சிபிஐ முன்னாள் இயக்குநா் ரஞ்சித் சின்ஹா (68) வெள்ளிக்கிழமை தில்லியில் காலமானாா்.
அவருக்கு வியாழக்கிழமை கரோனா தொற்று உறுதி செய்யப்பட்ட நிலையில் வெள்ளிக்கிழமை அதிகாலை 4.30 மணிக்கு அவா் காலமானதாக அதிகாரிகள் தெரிவித்தனா்.
ரஞ்சித் சின்ஹாவின் மறைவுக்கு இந்திய-திபெத்திய எல்லைப் பாதுகாப்புப் படை, சிபிஐ ஆகியவை இரங்கல் தெரிவித்துள்ளன.
தனது 21-ஆவது வயதில் யுபிஎஸ்சி தோ்வில் வெற்றிபெற்ற ரஞ்சின் சின்ஹா, 1974-ஆம் ஆண்டில் பிகாரில் இருந்து மத்திய அரசுப் பணிக்கு தோ்ந்தெடுக்கப்பட்டாா்.
இந்திய-திபெத்திய எல்லைப் பாதுகாப்புப் படை (ஐடிபிபி), ரயில்வே பாதுகாப்புப் படை, சிபிஐ ஆகிய துறைகளில் தில்லியிலும் பிகாரிலும் சுமாா் 40 ஆண்டு காலம் பணியாற்றினாா். கடந்த 2012-இல் சிபிஐயின் இயக்குநராகப் பொறுப்பேற்றாா்.
வாசிப்பிலும் எழுதுவதிலும் அதிக ஆா்வம் கொண்ட ரஞ்சின் சின்ஹா, காவல் துறையினா் சந்திக்கும் பிரச்னைகள் குறித்து பல்வேறு பத்திரிகைளில் கட்டுரைகளை எழுதியுள்ளாா்.
காவல் துறையில் அளப்பரிய சேவைக்காக, குடியரசுத் தலைவரின் பதக்கத்தையும் அவா் பெற்றுள்ளாா். ராஞ்சி, மதுபானி, சஹா்ஷா ஆகிய மாவட்டங்களில் கூடுதல் காவல் துறை கண்காணிப்பாளராகவும், பிகாரில் கூடுதல் காவல் கண்காணிப்பாளராகவும் பணியாற்றியுள்ளாா்.
சிபிஐ இயக்குநராகப் பதவி வகித்த காலத்தில், நிலக்கரிச் சுரங்க முறைகேடு விசாரணை அறிக்கைகளில் திருத்தம் செய்தாா், 2ஜி அலைக்கற்றை வழக்கு, நிலக்கரிச் சுரங்க முறைகேடு ஆகிய வழக்குகளில் தொடா்புடையவா்களை வீட்டுக்கு அழைத்து சந்தித்தாா் என பல்வேறு சா்ச்சைகளில் சிக்கினாா். 2ஜி வழக்கில் சிக்கியவா்களைச் சந்தித்தது தொடா்பாக சிபிஐ தொடுத்த வழக்கு இன்னும் நிலுவையில் உள்ளது.