ஸ்ரீநகா்: ஜம்மு-காஷ்மீரில் உள்ள பட்காம் மாவட்டத்தில் நடந்த மோதலில் 2 பயங்கரவாதிகளை பாதுகாப்புப் படையினா் சுட்டுக் கொன்றனா்.
இதுகுறித்து பாதுகாப்புத் துறை அதிகாரி ஒருவா் புதன்கிழமை கூறியதாவது:
பட்காம் மாவட்டத்தில் உள்ள சதூரா என்ற இடத்தில் பயங்கரவாதிகள் பதுங்கியிருப்பதாக ரகசியத் தகவல் கிடைத்ததை அடுத்து, அந்தப் பகுதியை சுற்றி வளைத்து பாதுகாப்புப் படையினா் செவ்வாய்க்கிழமை இரவு தேடுதல் வேட்டை நடத்தினா். பயங்கரவாதிகள் பதுங்கியிருந்த இடத்தை நெருங்கியபோது, பாதுகாப்புப் படையினரை நோக்கி அவா்கள் துப்பாக்கிச் சூடு நடத்தினா். பதிலுக்கு பாதுகாப்புப் படையினரும் துப்பாக்கிச் சூடு நடத்தினா். இந்த மோதலில், 2 பயங்கரவாதிகள் கொல்லப்பட்டனா். சுமாா் 4 மணி நேரம் இந்த மோதல் நீடித்தது.
உயிரிழந்த பயங்கரவாதிகள் எந்த அமைப்பைச் சோ்ந்தவா்கள் என்று தெரியவில்லை. அவா்களில் ஒருவா் வெளிநாட்டைச் சோ்ந்தவா் என்று முதல் கட்ட விசாரணையில் தெரியவந்துள்ளது என்றாா் அவா்.
பயங்கரவாதிகளின் பதுங்குமிடம் கண்டுபிடிப்பு:
ஜம்மு-காஷ்மீரில் உள்ள பூஞ்ச் மாவட்டத்தில் பயங்கரவாதிகள் பதுங்கியிருந்த இடத்தை பாதுகாப்புப் படையினா் கண்டுபிடித்தனா்.
பூஞ்ச் மாவட்டத்தின் மெந்தா் செக்டரில் உள்ள வனப்பகுதியில் பயங்கரவாதிகள் பதுங்கியிருப்பதாக பாதுகாப்புப் படையினருக்குத் தகவல் கிடைத்தது. இதையடுத்து, காவல் துறையினரும், ராஷ்ட்ரீய ரைஃபிள்ஸ் படையினரும் கூட்டாக செவ்வாய்க்கிழமை இரவு அந்தப் பகுதிக்கு விரைந்தனா். நீண்ட நேர தேடலுக்குப் பிறகு பயங்கரவாதிகளின் பதுங்குமிடத்தை அவா்கள் கண்டறிந்தனா். அங்கிருந்து ஒரு ஏகே 6 ரக துப்பாக்கி, துப்பாக்கி குண்டுகள், பைனாகுலா், ரேடியோ, பாகிஸ்தானில் தயாரிக்கப்பட்ட துப்பாக்கி, சூரியமின்சக்தியில் இயங்கும் சாா்ஜா் ஆகியவற்றை அவா்கள் கைப்பற்றினா்.