புது தில்லி: பொதுமுடக்கத்தில் இருந்து படிப்படியாக தளா்வுகள் அறிவிக்கப்பட்டு வரும் நிலையில், கரோனா தொற்றை மக்கள் எளிதாக எடுத்துக் கொள்ளக் கூடாது; தடுப்பூசி கண்டுபிடிக்கப்படும் வரை பாதுகாப்பு முன்னெச்சரிக்கையை மக்கள் முழுமையாக கடைப்பிடிக்க வேண்டும் என்று பிரதமா் நரேந்திர மோடி அறிவுறுத்தியுள்ளாா்.
மீன்வளத் துறையின் வளா்ச்சிக்காக, பிரதம மந்திரியின் ‘மத்ஸ்ய சம்பத யோஜனா’ என்ற பெயரில் ரூ.20,050 கோடி மதிப்பிலான திட்டத்தை பிரதமா் மோடி வியாழக்கிழமை காணொலி முறையில் தொடக்கி வைத்தாா். இந்த திட்டமானது, பிகாா் உள்பட 21 மாநிலங்கள் ஏற்றுமதியை இரட்டிப்பாக்கவும், அதிக வேலைவாய்ப்புகளை உருவாக்கவும் விவசாயிகளின் வருமானத்தை அதிகரிக்கவும் உதவிகரமாக இருக்கும்.
இதுதவிர, கால்நடைகளின் வளா்ச்சிக்காக, ‘இ-கோபாலா’ என்ற செயலியை அறிமுகம் செய்ததுடன், விரைவில் பேரவைத் தோ்தல் நடைபெறவுள்ள பிகாரின் மீன்வளம், பால்வளம், விவசாயம், கால்நடை பராமபரிப்பு தொடா்பான திட்டங்களையும் அவா் தொடக்கி வைத்தாா். நிகழ்ச்சியில் அவா் பேசியதாவது:
மீன்வளத் துறையின் வளா்ச்சிக்காக, அடுத்த 5 ஆண்டுகளில் 21 மாநிலங்களுக்கு ரூ.20,000 கோடிக்கும் அதிகமான தொகை செலவிடப்படும். வியாழக்கிழமை ஒரே நாளில் மட்டும் ரூ.1,700 கோடி மதிப்பிலான திட்டங்கள் தொடங்கப்பட்டுள்ளன.
இத்தனை திட்டங்களையும் தொடங்குவதற்கான நோக்கம், 21-ஆம் நூற்றாண்டில் இந்தியாவை சுயசாா்பு நாடாக உருவாக்க வேண்டும்; நமது கிராமங்களுக்கு அதிகாரம் அளிக்கப்பட வேண்டும் என்ற இலட்சியத்தை அடைவதற்காகத்தான்.
நாடு சுதந்திரம் அடைந்த பிறகு மீன்வளத் துறைக்காக, முதன்முறையாக மிகப்பெரிய திட்டம் தொடங்கப்பட்டுள்ளது. இந்த திட்டத்தின் கீழ் பிகாரில் பாட்னா, புா்னியா, சீதாமா்ஹி, மதேபுரா, கிஷன்கஞ்ச், சமஸ்திபூா் ஆகிய நகரங்களில் பல்வேறு உள்கட்டமைப்பு வசதிகள் மேம்படுத்தப்படும்.
வரும் 2024-25-ஆம் ஆண்டுக்குள் மீன் உற்பத்தியை 70 லட்சம் டன் அதிகரிக்க வேண்டும்; மீன் ஏற்றுமதி மூலம் ரூ.1 லட்சம் கோடி வருவாய் ஈட்ட வேண்டும் என்ற நோக்கத்துக்காக பிரதம மந்திரியின் மத்ஸ்ய சம்பத யோஜனா திட்டம் அமல்படுத்தப்படுகிறது.மீன்வளத் துறையை மேம்படுத்த புதிய அமைச்சகம் உருவாக்கப்பட்டுள்ளது.
மீன்வளத்தைத் தவிர, பசுவினங்கள் மூலம் விவசாயிகள் வருவாய் ஈட்டுவதற்காக பால் வளத் துறையில் புதிய திட்டங்கள் தொடங்கப்பட்டுள்ளன.
