைத்துள்ளது.
ஏழுமலையானுக்கு தினசரி கல்யாண உற்சவம் நடைபெற்று வருகிறது. வழக்கமாக கல்யாண உற்சவத்தில் தினசரி ஆயிரகணக்கான பக்தா்கள் கலந்து கொள்வா். தற்போது பொது முடக்கம் காரணமாக பக்தா்களுக்கு அனுமதி ரத்து செய்யப்பட்டாலும் தினசரி கோயிலுக்குள் ஸ்ரீதேவி, பூதேவி சமேத மலையப்ப சுவாமிக்கு கல்யாண உற்சவம் நடத்தப்பட்டு வருகிறது. அப்போது 500 பெரிய லட்டுகளும், 500 வடைகளும் நிவேதனமாக படைக்கப்படுகின்றன.
இந்த பிரசாதங்கள் திருப்பதியில் உள்ள தேவஸ்தான தலைமை அலுவலகத்தில் பக்தா்களுக்கு விற்கப்படுகின்றன. பெரிய லட்டு ஒன்று ரூ.200 வீதமும், வடை ஒன்று ரூ.100 வீதமும் விற்பனை செய்யப்படுகின்றன.
பொது முடக்கத்தை முன்னிட்டு சிறிய லட்டின் விலையை பாதியாக குறைத்த தேவஸ்தானம், பெரிய லட்டின் விலையையும் பாதியாக குறைத்துள்ளது. வெள்ளிக்கிழமை முதல் பெரிய லட்டு ஒன்று ரூ.100 வீதம் விற்கப்படுவது குறிப்பிடத்தக்கது.