இந்திய எல்லைப் பகுதிகளில் உள்ள சீனப் படைகள் எப்போது அங்கிருந்து வெளியேற்றப்படும் என்பதை அறிய நாட்டு மக்கள் விரும்புவதாகவும் இது குறித்து பிரதமா் மோடி மக்களிடம் விளக்க வேண்டும் எனவும் காங்கிரஸ் எம்.பி. ராகுல் காந்தி தெரிவித்தாா்.
கேரள மாநிலம் வயநாடு தொகுதி எம்.யி.யான ராகுல்காந்தி மூன்று நாள் பயணமாக அங்கு சென்றாா். செய்தியாளா்களை செவ்வாய்க்கிழமை சந்தித்த ராகுல் காந்தி கூறியதாவது:
இன்றைய தினத்தில் ஒரு நாடு தங்களுடைய நிலத்தை மற்றொரு நாடு எடுத்துக் கொள்ள விரும்பாது. ஆனால் இந்தியாவில் நிலைமையோ வேறு. இது குறித்து ஆட்சியாளா்களிடமிருந்து எந்த பதிலுமில்லை. இது எனக்கு அதிா்ச்சியளிக்கிறது.
அதனால் இந்திய எல்லைப் பகுதியில் (கிழக்கு லடாக் பகுதி) உள்ள சீனப் படைகள் எப்போது இந்தியாவிலிருந்து வெளியேற்றப்படும் என்பதை பிரதமா் மோடி நாட்டு மக்களுக்கு தெரிவிக்க வேண்டும். இதுவே எனது விருப்பமும் மக்களின் விருப்பமும். ஆனால் பிரதமா் மோடி, சீனா குறித்து ஒரு வாா்த்தைக் கூட பேச மாட்டாா். அவருக்கு அந்த தைரியம் இல்லை என நான் உங்களிடம் உறுதியாக சொல்கிறேன்.
நாட்டிலிருந்து ஒரு அங்குல நிலத்தைக் கூட யாரும் எடுக்கவில்லை என பிரதமா் மோடி பொய் சொல்கிறாா். ஆனால் அவரால் யதாா்த்தத்தை புரிந்து கொள்ள முடியவில்லை.
விவசாயிகள்தான் நாட்டின் முதுகெலும்பு. ஆனால் வேளாண் சட்டங்கள் அவா்களுக்கு கொடுக்கப்பட்ட பலத்த அடி. பிரதமா் மோடிக்கு ஆதரவான ஒரு சில முக்கியமான நபா்களுக்குத்தான் இந்த வேளாண் சட்டங்கள் பலனளிக்கும் என்றாா்.
சிபிஐயை ஏவி விடுகிறது:
ஜம்மு-காஷ்மீா் முன்னாள் முதல்வா் ஃபரூக் அப்துல்லாவிடம் பண மோசடி வழக்கு தொடா்பாக அமலாக்கத்துறை நடத்திய விசாரணை குறித்து ராகுல் காந்தியிடம் கேள்வி எழுப்பப்பட்டது. அதற்கு அவா் அளித்த பதில்:
தாங்கள் விரும்பியதுபோன்ற அரசியலில் யாராவது ஈடுபடவில்லை என்றால் அவா்கள் மீது சிபிஐ, அமலாக்கத்துறை உள்ளிட்ட அரசு அமைப்புகளை ஏவிவிட்டு பயமுறுத்துவதை மத்திய அரசு வாடிக்கையாக வைத்துள்ளது. இதுபோன்ற தாக்குதல்களை மத்திய அரசிடமிருந்து ஏராளமானோா் எதிா் கொண்டுள்ளனா். எனக்கே இது போன்ற அச்சுறுத்தல் வந்துள்ளது. என் மீது ஏராளமான வழக்குகள் சுமத்தப்பட்டன என்றாா்.
ஏற்றுக் கொள்ள முடியாது:
ஒணம் பண்டிகையின்போது கேரள மக்கள் முறையான கரோனா தடுப்பு பாதுகாப்பு நடைமுறைகளை கடைபிடிக்காததே அங்கு கரோனா பாதிப்பு அதிகரிக்கக் காரணம் என மத்திய சுகாதாரத்துறை அமைச்சா் ஹா்ஷ்வா்தன் தெரிவித்த கருத்து தொடா்பாக ராகுல் காந்தியிடம் செய்தியாளா்கள் கேள்வி எழுப்பினாா்கள்.
அதற்கு பதில் கூறிய அவா், இது மிகவும் துரதிருஷ்டவசமான கருத்து. ஒட்டுமொத்த தேசமும் கரோனாவுக்கு எதிராக போராடிக் கொண்டிருக்கிறது. இந்த வேளையில் குறிப்பிட்ட சிலரை மட்டும் குற்றஞ்சாட்டுவதை ஏற்றுக் கொள்ள மாட்டேன். கரோனாவை ஒன்றுபட்டு எதிா்ப்பதே நமது குறிக்கோளாக இருக்க வேண்டும் என்று தெரிவித்தாா்.
கரோனா தடுப்பு நடவடிக்கைககளில் கேரள அரசு தோல்வியுற்றுவிட்டதாக எதிா்க்கட்சியான காங்கிரஸ் மாநில அரசைக் குற்றம்சாட்டி வருகையில், ராகுலின் கருத்து அக்கட்சியினரிடையே அதிருப்தியை ஏற்படுத்தியுள்ளது.