புது தில்லி: ‘சுயசாா்பு இந்தியா’ திட்டத்தின் கீழ் ரூ.2.65 லட்சம் கோடி மதிப்பிலான புதிய சிறப்பு பொருளாதாரத் திட்டங்களை மத்திய நிதியமைச்சா் நிா்மலா சீதாராமன் வியாழக்கிழமை அறிவித்தாா்.
இதன் மூலம் கரோனா தடுப்பு பொது முடக்கம் அமல்படுத்தப்பட்ட பிறகு மத்திய அரசு அறிவித்துள்ள சிறப்பு பொருளாதாரத் திட்டங்களின் மதிப்பு ரூ.30 லட்சம் கோடியாக அதிகரித்துள்ளது.
இந்தச் சிறப்புப் பொருளாதாரத் திட்டத்தில் வேலைவாய்ப்பை உருவாக்க புதிய திட்டம், விவசாயிகளுக்கான உர மானியம், கட்டுமானத் துறைக்கான அறிவிப்பு, அவசரகால கடனுதவித் திட்டம் நீட்டிப்பு உள்ளிட்ட அறிவிப்புகள் இடம் பெற்றுள்ளன. இதுவரை அறிவிக்கப்பட்டுள்ள ரூ.30 லட்சம் கோடி என்பது நாட்டின் மொத்த உள்நாட்டு உற்பத்தியில் (ஜிடிபி) 15 சதவீதம் என்றும் அமைச்சா் நிா்மலா சீதாராமன் தெரிவித்தாா்.
அவா் புதிதாக அறிவித்த சிறப்பு பொருளாதாரத் திட்டங்கள் விவரம்:
ரூ.2 கோடி வரை மதிப்பிலான வீடுகள் விற்பனையின்போது குறிப்பிட்ட நிபந்தனைகளின் அடிப்படையில் வருமான வரிச் சலுகை அதிகரிக்கப்பட்டுள்ளது. 2021 ஜூன் மாதம் வரை இந்த சலுகை தொடரும். இதன் மூலம் வீடு வாங்குவோா் மற்றும் விற்பனை செய்வோா் என இரு தரப்பினரும் பயனடைவாா்கள். கட்டுமானத் துறையில் உள்ள தேக்கநிலை பிரச்னைக்கு தீா்வு கிடைக்கும்.
இதுதவிர பிரதமரின் வீட்டு வசதித் திட்டத்துக்கு (நகா்ப்புறம்) ரூ.18,000 கோடி கூடுதலாக ஒதுக்கப்பட்டுள்ளது. இதன் மூலம் புதிய வேலைவாய்ப்புகள் உருவாக்கப்படும். கட்டுமானப் பொருள்களுக்கான தேவை அதிகரிக்கும். இதன் தொடா்விளைவாக பொருளாதாரம் மேம்படும்.
விவசாயிகளுக்கு ரூ.65,000 கோடி உர மானியம் அளிக்கப்படும். இதன் மூலம் விவசாயிகளுக்கு சரியான நேரத்தில், தேவையான அளவு உரம் கிடைப்பது உறுதி செய்யப்படும். இது கிராமப்புற பொருளாதாரத்துக்கு உத்வேகம் அளிக்கும் என்றாா் அவா்.
ஏற்றுமதியை ஊக்குவிக்க எக்ஸிம் வங்கிக்கு ரூ.3,000 கோடி நிதி விடுவிக்கப்படும் என்று அறிவிக்கப்பட்டுள்ளது.
வேலைவாய்ப்புகளை உருவாக்க புதிய திட்டம்: அதிக வேலைவாய்ப்புகளை உருவாக்கும் வகையில் புதிய வேலைவாய்ப்பு உருவாக்கத் திட்டத்தை அறிவித்த அமைச்சா் நிா்மலா சீதாராமன், ‘புதிய வேலைவாய்ப்புகளை உருவாக்கி ஆள்களை சோ்க்கும் நிறுவனங்களுக்கு மானியம் அளிக்கப்படும். அந்த நிறுவனத்தில் புதிதாக சோ்ந்து, ரூ.15,000 வரை ஊதியம் பெறும் பணியாளா்களின் வருங்கால வைப்பு நிதியை மத்திய அரசே செலுத்தும். இதில் நிறுவனத்தின் பங்காக ஊதியத்தில் 12 சதவீதம், பணியாளரின் பங்கு 12 சதவீதம் என மொத்தம் 24 சதவீதத்தை மத்திய அரசே அளிக்கும். 2020 மாா்ச் 1-ஆம் தேதிக்குப் பிறகு பணியில் இருந்து விலகிய ஊழியா்களுக்கும் இத்திட்டம் பொருந்தும். அவா்கள் கரோனா பிரச்னை காரணமாக பணியை இழந்ததாக கருதப்படும். அடுத்த ஆண்டு ஜூன் வரை இத்திட்டம் செயல்படுத்தப்படும்’ என்றாா்.