பசுவினங்களின் பெருக்கத்துக்காக ஐவிஎஃப் தொழில்நுட்பம் பயன்படுத்தப்பட வேண்டும். வழக்கமாக, ஒரு பசு ஆண்டொன்றுக்கு ஒரு கன்றை ஈனும். ஆனால், நவீன ஐவிஎஃப் தொழில்நுட்பம் மூலமாக ஒரு பசு பல கன்றுகளை ஈன்றெடுக்க முடியும். இந்த தொழில்நுட்பம் ஒவ்வொரு கிராமத்தையும் சென்றடைய வேண்டும் என்பதே நமது நோக்கமாகும்.
இ-கோபாலா செயலி: கால்நடைகளின் இனம், அவற்றின் சுகாதாரம் குறித்த தகவல்களை அறிந்துகொள்வதற்காக, இ-கோபாலா செயலி அறிமுகம் செய்யப்பட்டுள்ளது. இந்தச் செயலியில் கால்நடைக்கான ஆதாா் இணைக்கப்படும். இந்தப் பணி முடிவடைந்ததும், செயலியில் இருந்து கால்நடைகள் குறித்த அனைத்து தகவல்களையும் விவசாயிகள் எளிதாக பெற முடியும். இது, அவா்கள் கால்நடைகளை இடைத்தரகா்களிடம் இருந்து வாங்குவதற்கும் விற்பதற்கும் உதவியாக இருக்கும்.
கால்நடைகளைப் பாதுகாப்பதற்காக, இலவச தடுப்பூசி திட்டம் தொடங்கப்பட்டுள்ளது. நோய்த்தொற்றில் இருந்து 50 கோடிக்கும் அதிகமான கால்நடைகளை இந்த தடுப்பூசி பாதுகாக்கும்.
உள்நாட்டு பசு, காளையினங்களை வளா்த்தெடுப்பதற்காக, மிசன் கோகுல் திட்டம் விரைவில் தொடங்கப்படும். விவசாயிகளின் வருமானத்தை அதிகரிப்பதற்காக, கிராமங்களில் உணவு பதப்படுத்தும் தொழிற்சாலைகள் அமைக்கப்படும். நாட்டின் வளா்ச்சியில் அனைத்து கிராமங்களையும் இணைக்கவும், இந்தியாவை சுயசாா்பு நாடாக உருவாக்கவும் முயற்சிகள் நடைபெற்று வருகின்றன.
பாதுகாப்பாக இருங்கள்: கரோனா தொற்றை மக்கள் எளிதாக எடுத்துக் கொள்ளக் கூடாது. விஞ்ஞானிகள் தடுப்பூசி கண்டுபிடிக்கும் வரை முகக் கவசம் அணிவது, சமூக இடைவெளியைக் கடைப்பிடிப்பது போன்ற பாதுகாப்பு விதிகளை மக்கள் கட்டாயம் கடைப்பிடிக்க வேண்டும். தடுப்பூசி கண்டுபிடிக்கப்படும் வரை கரோனாவில் இருந்து நம்மை தற்காத்துக் கொள்வதற்கு இதுவே சிறந்த வழியாகும். பாதுகாப்பாக இருங்கள்; வீட்டில் இருக்கும் முதியவா்களையும் பத்திரமாக பாா்த்துக் கொள்ளுங்கள் என்றாா் மோடி.
நிதீஷுக்கு பாராட்டு: பிகாரில் மக்களுக்கு தூய்மையான குடிநீரை உறுதி செய்ததாக முதல்வா் நிதீஷ் குமாருக்கு பிரதமா் மோடி பாராட்டு தெரிவித்தாா். பொது முடக்க காலத்தில் விவசாயிகள், புலம்பெயா்ந்த தொழிலாளா்களுக்காக மத்திய அரசு அறிமுகப்படுத்திய திட்டங்களை சிறப்பாக செயல்படுத்தியதற்காகவும் முதல்வா் நிதீஷ் குமாருக்கு மோடி பாராட்டு தெரிவித்தாா். விவசாயிகள் நிதியுதவி திட்டத்தின் கீழ் பிகாரில் 75 லட்சம் விவசாயிகளுக்கு ரூ.6,000 கோடி நிதியுதவி அவா்களின் வங்கிக் கணக்கில் நேரடியாக செலுத்தப்பட்டது என்றும் மோடி கூறினாா்.
போஜ்புரி மொழியில்..: பிரதமா் மோடி தனது உரையை போஜ்புரி மொழியில் தொடங்கி பின்னா் ஹிந்தியில் பேசினாா்.