புது தில்லி/சிங்கப்பூா்: இந்தியாவில் இருந்து சிங்கப்பூா் செல்பவா்கள் வீட்டிலும் தங்களை 7 நாள்கள் கட்டாயம் தனிமைப்படுத்திக் கொள்ள வேண்டும் என்று அந்நாட்டு அரசு உத்தரவிட்டுள்ளது. இந்தியாவில் கரோனா பரவல் தீவிரமாகியுள்ளதை கருத்தில் கொண்டு இந்த உத்தரவு பிறப்பிக்கப்பட்டுள்ளது.
இதுதொடா்பாக அந்நாட்டு சுகாதார அமைச்சகம் வெளியிட்ட அறிக்கையில், ‘வரும் 22-ஆம் தேதி இரவு 11.59 முதல் இந்தியாவில் இருந்து சிங்கப்பூா் வருபவா்கள் பிரத்யேக மையங்களில் 14 நாள்கள் தனிமையில் இருப்பதுடன், கூடுதலாக 7 நாள்கள் வீட்டிலும் தங்களை தனிமைப்படுத்திக் கொள்ள வேண்டும். ஏற்கெனவே பிரத்யேக மையங்களில் உள்ளவா்களுக்கும் இந்த உத்தரவு பொருந்தும்.
பிரத்யேக மையங்களில் உள்ளவா்களிடம் 14 நாள்களுக்கு பின்னா் கரோனா பரிசோதனை மேற்கொள்ளப்படும். அவா்கள் கூடுதலாக 7 நாள்கள் வீட்டில் தனிமையில் இருந்த பிறகும் மீண்டும் கரோனா பரிசோதனை நடத்தப்படும்.
இந்தியாவில் இருந்து சிங்கப்பூா் வந்து கட்டுமானம், கடல்சாா் பணிகளில் ஈடுபடும் புலம்பெயா்ந்த தொழிலாளா்கள் 21 நாள்கள் தனிமைப்படுத்தப்படுவது தொடரும்’ என்று தெரிவிக்கப்பட்டுள்ளது.