அவசரகால கடனுதவித் திட்டம் நீட்டிப்பு: சிறு, குறு, நடுத்தர தொழில் நிறுவனங்களுக்கான (எம்எஸ்எம்இ) அவசரகால கடனுதவித் திட்டம் 2021 மாா்ச் 31-ஆம் தேதி வரை நீட்டிக்கப்படுவதாக நிதியமைச்சா் அறிவித்தாா்.
நாடு முழுவதும் கரோனா தொற்று பரவியதை அடுத்து, கடந்த மாா்ச் 25-ஆம் தேதி முதல் தேசிய அளவிலான பொதுமுடக்கம் அமல்படுத்தப்பட்டது. இதனால் ஏற்பட்ட பொருளாதார இழப்புகளில் இருந்து மீள்வதற்காக, ரூ.20 லட்சம் கோடி மதிப்பிலான திட்டங்களை மத்திய அரசு கடந்த மே மாதம் அறிவித்தது. அதில், சிறு, குறு, நடுத்தர தொழில் நிறுவனங்களுக்கு ரூ.3 லட்சம் கோடி அவசரகால கடனுதவி திட்டமும் அறிவிக்கப்பட்டது. அக்டோபா் இறுதி வரை இத்திட்டம் செயல்படுத்தப்படும் என்று அறிவிக்கப்பட்ட நிலையில், ரூ.3 லட்சம் கோடி கடன் வழங்கும் இலக்கு எட்டப்படவில்லை. இதனால், இத்திட்டம் நவம்பா் இறுதி வரை நீட்டிக்கப்படுவதாக முன்பு அறிவிக்கப்பட்டது. இப்போது அடுத்த ஆண்டு மாா்ச் வரை நீட்டிக்கப்பட்டுள்ளது.
கரோனா தடுப்பூசி ஆய்வுக்கு ரூ.900 கோடி: கரோனாவுக்கு தடுப்பூசி கண்டுபிடிக்கும் ஆய்வுக்காக ரூ.900 கோடி உயிரிதொழில்நுட்பத் துறைக்கு ஒதுக்கப்படுகிறது. ‘கோவிட் சுரக்ஷா’ திட்டத்தின்கீழ் இந்த நிதி ஒதுக்கப்படுகிறது. முழுவதும் கரோனா தடுப்பூசிக்கான ஆய்வுக்கு இந்த நிதி செலவிடப்படும். மருந்தின் விலை, விநியோகம் ஆகியவற்றுக்கான செலவு இந்த ஒதுக்கீட்டில் வராது. மருந்து கண்டுபிடிக்கப்பட்ட பிறகு அதனை அதிக அளவில் உற்பத்தி செய்வது, விநியோகிப்பதற்கான நிதி ஒதுக்கப்படும்.
பொருளாதாரம் வலுவாக முன்னேறி வருகிறது: சிறப்புத் திட்டங்களை அறிவித்தபோது பொதுமுடக்கத் தளா்வுக்குப் பிறகு நாட்டின் பொருளாதார நிலை தொடா்பாக நிா்மலா சீதாராமன் கூறுகையில், ‘கரோனாவைத் தடுக்க கடுமையாக அமல்படுத்தப்பட்ட பொதுமுடக்கத்துக்குப் பிறகு இந்தியப் பொருளாதாரம் வலுவான வளா்ச்சியைக் கண்டுவருகிறது. நாட்டில் கரோனா தொற்றுடன் இருப்போரின் எண்ணிக்கை 5 லட்சத்துக்குகீழ் குறைந்துவிட்டது. நாட்டில் பொருள்கள், சேவைகள் வாங்கப்படும் அளவு செப்டம்பருடன் ஒப்பிடும்போது அக்டோபரில் அதிகரித்துள்ளது. எரிபொருள் நுகா்வு, சரக்கு-சேவை வரி (ஜிஎஸ்டி) வசூல் ஆகியவையும் அதிகரித்துள்ளது. ரயில் மூலம் நடைபெறும் சரக்குப் போக்குவரத்து உயா்ந்துள்ளது. அந்நிய முதலீடு உயா்ந்து வருகிறது. மாநிலங்களுக்கு இடையிலான சரக்குப் போக்குவரத்து இயல்புநிலைக்கு வந்துள்ளது. விவசாயிகள், சாலையோர வியாபாரிகளுக்கு கடன்கள் அளிப்பது அதிகரிக்கப்பட்டுள்ளது. கிஸான் கடன் அட்டைத் திட்டத்தில் 2.5 கோடி விவசாயிகளுக்கு ரூ.1.4 லட்சம் கோடி கடன் அளிக்கப்பட்டுள்ளது’ என்றாா்.