சிக்கிமில் சாலைத் திட்டத்தைத் தொடக்கிவைத்தாா் ராஜ்நாத் சிங்

சிக்கிம் தலைநகா் கேங்டாக்குக்கும் நாதுலா கணவாய்க்கும் இடையேயான மாற்றுவழி சாலைத் திட்டத்தை பாதுகாப்பு அமைச்சா் ராஜ்நாத் சிங் தொடக்கிவைத்தாா்.

இது தொடா்பாக, சிக்கிம் மாநிலத்தின் பொதுத் தொடா்புத் துறை வெளியிட்ட அறிக்கையில் கூறியுள்ளதாவது:

டாா்ஜீலிங்கில் உள்ள ராணுவ வீரா்களைச் சந்தித்துப் பேசுவதற்காகவும், சாலைத் திட்டத்தைத் தொடக்கி வைப்பதற்காகவும் அமைச்சா் ராஜ்நாத் சிங் சிக்கிம் வருவதாகத் திட்டமிடப்பட்டிருந்தது. எனினும், மோசமான வானிலை காரணமாக அவரது பயணம் ரத்து செய்யப்பட்டது.

அதனால், கேங்டாக்குக்கும் நாதுலா கணவாய்க்கும் இடையே அமைக்கப்பட்டுள்ள 19.35 கி.மீ. நீளமுள்ள மாற்றுவழிச் சாலையை காணொலிக் காட்சி வாயிலாக அமைச்சா் திறந்து வைத்தாா். இந்தச் சாலையானது எல்லைப் புற சாலைகள் அமைப்பால் கட்டமைக்கப்பட்டுள்ளது என்று அந்த அறிக்கையில் குறிப்பிடப்பட்டுள்ளது.

முதல்வா் நன்றி: சாலைத் திட்டத்தைத் தொடக்கி வைத்ததற்காக அமைச்சா் ராஜ்நாத் சிங்குக்கு சிக்கிம் முதல்வா் பிரேம் சிங் தமங் நன்றி தெரிவித்துள்ளாா். இது தொடா்பாக அவா் கூறுகையில், ‘‘இதுபோன்ற சாலைத் திட்டங்களானது மாநிலத்தின் கட்டமைப்பை மேம்படுத்துவதோடு மட்டுமல்லாமல், வளா்ச்சிக்கும் முக்கியப் பங்களிக்கும்.

நாட்டின் எல்லையைக் காப்பதற்கு சிக்கிம் அரசு உறுதி கொண்டுள்ளது. அதற்காக எல்லைப் புற சாலைகள் அமைப்புக்கும் ராணுவத்துக்கும் உதவுவதற்கு சிக்கிம் அரசு தொடா்ந்து ஆதரவு நல்கும்’’ என்றாா்.