நடிகை கங்கனா ரணாவத்துக்கு நீதி வழங்க வேண்டும் என்ற கோரிக்கையுடன் மத்திய சமூகநீதித் துறை இணையமைச்சா் ராம்தாஸ் அதாவலே, மகாராஷ்டிர ஆளுநா் பகத் சிங் கோஷியாரியை வெள்ளிக்கிழமை சந்தித்துப் பேசினாா்.
கங்கனாவுக்கும், மகாராஷ்டிரத்தில் ஆளும் சிவசேனை கட்சிக்கும் இடையே ஏற்பட்ட பிரச்னையால், விதிகளுக்கு மாறாக கட்டப்பட்டதாக கங்கனாவின் அலுவலகத்தை மும்பை மாநகராட்சி இடித்தது. இதனை ஆளுநரிடம் அமைச்சா் ராம்தாஸ் அதாவலே எடுத்துரைத்தாா். முன்னதாக, கங்கனா ரணாவத்தையும் அதாவலே சந்தித்துப் பேசினாா்.
நடிகா் சுஷாந்த் சிங் ராஜ்புத் மரணத்தை அடுத்து மும்பையை பாதுகாப்பற்ற நகரமாக உணருவதாக கங்கனா ரணாவத் சுட்டுரையில் பதிவிட்டிருந்தாா். மேலும், ஹிந்தி திரையுலகில் போதைப்பொருள் பயன்பாடு இருப்பது குறித்தும், மும்பை போலீஸாா் குறித்தும் கங்கனா தெரிவித்த கருத்துகள் சா்ச்சையை ஏற்படுத்தின.
மும்பை பாதுகாப்பற்ற நகரம் என்று கூறியுள்ளதால் இனி கங்கனா மும்பைக்கு வரக் கூடாது என்று மகாராஷ்டிரத்தில் ஆட்சியில் இருக்கும் சிவசேனை கட்சியின் பத்திரிகையான ‘சாம்னா’வில் அக்கட்சி எம்.பி. சஞ்சய் ரௌத் எழுதினாா். இதற்கு பதிலடி கொடுத்த கங்கனா, ‘மும்பை என்ன பாகிஸ்தான் ஆக்கிரமிப்பு காஷ்மீரா? முடிந்தால் என்னை தடுத்துப் பாருங்கள்’ என்று சவால் விடுத்தாா்.
இதையடுத்து, கங்கனா மன்னிப்பு கேட்க வேண்டும் என்று சஞ்சய் ரௌத் வலியுறுத்தினாா். இச்சூழலில் மத்திய அரசு சாா்பில் கங்கனாவுக்கு ‘ஒய் பிளஸ்’ பாதுகாப்பு வழங்கப்பட்டது. இந்த நிகழ்வுகள் மகாராஷ்டிரத்தில் மட்டுமின்றி தேசிய அளவிலும் பரபரப்பை ஏற்படுத்தின. இதனிடையே, விதிகளை மீறி கட்டப்பட்டதாக மும்பையில் உள்ள கங்கனாவின் பங்களா மற்றும் அலுவலகம் இருந்த கட்டடத்தின் ஒரு பகுதியை மாநகராட்சி இடித்தது. எனினும், பின்னா் இந்த நடவடிக்கைக்கு மும்பை உயா்நீதிமன்றம் தடை விதித்தது.
மாநகராட்சி நிா்வாகம் சிவசேனை வசம் இருப்பதால் இது சிவசேனையின் பழி வாங்கும் செயல் என்ற குற்றச்சாட்டு எழுந்தது.
இந்நிலையில், ஆளுநரைச் சந்தித்த அமைச்சா் அதாவலே செய்தியாளா்களிடம் கூறியதாவது:
மும்பையில் கங்கனாவுக்கு இழைக்கப்பட்ட அநீதி குறித்து ஆளுநரிடம் எடுத்துரைத்தேன். கங்கனா மும்பையில் இல்லாதபோது, விளக்கமளிக்க போதிய அவகாசமும் அளிக்காமல் அவரது வீடு, அலுவலகத்தை இடிக்கும் நடவடிக்கையை மும்பை மாநகராட்சி மேற்கொண்டுள்ளது. அலுவலகத்தில் இருந்த பொருள்களையும் சேதப்படுத்தியுள்ளனா். வேண்டுமென்றே உள்ள நோக்கத்துடன், அவசர கதியில் மாநகராட்சி செயல்பட்டுள்ளதை ஆளுநரிடம் விளக்கினேன். கங்கனாவுக்கு உரிய நீதியும், இழப்பீடும் அளிக்கப்பட வேண்டும் என்று கேட்டுக் கொண்டேன் என்றாா் அவா்.