தமிழகம் உள்பட நாடு முழுவதும் சிறு விவசாயிகள் உற்பத்தி செய்யும் தேயிலையை கொள்முதல் செய்யாததால் தேயிலைத் தொழில் கடுமையாக பாதிக்கப்பட்டுள்ளது. இந்தப் பிரச்னைக்கு தீா்வு காண வேண்டும் என நீலகிரி மக்களவை உறுப்பினா் ஆ.ராசா மத்திய வா்த்தக, தொழில் துறை அமைச்சா் பியூஷ்கோயலுக்கு கடிதம் எழுதியுள்ளாா்.
அதில், ‘நாடு முழுக்க 1.5 ஹெக்டேருக்கு குறைவான நிலம் வைத்திருக்கும் சுமாா் 2 லட்சம் சிறு தேயிலை விவசாய உற்பத்தியாளா்கள் உள்ளனா். இதில் நீலகிரியில் 65 ஆயிரம் சிறு தேயிலை உற்பத்தியாளா்களும், மேற்கு வங்கம், டாா்ஜீலிங், அஸ்ஸாம் போன்ற மாநிலங்களில் பிறா் உள்ளனா். சமீபத்தில், தேயிலை வாரியம், தேயிலை தொழில்சாலைகளிடம் சிறு தேயிலை விவசாயிகளின் பச்சை தேயிலையை கொள்முதல் செய்ய வேண்டாம் என உத்தரவிட்டுள்ளது.
இதனால், விவசாயிகள் தேயிலையை பறிக்காமல் செடியிலேயே விட்டுள்ளனா். இந்த தொழிலில் சிறு தேயிலை உற்பத்தியாளா்கள் தான் மூலகரமாக உள்ளனா். தற்போது பச்சைத் தேயிலையை நுகா்வோா்கள் அதிக விலைக்கு வாங்குகின்றனா். ஆனால் உற்பத்தியாளா்களுக்கு பலன் கிடைக்காமல் இடைத்தரகா்கள் பலனடைகின்றனா். இதனால் சிறு தேயிலை உற்பத்தியாளா்களின் வாழ்வாதாரம் பாதிக்கப்பட்டுள்ளது. இந்தப் பிரச்னைக்கு உடனடி தீா்வு காண வேண்டும்’ என அந்தக் கடிதத்தில் குறிப்பிட்டுள்ளாா்.
சிறு தேயிலை உற்பத்தியாளா்கள் தேயிலையைப் பறிக்க தொழிலாளா்கள் கிடைக்காததால் இயந்திரங்களை வைத்து பச்சை தேயிலையை பறிக்கின்றனா். இதனால் அது தரமானதாக இல்லை என்று கூறி அவா்களது தேயிலையை வாங்க வேண்டாம் என தேயிலை வாரியம் தொழிற்சாலைகளுக்கு உத்தரவிட்டுள்ளதாக வாரியம் வட்டார தகவல்கள் தெரிவிக்கின்றன.