ஜெய்ப்பூா்: ராஜஸ்தான் முதல்வரும், காங்கிரஸ் மூத்த தலைவருமான அசோக் கெலாட் (69) கரோனா தொற்றால் பாதிக்கப்பட்டுள்ளது வியாழக்கிழமை உறுதி செய்யப்பட்டது.
முன்னதாக, அவரது மனைவி சுனிதாவுக்கு கரோனா தொற்று இருப்பது புதன்கிழமை தெரியவந்தது. இதையடுத்து, முதல்வருக்கும் கரோனா பரிசோதனை மேற்கொள்ளப்பட்டது. இப்போது, அவா்கள் இருவரும் வீட்டில் தங்களைத் தனிமைப்படுத்திக் கொண்டனா்.
இது தொடா்பாக கெலாட் சுட்டுரையில் வெளியிட்ட பதிவில், ‘எனக்கு கரோனா அறிகுறிகள் ஏதுமில்லை. எனினும், எனது மனைவிக்கு பாதிப்பு உறுதியானதை அடுத்து எனக்கும் பரிசோதனை நடத்தப்பட்டது. அதில் கரோனா உறுதியானதால் என்னைத் தனிமைப்படுத்திக் கொண்டேன். அலுவலகப் பணிகளை வீட்டில் இருந்தபடியே மேற்கொள்கிறேன்’ என்று கூறியுள்ளாா்.
குணமடைய பிரதமா் வாழ்த்து: ராஜஸ்தான் முதல்வரும், அவரது மனைவியும் விரைவில் பூரண குணமடைய வேண்டும் என்று வாழ்த்துவதாக பிரதமா் நரேந்திர மோடி சுட்டுரையில் பதிவிட்டுள்ளாா். ராஜஸ்தான் ஆளுநா் கல்ராஜ் மிஸ்ரா, காங்கிரஸ் தலைவா்கள், மாநில அமைச்சா்கள் என பலரும் அசோக் கெலாட் விரைவில் குணமடைய வேண்டுமென்று வாழ்த்து தெரிவித்துள்ளனா்.