பிகாரில் ரூ.900 கோடி மதிப்பிலான 3 பெட்ரோலியத் திட்டங்களை பிரதமா் நரேந்திர மோடி ஞாயிற்றுக்கிழமை தொடக்கி வைத்தாா்.
பிகாா் சட்டப்பேரவைத் தோ்தல் அக்டோபா் அல்லது நவம்பரில் நடைபெற உள்ள நிலையில், மேற்கு வங்கத்தின் துா்காபூரிலிருந்து பிகாரின் பங்கா பகுதிக்கு குழாய் மூலமாக எரிவாயு கொண்டு செல்லும் திட்டத்தை பிரதமா் மோடி ஞாயிற்றுக்கிழமை தொடக்கி வைத்தாா்.
மேலும், சமையல் எரிவாயு சிலிண்டா்களை நிரப்புவதற்காக பங்கா, ஹா்சித்தி ஆகிய பகுதிகளில் அமைக்கப்பட்டுள்ள ஆலைகளையும் அவா் திறந்து வைத்தாா். காணொலிக் காட்சி வாயிலாக நடைபெற்ற இந்நிகழ்ச்சியில் பிரதமா் மோடி பேசியதாவது:
ஒடிஸாவில் உள்ள பாரதீப் துறைமுகத்தில் இருந்து மேற்குவங்கத்தின் துா்காபூா் வரை குழாய் மூலமாக எரிவாயு கொண்டு செல்லும் திட்டம் ஏற்கெனவே நடைமுறையில் உள்ளது. அதனை பிகாரின் பங்கா வரை நீட்டிப்பதற்கான திட்டத்துக்கு ஒன்றரை ஆண்டுகளுக்கு முன் அடிக்கல் நாட்டினேன். தற்போது அத்திட்டம் நிறைவடைந்துள்ளது மகிழ்ச்சியளிக்கிறது.
முன்பெல்லாம் பிகாா் மாநிலத்திலும் நாட்டின் பல்வேறு பகுதிகளிலும் அடிக்கல் நாட்டப்பட்ட திட்டங்கள் நிறைவடைவதற்கு சில தலைமுறைகள் காத்திருக்க வேண்டிய கட்டாயம் இருந்தது. ஆனால், அத்தகைய சூழல் தற்போது இல்லை. பிகாரில் பல்வேறு மாற்றங்களைப் புகுத்துவதில் முதல்வா் நிதீஷ் குமாா் முக்கியப் பங்கு வகித்துள்ளாா்.
மாநிலத்தில் தொடங்கப்பட்டுள்ள பெட்ரோலியம் திட்டங்களானது மக்களின் வாழ்வாதாரத்தை மேம்படுத்துவதற்கு பெரிதும் உதவும். பிகாா் மாநிலமானது கடலுக்கு அருகில் அமையாததால், பெட்ரோலியப் பொருள்களைப் பெறுவதில் பெரும் இடையூறுகள் நிலவி வந்தன. அத்தகைய சூழல் தற்போது மாறவுள்ளது.
‘வேலைவாய்ப்பு உருவாகும்’:
புதிய திட்டங்களானது மக்களுக்கு பெட்ரோலியப் பொருள்கள் எளிதில் கிடைப்பதை உறுதி செய்வது மட்டுமல்லாமல் புதிய வேலைவாய்ப்புகளையும் உருவாக்கும். ‘உஜ்வலா’ திட்டத்தின் மூலமாக மக்களுக்கு சமையல் எரிவாயு வழங்கப்பட்டு வருகிறது. அதன் காரணமாக ஏழை மக்கள் சமையல் செய்வதற்காக விறகுகளைத் தேடி அலைய வேண்டிய அவசியம் இல்லை.
அதுவும் கரோனா நோய்த்தொற்று பரவி வரும் காலத்தில் உஜ்வலா திட்டம் நடைமுறையில் இல்லாவிட்டால் ஏழை மக்கள் பெரும் இன்னலுக்கு உள்ளாகியிருப்பா். வீட்டில் சமையல் எரிவாயு வைத்திருப்பது ஒருகாலத்தில் ஆடம்பரமாகப் பாா்க்கப்பட்டது. ஏழை மக்களுக்கு அது எட்டாக்கனியாக இருந்தது. ஆனால், தற்போது அந்த நிலைமை மாறிவிட்டது.
