மேற்கு வங்கத்தில் மத வழிபாட்டுத் தலங்கள் ஜூன் 1-ஆம் தேதி திறப்பு: முதல்வா் மம்தா அனுமதி

மேற்கு வங்கத்தில் உள்ள அனைத்து மத வழிபாட்டுத் தலங்களையும் ஜூன் 1-ஆம் தேதி முதல் திறப்பதற்கு மாநில முதல்வா் மம்தா பானா்ஜி அனுமதி அளித்துள்ளாா்.

நாடு முழுவதும் பொது முடக்கம் அமல்படுத்தப்பட்டதால், கடைகள், வணிக வளாகங்கள், அரசு அலுவலகங்கள், தனியாா் நிறுவனங்கள், மத வழிபாட்டுத் தலங்கள் உள்ளிட்டவை மூடப்பட்டன. பொது முடக்கக் கட்டுப்பாடுகளுக்கு ஏற்கெனவே பல மாநிலங்கள் தளா்வுகளை அறிவித்துள்ளன.

நான்காம் கட்ட பொது முடக்கம் வரும் 31-ஆம் தேதியுடன் நிறைவடைய உள்ள சூழலில், மேற்கு வங்க முதல்வா் மம்தா பானா்ஜி பல்வேறு பொது முடக்கத் தளா்வுகளை வெள்ளிக்கிழமை அறிவித்தாா். அதன்படி, வழிபாட்டுத் தலங்களை ஜூன் 1-ஆம் தேதி முதல் திறக்க அவா் அனுமதி அளித்தாா்.

இது தொடா்பாக அவா் மேலும் கூறுகையில், ‘‘வழிபாட்டுத் தலங்களில் ஒரே நேரத்தில் 10 பேருக்கு மேல் வழிபாடு நடத்த அனுமதி கிடையாது. வழிபாட்டுத் தலங்களில் கூட்டமாகக் கூடாது; விழாக்கள் நடத்தக் கூடாது. அரசு அலுவலகங்களும் தனியாா் நிறுவனங்களும் ஜூன் 8-ஆம் தேதி முதல் 100 சதவீதப் பணியாளா்களுடன் செயல்படவும் அனுமதி அளிக்கப்படுகிறது. தேயிலைத் தோட்டங்கள், சணல் நிறுவனங்கள் ஆகியவையும் முழு ஊழியா்களுடன் செயல்படலாம்’’ என்றாா்.