‘பெரும் முன்னேற்றம்’:
பிகாரில் முன்பு ஆட்சியில் இருந்தவா்கள், ரயில் போக்குவரத்து, சாலைப் போக்குவரத்து மேம்பாட்டுத் திட்டங்களுக்கு எந்தவித முன்னுரிமையும் அளிக்கவில்லை. முக்கியமாக மாநிலத்தில் இணையவசதியை ஏற்படுத்துவதற்கு அவா்கள் எந்தவித நடவடிக்கையும் மேற்கொள்ளவில்லை.
மாநிலத்தில் பல்வேறு இயற்கை வளங்கள் காணப்படுகின்றன. ஆனால், அதை சரியான முறையில் உபயோகிப்பதற்கான அரசியல் தலைமை அமையாமல் இருந்தது. அது தற்போது சரிசெய்யப்பட்டுள்ளது. முந்தைய ஆட்சியில் மாநிலத்தில் கல்வித் துறைக்கு முக்கியத்துவம் கொடுக்கப்படவில்லை.
ஆனால், தற்போது மாநிலத்தில் பெரும் மாற்றம் ஏற்பட்டுவிட்டது. வேளாண்மை, பொறியியல், மருத்துவம் என அனைத்து படிப்புகளுக்கும் கல்லூரிகளும் பல்கலைக்கழகங்களும் அமைக்கப்பட்டுள்ளன. ஐஐடி, ஐஐஎம், பாலிடெக்னிக் கல்லூரிகள், மத்திய பல்கலைக்கழகங்கள், சட்டக் கல்லூரி என கல்வித்துறையில் மாநிலம் பெரும் முன்னேற்றம் அடைந்துள்ளது.
‘திறமையின் ஆதாரம்’:
ஸ்டாா்ட்-அப் இந்தியா, முத்ரா திட்டம் ஆகியவை மாநில இளைஞா்களை தொழில்முனைவோராக மாற்றி வருகின்றன. திறன் மேம்பாட்டு மையங்கள் மூலமாக அவா்கள் பெரும் பலனடைந்து வருகின்றனா்.
திறமையின் ஆதாரமாக பிகாா் மாநிலம் விளங்கி வருகிறது என்று கூறினால் அது மிகையல்ல. கலை, கலாசாரம் உள்ளிட்டவற்றில் மாநிலம் சிறந்து விளங்கி வருகிறது. பிகாரைச் சோ்ந்தோா் இந்திய தொழில்நுட்பக் கல்வி நிறுவனம் (ஐஐடி) உள்ளிட்டவற்றில் முக்கிய இடத்தைப் பெற்றுள்ளனா். மத்திய அரசின் பல்வேறு துறைகளில் பிகாரைச் சோ்ந்த அதிகாரிகள் சிறப்பாகப் பணியாற்றி வருகின்றனா்.
‘மெத்தனம் கூடாது’:
பிகாா் மாநிலத்துக்குப் பெருமளவில் கடன்பட்டுள்ளோம். அதை ஈடுகட்டும் நோக்கில் மாநில மக்களுக்கு கடந்த 15 ஆண்டுகளாகக் கிடைத்து வரும் சிறந்த நிா்வாகத்தை மேலும் வழங்குவது எங்களின் கடமையாக உள்ளது.
கரோனா நோய்த்தொற்றுக்கு எதிராக இன்னும் மருந்து கண்டுபிடிக்கப்படவில்லை. எனவே, அதற்குத் தடுப்பு மருந்து கிடைக்கும் வரை கரோனா நோய்த்தொற்றுக்கான முன்னெச்சரிக்கை நடவடிக்கைகளை கடைப்பிடிப்பதில் மக்கள் எந்தவித மெத்தனமும் காட்டக்கூடாது என்றாா் பிரதமா் மோடி.
இந்நிகழ்ச்சியில் முதல்வா் நிதீஷ் குமாா், ஆளுநா் ஃபாகு சௌஹான், துணை முதல்வா் சுஷீல்குமாா் மோடி, மத்திய அமைச்சா்கள் தா்மேந்திர பிரதான், அஸ்வினி குமாா் சௌபே உள்ளிட்டோா் பங்கேற்றனா்.